عسلية يكشف : أسرار تجميد حركة تنقلات المهزوز بجمارك بورسعيد وقائمة سوداء للتحفظ على أموال المهربين بالبنوك

الأحد 19-02-2017 07:24

عسلية يكشف : أسرار تجميد حركة تنقلات المهزوز بجمارك بورسعيد وقائمة سوداء للتحفظ على أموال المهربين بالبنوك

كتب

ألتزمت الصمت أنا وعسلية خلال الفترة الماضية وأتفقنا سويا” أن نراقب المشهد من بعيد وأيقنا تماما” أن تلك الفترة ستكون كاشفة للجميع وفاضحة لكل الوجوه وخاصة داخل ميناء بورسعيد الجمركى وأتفقنا سويا” ألا نسكت بعد اليوم حاولت أن أحكى لكم لكنى أمام إصرار عسلية على اللت والعجن تركته يحكى لكم عن البير وغطاه ويكشف لكم أسرار تجميد حركة تنقلات (المهزوز) بجمارك بورسعيد بالتفاصيل المملة .

 

فقال لى عسلية :

’بص يا باشا علشان أحكيلك على تنقلات المهزوز لازم أحكيلك الموضوع من أوله بعد إجتماع المهزوز بكل الموظفين عشان يفهمهم سياسته الجديد فى النادى إياه والإجتماع ده اللى أعقبه حركة التنقلات خطط ليها سى عمر والراضى وجابو الضعضع اللى ملوش صفة فى شئون العاملين عشان يفصلها على مقاس المهزوز ومصالح المهزوز وسبابيب المهزوز وربنا يكفينا ويكفيك شر المهزوز والمهزوزين .

 

وأكمل عسلية :

وبعد تفصيل الحركة القرعة سافر المهزوز عشان يصدق على أكبر حركة على كيف كيفهم وعشان يبقى زيتنا فى دقيقنا والشغل يبقى شغال .. قوم إيه الريحة طلعت والكلام وصل لفوق قوى قوى يا كبيرنا وصدرت تعليمات رقابية بقف الحركة بعد ما أتمضت بعد ما خلاص سى عمر والراضى ظبطوا نفسهم عالحركة ووضبوا للمهزوز مكتبه إشى سجاد إيه وإيشى معطرات إيه وإيشى مكاتب إيه ؟ وسبحان العاطى المهزوز بقى بيلبس البدلة بسبع تلاف والنضارة بأربع تلاف والشراب لون القميص والتكييف سخن وبارد .

 

فقاطعت عسلية وقلت له :

إقفل خاشمك يا واد يا مفترى إياك تجيب سيرة المهزوز ورجالة المهزوز ولا تنطق بكلمة واحدة على لسانك محناش قد الراضى ورجالة الراضى وما تزعلشى مننا سى عمر صاحب العزبة .. إقفل خاشمك يا واد ما تزعلشى مننا البهوات والبكوات بتوع الجمرك دول هما صحاب الجمرك يا واد يا مفترى .. لساك شايل فى قلبك السواد يا واد وبتتكلم على إجتماع النادى إياه .. مش هوة ده الإجتماع اللى كان فيه شلة الأنس كلها .. مش هوة ده الإجتماع يا واد اللى أتكلم فيه أبو الأجناد وقال للمهزوز إن بقاله 4 شهور بس فى المنافذ الخارجية وزى ما يكون بيقوله دخلنى ودخل اللى زيى جوة المينا عشان نسرق مش هوة ده أبو الأجناد يا واد من عصابة سرقة المينا أيام الفوضى .. مش هوة ده الإجتماع يا واد اللى قام أتكلم فيه حسن سبانخ اللى قعد يمدح فى نفسه وفى إدارته وإشى ملايين جابوها للدولة وإشى ضبطيات مسكوها على الأبواب من غير ما يقوله سابوا كام مليار يتسرق من خزينة الدولة لما الحاويات كانت بتخرج زى السكينة فى الحلاوة مش هوة ده سبانخ يا واد اللى حرجه المهزوز وقاله بقالك كام سنة رد سبانخ وقاله 3 سنين رد عليه المهزوز وقله أنت المفروض تتنقل مش عشان المهزوز حقانى وبينفذ القانون لأ .. ده عشان المهزوز حاجز مكان سبانخ لشاهين اللى متفق مع الراضى عالفولة واللى قشرها .. لساك شايل فى قلبك السواد يا واد وعاوز تحكيلى أما الدور جه على حسن زعبولة عشان يتكلم قام عمل أنه تعب فاجأة عشان خاف المهزوز يسأله إنت بقالك قد إيه فى منفذ تهريب 85 الجمركى .. إقفل خاشمك يا واد وأسكت يا لسانى وما تخلنيش أحكيلك على تفاصيل حركة التنقلات الملاكى  الساحات والمجمعات والأبواب واللى مضاها المهزوز من القاهرة عشان يظبط رجالته عالكراسى عشان زيتنا يبقى فى دقيقنا بجد بعد إتفاقات الراضى على بيع ساحة الإسكراب لشهدة والأبواب لشاهين وتثبيت زعبولة فى 85 وتظبيط شلة الضعضع بتاعة بورفؤاد بكل المجمعات والساحات الجمركية عشان يقفلوا على الجمرك على نفسه ويكفوا عالخبر ماجور بمباركة كل المهربين المستفيدين من السبوبة وعلى كل لون يا بطسطا .

 

فقاطعنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وبمناسبة المهزوز وسى عمر والراضى وشلته اللى ريحتهم طلعت ووصلت لفوق لفوق قوى يا باشا وسمعنى سلام عدينى وأعدلك و الأسبوعيات والشهريات م الساحات والمجمعات والقبض اللى فوق واللى القبض اللى اللى تحت واللى ملوش خير فى حاتم ملوش خير فى مصر .

 

وأكمل عسلية :

وما قولكشى يا باشا على الجنب التانى مصيبة وطبلت على كل مهربين البلد وهتغير الخريطة التهريبية بالمدينة الحرة بعد القايمة السودة بالتحفظ على أموال 7 مهربين بالبنوك فى أكبر قضية غسيل أموال هتكون حديث الجرايد والمواقع والسوشيال ميديا خلال الأيام اللى جاية بعد تضخم ثرواتهم م التهريب ودول قايمة أولى وفيه قايمة سودة ومهببة بهباب تانية فيها 8 مهربين مشاهير على 14 موظف معروفين بالإسم فى قضية كسب غير مشروع ولو اللى فى بالى حصل هتبقى هيا كمان غسيل أموال وسمعنى سلام الملاحة الملاحة وحسرة علينا حسرة علينا ..

 

فلاحقت عسلية :

إقفل خاشمك يا واد يا أبو لسان زالف إياك تجيب سيرة الناس الكومل .. قايمة سودة أولانية إيه وقايمة سودة تانية إيه ده قوايم تالتة ورابعة وخامسة وصف تانى وتالت ورابع وعلى كل لون يا بطسطا .. إقفل خاشمك يا واد ما تخلنيش أتكلم عالبير وغطاه وأقولك إن اللى أتحفظ على أموالهم صابر والعريان ويوسف وعلاء وياسر وشريف ومعاهم ميدو .. إقفل خاشمك يا واد وأسكت يا لسانى بلاش تتكلم وتقول على القايمة السودة التانية اللى سافرت أتحقق معاها فى القاهرة ودول بقى الزغاليل الكبار والتقال أوى يا واد يا مفترى وكفاية إن فيها بندق وفسدق وكل المكسرت اللى نفسك فيها ..

 

وأكملت لـ عسلية :

ما تخربطنيش بقى وتخلينى أحكيلك على قايمة الـ 13 موظف المشبوهين والمحالين للكسب غير المشروع لتضخم ثرواتهم من أول الواد عياد اللى هبر الهبرة وخلع مرورا” بسبانخ وزعبولة القلة اللى مأجر 85 مفروش والقايمة طويلة يا واد يا مفترى ..  أقفل خاشمك يا واد وما تخلنيش أقولك على فيللهم ولا قصورهم فى دمياط الجديدة والقاهرة الجديدة والرحاب ومدينتى و6 أكتوبر عند موال العرب يا واد ده غير شاليهات الساحل الشمالى ووادى دجلة وباى بالعين السخنة والغريب يا واد ان الموظفين الشمال شاريين جنب المهربين شمال الشمال وربنا ما يجعلنا جار وله عنين ..

 

فلاحقنى عسلية وقاللى :

والله أنا مكسوف منك وجاى أحكيلك ألافيك أنت اللى بتحكيلى على البيضة واللى قشرها واللى أكلها كمان يا كبيرنا وباشة البشوات وده اللى يخلينى أحكيلك على القايمة التالتة والرابعة والخامسة للمهربين …

 

فقاطعت عسلية بحدة وقلت له :

إقفل خاشمك يا واد يا مفترى أياك تجيب سيرة القوايم السودة التالتة والرابعة والخامسة الحيطان ليها ودان يا واد ودول مشاركين كل المشبوهين فى المينا ودول صحاب المينا يا واد ما توديناش فى داهية .. لساك شايل فى قلبك السواد يا واد يا أبو قلب عامل زى البولاك وعاوز تخربط بأسامى قايمة من القوايم طب ما أنا أقدر أقولهم يا واد وأحكيلك حكايتهم ومنين يودى لفين والموضوع كله عبارة عن 15 كيلو كابوريا فرز تالت دى غير الكلالى والدويتو وزيزو وشغتة واللى تحسبه صقر يطلع (قطة) .. إقفل خاشمك يا واد وسيب شوية للحلقات الجاية ..!!؟؟

 

 

 

 

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي