عسلية يكشف المستور : حدوتة ((الخلبوص)) فى الجمرك ((البلبوص)) بمباركة عصابات موانى دمياط والسُخنة وبورسعيد على وجه الخصوص

الأربعاء 19-12-2018 07:25

عسلية يكشف المستور : حدوتة ((الخلبوص)) فى الجمرك ((البلبوص)) بمباركة عصابات موانى دمياط والسُخنة وبورسعيد على وجه الخصوص

كتب

أتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه وأن نقدم خدمة وطنية للجهات الرقابية وأن نكون عيناً للحقيقة أمام الرأى العام .. لكنى كنت أكتشف مع نهاية كل حدوتة جديدة بالموانى المصرية أننا نحكى ونكتب القشور والحقيقة مفزعة .

حاولت أن أحكى لكم أهوال ما سمعت من عسلية لكننى أمام إصرار عسلية على اللت والعجن فى جلسات الشلت البحرية تركته يحكى لكم عن حدوتة الخلبوص فى الجمرك البلبوص بمباركة عصابات موانى دمياط والسُخنة وبورسعيد على وجه الخصوص .. بالتفاصيل المملة !!

 

فقال لى عسلية :

أحنا يا باشا بنقول القشور عشان الجهات الرقابية والأمنية تجيب كل اللى فى البطون والمستخبى والمبطون وعشان كده أنا هأحكيلك الأول عن حكاية (( إذاى تهرب سلاح كّتر أو أى ممنوعات تحت حراسة رجال الجمارك فى أى ميناء يقابلك فى سكتك)) .

أولاً تجيب أى حاوية شمال وتجيب جواها أى صنف ((ششنة)) وتشحنها على أى ميناء يعجبك ولو عدت على خير بعد ما تظبط التظابيط المظبوطة يبقى خير .. أما بقى لو معدتشى على خير وأتمسكت .. ما تقلقشى محلولة .. أهم حاجة تظبط اللجنة اللى هتجرد محتويات المظبوطات عشان تثبت فى الأوراق 20% بس أو أقل من الممنوعات وتسيب القضية الجمركية تاخد مجراها وبعد كام شهر تدفع غرماتك وتقدم طلب للنيابة بفصل محتويات الحاوية السليمة عن الممنوعات وطبعاً هتاخد الموافقة لأنه إجراء قانونى 100% وتروح تفرج عن المحتويات السليمة ومعاها 80% أو أكتر من الممنوعات اللى ما أتثبتتشى من كام شهر وتخرج رسمى على أنها كلها سليمة بعد تظبيط اللجنة الجديدة فى حماية رجال الجمارك والجهات المعنية المضحوك عليهم بالتدليس وحتى الـ 20% من الممنوعات اللى هتطلب تخزنهم فى مخزن جمركى على إنك هتعيد تصديرها لنفس بلد المنشأ وتلعب لعبتك وتهربهم من نفس المخزن ولا من شاف ولا من درى زى مضبوطات كتير أتهربت من المخازن الجمركية .. والفاعل مجهول .. بس أنا عارفهم كلهم !!؟؟

 

فقاطعت عسلية وقلت له :

إقفل خاشمك يا واد يا مفترى يا أبو قلب أسود م البولاك .. إياك تكون يا واد يا أبو لسان زالف بتنبط على ((الخلبوص اللى لما تشوفه وهوة لابس غير لما تشوفه بلبوص)) زى ما أنا شايف الجمرك بلبوص دلوقتى قدامى .. إياك تكون بتنبط يا واد يا مفترى على حاوية الخلبوص البلبوص بتاعة العدد اليدوية اللى أتمسكت أيام ((جيمى النطاط)) رئيس المصلحة المحبوس وقت ما كان ماسك جمارك بورسعيد وطبعاً بعد ما مسكتها مباحث المينا والرقابة الإدارية وأتعملت لجنة ملاكى وقتها ضمت الفؤش الإستخباراتى اللى إبنه بيشتغل مع على وزة أحد رجال الخلبوص صاحب الحاوية لتطبيخها وإثبات أقل من ربع الكمية المضبوطة فى الأوراق حسب تعليمات جيمى النطاط رئيس الإدارة المركزية وشريك الخلبوص من الباطن وإن الغريب إن إسمه مجاش فى قضية فساد الجمارك .

المهم .. بعد مرور كام شهر قدم الخلبوص طلب للنيابة للتصالح بعد دفع الغرامات المقررة لفصل محتويات حاوية السلاح الشمال للإفراج عن العدد اليدوية المسموحة وإعادة تصدير سلاح الكّتر المحظور وبعد حصوله على الموافقة وده حقه القانونى الذى تلاعب به بعد ما قام فُولان الفُولانى بتفصيل لجنة ملاكى بالمستودع واللى قامت بجرد محتويات الحاوية على الورق فقط وأخدت 40 طرد المثبوتين فى الضبطية القديمة لتخزينهم لإعادة تصديرهم ليتم خروج أكثر من 80% من مضبوطات سلاح الكتر داخل حاوية العدد اليدوية التى ستخرج فى حراسة رجال الجمارك وكل الجهات المعنية وكمان هياخد فرصة عشان يهرب الـ 20% اللى هيتعاد تصديرهم من سلاح الكّتر داخل المخازن الجمركية ويحط مكانهم مكرونة أو لوبيا أو أى حاجة زى ما حصل قبل كده وقبل قبل كده .. وقبل قبل قبل كده .. أه والله زمبقولكوا كده .

 

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وتعرف كل الفيران اللى جوة البلد واللى برة البلد وتفهمها وهيا طايرة .. مهو ده الخلبوص رئيس عصابة الموانى الدولى وشريك المستخلص إياه اللى أتمسك بـ 5 مليون قرص كبتاجون فى ميناء دمياط من كام يوم  وياما عملوا بلاوى بمساعدة ثروت والبنا ونور وعبد الوهاب واللى تحسبه ((موسى)) طلع بربون بميناء دمياط ده غير الخضر ورشاد وبدوى من المجمع وطيرة وياقوت والفؤش الإستخباراتى ده بالإضافة إلى فُولان الفُولانى والكاستن وشبل فى الساحة والخريف والسمان ده فيلم التتمين الملاكى بميناء بورسعيد لصالح الخلبوص وشركاه .

 

فلاحقت عسلية وقلت له :

إقفل خاشمك يا واد يا مفترى محناش قد الخلبوص ولا وسايط الخلبوص العليوى قوى ولا الكبار اللى بيدعى الخلبوص إنه مشاركهم من الباطن وبيهدد الناس بيهم .. إقفل خاشمك يا واد ده أحنا غلابة قوى وماشيين جنب الحيط وبنقول يا حيطة دارينا .. إقفل خاشمك يا واد محناش قد الخلبوص اللى بيتباهى إنه شارى البلد بسلاطتها وبابا غنوجها وده بصراحة كلام عيب فى حق البلد يا واد يا مفترى ..

إقفل خاشمك يا واد وأسكت يا لسانى .. مش هوة ده الخلبوص اللى بيخلص شغل شركات السلام والأمريكية وأفرست والتوحيد و((بعجر بتاع دمنهور)) ودى كلها شركات شمال وملعوب فى أساسها وبتهرب كل الممنوعات والمحظورات يعنى بالعربى هما محتكرين توريد سلاح الكّتر ومنظم البوتجاز وسلك الفايبر جلاس الممنوع إستيراده إلا بموافقة الجهات السيادية فى مصر .. ده غير المناديل الجنسية والإسبراى الجنسى وأجهزة التسنط والإستشعار عن بعد وكل ده بيجى داخل حاويات أحجار القّطع والجلخ (( اللى بتتركب فى صاروخ قطع الأخشاب والحديد)) وكذا حاويات الأقفال والعدد اليدوية ده غير اللعب فى الأعداد والمناشىء والتحمير والتشمير وشالله يا خضر يا إبن خضرة .

 

 

فقاطعنى عسلية وقاللى :

والله أنا بقيت مكسوف منك يا كبيرنا .. بقى أنا جى أحكيلك ألاقيك أنت اللى بتحكيلى عـ البير وغطاه وده اللى يخلينى أكملك حدوتة عصابة الخلبوص وألعبهم الخفية عن طريق مصانع عفيفى والمصرى وأكاى إيجيبت والشركة الإسلامية بإستيراد منتج كامل وإدخاله البلاد على أنه أجزاء مستلزمات إنتاج للتصنيع وهوة ولا تصنيع ولا دياولوا لأنهم بيجيبوا المنتج الكامل فى أكتر من حاوية عن طريق تجزئة البوالص وذلك للهروب من تطبيق القرار 43 لسنة 2016 الصادر من وزير التجارة بحظر السلع برسم الوارد النهائى ما عدا اللى يتم تسجيل مصانعها فى مصر للحفاظ على الصناعة المحلية وهوة لا فيه صناعة محلية ولا بطيخ لأ  الكل أستورد أجزاء على الورق وهيا أجزاء منتج كامل ده حتى كراتين أى منتج مجزء بتيجى جوة الحاويات بتاعة مستلزمات الإنتاج لأعادة الشىء لأصله فى مصانعنا الوهمية وصناعتنا الأكثر وهمية .. شايفين المسخرة الضحك على دقون البلد .

ده غير لعب الخلبوص فى تلاجات العرض المستعملة والمحظورة اللى كانت بتتكتب فى الكشف والمعاينة بموانى بورسعيد ودمياط والسُخنة على أنها مجمدات وده اللى خلا الخلبوص محتكر تهريب كل تلك الممنوعات والمحظورات من الموانى المذكورة فى مصر يا باشا وكمان كل المصانع اللى بيدخل عليها مستلزمات أنتاج الأجزاء وهيا منتج كامل أكبر من الطاقة الإنتاجية للمصانع المذكورة والمثبتة بسجلها الصناعى .

وأنا مش عارف فين بتوع هيئة التنمية الصناعية وهيئة الرقابة الصناعية ووزارة الصناعة للتفتيش على كل المصانع الوهمية المذكورة وأين وزارة التجارة من حالة الإغراق التى عليها الأسواق من كم إستيراد تلك الأجزاء على تلك المصانع الوهمية وهى منتج كامل يباع فى الأسواق وهو ما أدى إلى زيادة الإستيراد بطريقة كبيرة والذى لم يمنعه القرار 43 لسنة 2016 الصادر من وزير التجارة بل وألصقوا التهمة بالمنطقة الحرة ببورسعيد رغم أنها لا تستورد قيمة ما يستورده تاجر واحد فى الموسكى أو العتبة وما تعبوش نفسهم بالتفتيش على ألاف الحاويات التى دخلت على أنها مستلزمات إنتاج للتصنيع وهى منتج كامل غرقوا بيه السوق وحققوا من وراه مكاسب بالمليارات خلال العامين الماضيين .

 

فقاطعت عسلية مجدداً وقلت له :

إقفل خاشمك يا واد يا مفترى ده كلام ما ينفعشى يتكتب فى جرايد ولا مواقع ألكترونية ولا يتقال لمجرد فضفضة على الفيس بوك .. ده كلام ما يتقالشى غير فى جهاز الكسب غير المشروع والأموال العامة ومن أين لك هذا يا مبقع !!؟؟

إقفل خاشمك يا واد ما تخلنيش أحكيلك على شركة الصفوة بتاعة حاوية مواسير النحاس المزورة اللى ما لقوش ورقها فى جمارك بورسعيد ولا حدوتة مصنع سوهاج الوهمى للتبريد والتكييف ولا العسل الجنسى اللى بيجى بإسم شركة قباء متخبى جوة حاويات الأقفال ولا شركة المستقبل الحديث اللى تخصصها سلاح كتر ولعب فى المناشىء ده غير تحمير وتشمير الخضر وشبل وتظبيط فُولان الفُولانى .. إقفل خاشمك يا واد وسيب شوية للحلقات الجاية .

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي