عسلية يكشف المستور : حدوتة القيادى المخضرم وسخسوخ فى مكتب المهزوز والكام بكام فى المنطقة الحرة بميناء بورسعيد

الثلاثاء 09-05-2017 04:58

عسلية يكشف المستور : حدوتة القيادى المخضرم وسخسوخ فى مكتب المهزوز والكام بكام فى المنطقة الحرة بميناء بورسعيد

كتب

أتفقت أنا وعسلية منذ بداية كتابة حلقاتنا أن نكون عين الحقيقة فى رصد كل الأحداث وأن نكون الضوء الذى يدق ناقوس الخطر لكافة الأجهزة الرقابية فى مصر وأن نلعب دوراً وطنياً لكشف أى فساد وكل فساد إلا أننى ومع أنتهاء كل حلقة من حلقات عسلية أكتشف أننا نحكى القشور والحقيقة مفزعة ومرعبة وما خفى كان أعظم .. حاولت أن أحكى لكم أهوال ما سمعت لكنى أمام إصرار عسلية على اللت والعجن على الشلت البحرية تركته يحكى لكم ويكشف المستور عن حدوتة القيادى المخضرم وسخسوخ فى مكتب المهزوز والكام بكام فى المنطقة الحرة بميناء بورسعيد .. بالتفاصيل المملة ..!!؟؟؟
 
فقال لى عسلية :
ُبص يا باشا أحنا صحيح بنقول القشور عشان الجهات الرقابية تجيب كل اللى فى البطون والمتغطى والمبطون أصل اللعب بقى على المكشوف يا كبيرنا والريحة طلعت لفوق وجهات كتير كتبت وقالت عاللى أحنا ما قولناهوش وكلام فى سرك كده يعنى وبالمفتشر (الكام بكام) فى ميناء بورسعيد وتقول الحكمة (أدينى أمارات على قد ما هأديك عيارات) و(أشوف الدولارات أحطلك 50 كرتونة إكسسوارات) و(وألعبلك فى البنود على قد ما عليا هتجود) و(وأخلصك فى ثانية وأدفعك ربع تمن الحاوية) و(أصبح شعار المرحلة : خَلّص حاويتين وخد التالتة هدية) والكلام بقى جاى من فوق قوى يا باشا يعنى لا عاد ينفع فيها تعتيم ولا ُسكمون ُبكمون ولا حاجة والفضايح بقت على عينك يا قابض .. ومش عارف أبدأ منين ولا منين ولا منين يا باشا ؟ لما الحاوية برسم المنطقة الحرة تخرج بربع تمنها وكله من خزينة الدولة بعد الوزن المضروب والإكسسوار اللى بيوصل لـ 5 طن خصم م الوزن والعيارات بقت 50% والتجزئة بقت على 12 جزء و15 جزء على الفوروردر (يعنى اللى جاية على وكيل شحن) والأصناف اللى بتتظبط باللعب فى البنود والتحمير والتشمير والكام بكام وأفتحلنا السكة ملكشى دعوة وحقك محفوظ ومعادنا كل خميس .
وأكمل عسلية :
والله ما عارف أقولك إيه ولا إيه بس يا باشا ولا أبدأ منين ؟ أقولك على القيادى المخضرم و(الصياد) الماهر اللى ظبط سخسوخ فى أحضان المهزوز فى مكتبه .. أقولك على الإجتماع الثلاثى اللى أستمر أكتر من ساعة بحضور الراضى بقسمته ونصيبه فى السبوبة .. ولا أقولك على الفضيحة اللى بجلاجل اللى عملهلم القيادى المخضرم اللى أصطادهم بسنارة واحدة ..
فلاحقت عسلية وقلت له :
أقفل خاشمك يا واد ما توديناش فى داهية هوة أحنا قد المهزوز وسخسوخ واللى بيحموهم يا واد يا مفترى ده أحنا غلابة وبنجاهد عشان نعيش .. إقفل خاشمك يا واد وإياك تيجيب سيرة سخسوخ والمهزوز والراضى بقسمته ونصيبه فى السبوبة دول كوبرات المينا والحاكم الآمر الناهى فى المينا يا واد يا مفترى .. إقفل خاشمك يا واد وشيل السواد اللى فى قلبك ده كلام ما ينفعشى يتكتب فى جرايد ولا فى مواقع ولا بوستات ولا تويتات على الفيس بوك .. ده كلام ما يتقالشى إلا فى جهاز الكسب غير المشروع والجهات الرقابية الكبيرة قوى قوى يا واد ده كلام يخص البلد وأمن البلد ومفيش حد أأمن على البلد مننا يا واد والبلد عارفة كده كويس ..
 
وأكملت لعسلية:
إقفل خاشمك يا واد يا مفترى وأسكت يا لسانى .. مش هوة ده موضوع القيادى المخضرم يا واد اللى قعد ساعة مستنى فى السكرتارية الإجتماع المغلق اللى كان بين سخسوخ والمهزوز والراضى بقسمته ونصيبه فى السبوبة .. مش هوة ده القيادى الصياد الماهر يا واد اللى أصطاد سخسوخ وهوة خارج من الإجتماع المغلق مع المهزوز وقاله : (جه اليوم يا سخسوخ إن اللى منعك من دخول المينا بقرار دفنوه شركاتك يبقوا هوة اللى ممنوع الدخول ويقوم يجى اليوم اللى تدخل فيه المينا وتدلدل رجليك وتكون فى إجتماع مغلق مع المهزوز وأنا قاعد برة) .. مش هوة ده القيادى الصياد المخضرم اللى المهزوز قاله : ( أنت زعلان ليه إن سخسوخ كان قاعد معانا لواحدينا طب ده فيه قيادات كتير بيتمنوا بس يقعدوا مع سخسوخ) .. مش هوة ده القيادى الصياد المخضرم اللى أصطاد المهزوز وقاله : أى قيادة مكانك ممكن يدخل سخسوخ مكتبه يمضى ورقة زى أى مواطن بس بيدخل بشكل عادى وسط زحمة المكتب فى وسط الناس مش تقابله فى إجتماع مغلق فى وجود الراضى بقسمته ونصيبه فى السبوبة وتولعوا اللمبة الحمرة وياشين واقفلكوا ناضورجى برة ) …
فقاطعنى عسلية قاللى :
يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد .. وبمناسبة إنك جيبت سيرة الراضى بقسمته ونصيبه فى السبوبة مهو ده الراضى نفسه الراعى الرسمى لسبوبة المنطقة الحرة فى سنوات الفوضى .. وهوة ده الراضى اللى تم نقله العام الماضى من المنطقة الحرة بقضيحة الألفين جنيه اللى كانوا فى علبة سجائر (مريت) واللى أداهوملوا مستخلص جوز بنت (فرج) الموظف بعد ما الراضى ضغط عليه يدفع الألفين فى الحاوية عشان يحمرله ويشمرله على المزاج وكيف الكيف وتم ضبطه بفضيحة .. ولا أبو ُزمل ودلدول الراضى بقسمته ونصيبه فى السبوبة المدعو ياشين اللى مشى بفضيحة بردو بالمنطقة الحرة بالتلاعب فى العيارات لصالح 4 مستخلصين وأسألوا الشيخ ناصر .
فلاحقت عسلية وقلت له :
لساك شايل فى قلبك السواد يا واد وبتتكلم على الراضى بقسمته ونصيبه وفردته ياشين .. لساك شايل فى قلبك السواد يا واد يا اللى قلبك عامل زى البولاك على الراضى بقسمته ونصيبه الممنوع من التعامل مع الجمهور بتقارير رقابية وجزاءات ونيابة إدارية .. مش هوة ده الراضى بقسمته ونصيبه فى السبوبة يا واد يا مفترى اللى هوة نفسه بلديات المهزوز واللى المهزوز كذب فى الجهات الرقابية وغيرها من الجهات وقالهم ما أعرفوش إلا من بورسعيد .. إقفل خاشمك يا واد يا مفترى وأوعى تفتكرنى من (بنها) ولا أخد ماجستير (معهد القطن) وبقول على نفسى (دكتور) ولا حاجة .. إقفل خاشمك يا واد أنا مش من (بنها) وبقولهالك للمرة التانية ولا واخد (ماجستير مضروب) من (معهد القطن) وبيقولوللى يا دوك !! إقفل خاشمك يا واد وأسكت يا لسانى مش هوة ده الراضى بقسمته ونصيبه فى السبوبة اللى طلب المهزوز من سنة ترقيته واللى رفضتها الجهات الرقابية وكانت فضيحة بجلاجل !! ومش هوة ده يا واد يا مفترى المدعو ياشين اللى أتقاول على أحد المناصب فى لقاؤه مع المهزوز فى راس البر وأتفاقهم إنه يسيب الجمل بما حمل للراضى بقسمته ونصيبه فى السبوبة ويكتفى ياشين بعزبته الجديدة مكافأة له على أمانته فى تظبيط المسائل الترانزيت اللى بتيجى المينا .
ولاحقنى عسلية وقاللى :
والله أنا مكسوف منك ومش عارف أقولك إيه ؟ بقى أنا جاى أحكيلك ألاقيك أنت اللى بتحكيلى عـ البير وغطاه وغداه وعشاه وفطاره وشاشاته وتلفزيونه اللى بييجى من عند (صاحبك) مهو أنا نسيت أحكيلك يا باشا إن السيد فلان دفع بعد ما (حودة كعب الكباية إبن طنطاوى) هدده أنه لو ما دفعشى النص أرنب هيشوف أيام سودة بعد ما الراضى بقسمته ونصيبه ساومه إنه يرمى بياضه عشان المهزوز يرضى عليه وهوة نفس الفيلم اللى أتعمل مع سخسوخ وعجاج وشطة وبوحة إبن ألمبوحة .. وبعد ما لقوا نفسهم بيدفعوا شىء وشويات كل أسبوع قالوله أفتحلنا السكة وقاموا مدورنها من الباطن سماسرة يعنى اللى عاوز يروح يمضى حاجة يروح لعجاج واللى عاوز ياخد خصم يروح لسخسوخ واللى عاوز عيارته ومرباته وبوهراته يروح لـ بوحة إبن ألمبوحة والعيار بكذا والإكسسوار مخصوم من الوزن بكذا .. وتظبيط البنود بكذا كذا كذا كذا ..
وأكمل عسلية :
وخد عندك يا باشا أى بلاغ أمنى أو رقابى يقوم فى الحال الراضى بقسمته ونصيبه فى السبوبة بإبلاغ المستخلص صاحب الحاوية اللى عليها العين عشان يظبط نفسه وعلشان كده مباحث أمن الموانى هيا اللى بس شغالة فى المينا وهيا اللى شايلة الطين والعك فى كل مكان فيكى يا مينا والسؤال هنا يا كبيرنا فين محسن بطاطا اللى بيفتش عليهم جوة المينا ما يبدورشى ليه على البلاوى الموجودة فى المنطقة الحرة والإسكراب ولا الشغل حسب الأمزجة وعلى حسب الريح ما يودى الريح ولا محسن بطاطا لسة مصدق الفيلم اللى بيحكوه إن المهزوز شغال وعشان كده بيضربوا فيه ورغم إن ريحتهم مفحفحة وفضيحتهم بقت بجلاجل فى كل مكان …
فقاطعت عسلية وقلت له :
لساك شايل فى قلبك السواد يا واد يا أبو لسان زالف وبتتكلم على (محسن بطاطا .. مفتش طنط أطاطا) .. ولا الخازوج تكون قصدك تنبط على الشكوى المتقدمة فى النيابة الإدارية ضد المهزوز بعد النقل المريب لـ (وزيزة) الممنوع من التعامل مع الجمهور بالمنطقة الحرة .. ولا قصدك يا واد تكون بتبط على شهادات المرسيدس والنيسان (اللى اليورو بتاع ورقها مضروب) وأفرج عنها المهزوز والموضوع بيتحقق على مستوى عالى .. ولا أصدك واللى حاطط عينك عليه يا واد التقارير الرقابية الوطنية عن كل كلمة صحيحة كتبناها .. إقفل خاشمك يا واد وسيب شوية للحلقات الجاية .

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي