عسلية يفضح (العوالم الخفية الجمركية) بميناء دمياط من أول شراء لجان التتمين الجمركية وحركة الساحة وحتى تهريب حاويات الألعاب النارية وصفقة عين الجمل وأمضى يا أشول

الجمعة 08-06-2018 00:13

عسلية يفضح (العوالم الخفية الجمركية) بميناء دمياط من أول شراء لجان التتمين الجمركية وحركة الساحة وحتى تهريب حاويات الألعاب النارية وصفقة عين الجمل وأمضى يا أشول

كتب

أتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه وأن نقدم خدمة وطنية للجهات الرقابية وأن نكون عيناً للحقيقة لكنى أكتشفت مع بداية كل حدوتة جديدة بالموانى المصرية أننا نحكى ونكتب القشور والحقيقة مفزعة ..

حاولت أن أحكى لكم أهوال ما سمعت لكننى أمام إصرار عسلية على اللت والعجن تركته يحكى لكم فى جلسات الشلت البحرية عن (العوالم الخفية الجمركية) من أول شراء لجان التتمين الجمركية وحركة الساحة وحتى تهريب حاويات الألعاب النارية وصفقة عين الجمل لصالح مستخلصين حيتان معروفين بالإسم وبالتفاصيل المملة ..!!

 

فقال لى عسلية :

بُص يا باشا إحنا صحيح بنقول القشور بس عشان الجهات الرقابية تجيب كل اللى فى البطون والمستخبى والمبطون وبصراحة يا باشة البشوات المعلومات اللى أنت كتبتها عن ميناء دمياط المنسى واللى كان محدش أخد باله منه قالبة الدنيا والأمن الوطنى والرقابة الإدارية ومباحث المينا عاملين شغل الله ينور وأتضح إن الشغل فيها كان شغال زى السكينة فى الحلاوة بإتفاق بين موظفين جمارك وحيتان التخليص بدمياط بقالهم أكتر من سنة والشغل كان شغال هُس هُس ومحدش أخد باله من حاجة وده اللى خلانى أدور يا باشا ورا موضوع تحويل بضايع قطع غيار السيارات الجديدة والمستعملة وقطع غيار الدراجات والأدوات الصحية من موانى بورسعيد والعين السخنة بالسويس إلى ميناء دمياط واللى كانت بتخرج بنص رسومها الجمركية المقررة رسمياً عن باقى الموانى ولما قعدت أدور ورا الموضوع أكتشفت إنها كانت إتفاقيات بين حيتان من المستخلصين مع ثروت . د المحرك الرئيسى لكل شىء داخل الميناء المنكوب ولما دورت أكتر يا باشا لقيت الموضوع فيه شراء لجان التتمين ورجال حركة الساحة وخد عندك لعب فى البنود وتحمير وتشمير الشهادات على كيف كيفك و .. أمضى يا أشول !!

 

فقاطعت عسلية وقلت له :

إقفل خاشمك يا واد يا مفترى ده كلام ما ينفعشى يتكتب فى جرايد ولا يتقال على مواقع ولا فيس بوك وتويتر ده كلام ما يتقلشى إلا فى جهاز الكسب غير المشروع والجهات العليوى أوى وكلم الباشا عٍدل ومن أين لك هذا يا مبقع !!

إقفل خاشمك يا واد يا أبو لسان زالف إتفاقيات إيه وشراء لجان تتمين وشراكة إيه وزواج كاثوليكى إيه اللى بتنبط عليه بين موظفين كبار وصغيرين ومستخلصين حيتان معروفين بالإسم ..

إقفل خاشمك يا واد وبكفاياك لت وعجن وكلام عـ الناس الكُومل وأسكت يا لسانى .. مش هيا دى يا واد لجان التتمين الملاكى اللى فى الساحة واللى كلها إتفاقيات وتربيطات على كبير .. مش هيا دى يا واد يا مفترى الجمعية الكبيرة اللى بيديرها ثروت . د الراس الكبيرة والعقل المدبر لـ (النجم الكبير) لكل الإتفاقات والتربيطات مع المستخلصين الحيتان ومعاهم رجالتهم (على . س وياسر . أ ومحمود . ع . ج وحسام .ع .

إقفل خاشمك يا واد خلينى ساكت على الشغل المشغول اللى طلع خلال الـ 15 شهر اللى فاتوا من غير مراجعة لاحقة جمركية ولا دياولو وشالله يا مهلبى والشغل كله كان بيخرج لصالح الحيتان الكبيرة (الجديدة والقديمة) لصالح رضا . أ . س (الحوت الكبير بتاع كله) وعصام . س (متعهد تهريب الألعاب النارية وكل ما هو ممنوع ومحظور) بالإضافة إلى رامى . ع مستخلصين السلع الصناعية والأدوات الكهربائية والثلاجات المستعملة المحظورة وقطع غيار السيارات والدراجات والأدوات الصحية وكذا ناجى . ع ومصطفى . د وأشرف ع . ومحمد . أ . ن والسيد . أ . ن مستخلصين اللعب فى المواد الغذائية واللهم إنى صايم  .

 

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد ودايماً تقولنا عـ البير وغطاه وبمناسبة البير وغطاه تعالى أقولك بقى على الزغلول الكبير عن (صفقة عين الجمل السورى) واللى هوة مش سورى وخرجت قبل شهر رمضان بأيام بأوراق مزورة ضمن الإتفاقية العربية وهيا لا عربية ولا إتفاقية وتم الإفراج عنها من غير ولا مليم وهيا رسومها ملايين ضايعة من خزينة وزارة المالية ده غير الـ 45 حاوية خردوات بعد الكشف والتتمين واللى طلع فيهم ديناميت وألعاب نارية ومكياجات ماركات عالمية والمشاريب كلها على حساب (النجم الكبير) يا باشا ..

 

فقاطعت عسلية وقلت له :

لساك شايل فى قلبك السواد يا واد يا اللى قلبك أسود زى البولاك وبتتكلم على أسياد البلد والمينا وبتجيب سيرة النجم الكبير .. لساك شايل فى قلبك السواد يا واد وبتحكى على الزغلول الكبير فى صفقة عين الجمل و45 حاوية ألعاب نارية بتوع السقا وشركاه طب خدنى منى أنا بقى الزغلول الأكبر والتحقيق اللى على مستوى عالى مع النجم الكبير وشركاه فى مكتب وزير المالية ومكتب رئيس مصلحة الجمارك ده غير التحقيقات اللى هتم فى الجهات العليوى أوى (ومن أين لك هذا يا مبقع) .. إقفل خاشمك يا واد وسيب شوية للحلقات الجاية ..!!؟؟

اضف تعليق

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي