عسلية يكشف المستور : حدوتة حفلة أُونكل مجدى فى بورسعيد وعرض المهزوز الصيفى إدفع رسوم حاوية منطقة حرة وخُد عليها حاويتين هدية

السبت 29-07-2017 05:23

عسلية يكشف المستور : حدوتة حفلة أُونكل مجدى فى بورسعيد وعرض المهزوز الصيفى إدفع رسوم حاوية منطقة حرة وخُد عليها حاويتين هدية

كتب

أتفقت أنا وعسلية منذ بداية كتابة حلقاتنا أن نكون عين الحقيقة فى رصد كل الأحداث وأن نكون الضوء الذى يدق ناقوس الخطر لكافة الأجهزة الرقابية فى مصر وأن نلعب دوراً وطنياً لكشف أى فساد وكل فساد إلا أننى ومع أنتهاء كل حلقة من حلقات عسلية أكتشف أننا نحكى القشور والحقيقة مفزعة ومرعبة وما خفى كان أعظم .. حاولت أن أحكى لكم أهوال ما سمعت لكنى أمام إصرار عسلية على اللت والعجن فى جلسات الشلت البحرية تركته يحكى لكم ويكشف المستور عن حدوتة حفلة أُونكل مجدى فى بورسعيد وعرض المهزوز الصيفى وشعار المرحلة : أدفع رسوم حاوية منطقة حرة وخُد عليها حاويتين هدية .. بالتفاصيل المملة .

 

فقال لى عسلية :

بُص يا باشا أحنا صحيح بنقول القشور بس عشان الجهات الرقابية تجيب كل اللى فى البطون والمستخبى والمبطون وبعدين أصلاً حفلة أُونكل مجدى فى بورسعيد حكاية ليها العجب ومفضوحة فى كل مكان ووصلت ريحتها للجهات الرقابية فى بورسعيد والقاهرة من أول البدل الألمانى والساعات السويسرى اللى بعتها المهزوز ووصلها رمضان السوق لمكتبه بالقاهرة مروراً بلم الفلوس من المسخلصين الشمال بالمنطقة الحرة جوة المينا لغاية الديوك الرومى من عند الفرارجى بتاع دمياط اللى بتتعمل فى النادى إياه .

 

فلاحقت عسلية وقلت له :

إقفل خاشمك يا واد يا مفترى إياك تجيب سيرة المهزوز ومهازيزه ومهربينه دول أسياد المينا وأسياد البلد يا واد يا مفترى يا اللى ما بيتبلش فى بوقك فولة .. إقفل خاشمك يا واد وخلينى واكل جزمة وساكت .. إقفل خاشمك يا واد وأسكت يا لسانى ما أتخلنيش أتكلم وأحكيلك عن الغرض الرئيسى للحفلة اللى معمولة لـ أُونكل مجدى والهدايا والأفشخانات .. إقفل خاشمك يا واد وأسكت يا لسانى وإن الغرض الرئيسى من الحفلة على طرقة (إطعم الفُم تستحى العين) للضغط على أُونكل مجدى لترقية المهزوز رئيس منطقة عشان يبقى الوضع كما هو عليه وتبقى السبوبة شغالة تحت رعايته ورعاية مهربين الراعى الرسمى للحملة اللى هتتعمل فى النادى إياه بمباركة (سى عمر) صاحب العزبة وشركاه .

 

وأكملت لعسلية :

مش هوة ده النادى إياه يا واد يا مفترى اللى كله مخالفات مالية وإدارية ومحدش بيفتش عليه من زمن طويل .. مش هوة ده سى عمر صاحب العزبة ومنظم الحفلة السبوبة .. مش هوة ده سى عمر اللى بيدفع للمهزوز إيجار شاليه (أبو عصام) 4 آلاف جنيه شهرياً على حساب النادى رغم إن فيه إستراحة فى منطقة 6 أكتوبر ملك النادى والإستراحة فاضية من سنين .. مش هوة ده سى عمر اللى متكفل بالمأكولات البحرية اليومية (فطار وغدا وعشا) للمهزوز وكمان مرتب العامل المكلف بتنضيف الإستراحة وعمل مساج للمهزوز .. مش هوة ده سى عمر اللى رفع إشتراك النادى من 3 إلى خمسة جنيه مخصومة من كل موظف شهرياً بتزوير جمعية عمومية صورية لم يوقع عليها أحد وتقديمها للشباب والرياضة وأخد عليها موافقة بخصم خمسة جنيه من كل موظف شهرياً لزوم وجبات الدلع والذى منه للمهزوز .. مش هوة ده سى عمر المسجل تهريب (حتى أسألوا سامى عبد الفتاح) .. مش هوة ده سى عمر اللى أتمسك من أسبوع وهوة بيهرب ملابس لسواق أجرة الدقلية مقابل توصيلة خصوصى للمنصورة ذهاب وعودة والمهزوز خلصها بتليفون ودفعوه قسيمة وعداه وعمل إجتماع لمديرين المنافذ وسب ولعن شرطة أمن الموانى .. هوة ولا مش هوة يا واد يا عسلية يا مفترى .

 

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وتجيب التايهة وده اللى بيخلينى أقولك على الزغلول الكبير واللى أُونكل مجدى جاى البلد عشانه .. أصله جاى يفتح يا باشا المبانى الجديدة اللى عملاها شركة الحاويات مقابل تنازل أُنكل مجدى عن أكتر من 150 مليون جنيه رسوم مستحقة للوزارة والموضوع طبعاً ريحته طلعت وفحفحت بعد جلسات التفاوض اللى تمت بين المهزوز وقيادات الحاويات واللجنة الملاكى اللى أتعملت بقيادة (طأطأ) عشان تفصل التفاوض يطلع على مفيش و150 مليون يتحولوا لمبنى للموظفين يفتتحه أُونكل مجدى وحكاية ريحتها وحشة وإن الله حليمُُ ستار .

 

فقاطعت عسلية وقلت له :

إقفل خاشمك يا واد يا اللى قلبك عامل زى البولاك .. إقفل خاشمك يا واد ده كلام ما يتكتبشى فى جرايد ولا يتنشر فى مواقع .. ده كلام ما يتقالشى غير فى الجهات العليوى قوى وجهاز الكسب غير المشروع ومن أين لك هذا يا مبقع ؟؟ مش هيا دى الفلوس اللى (نجم) الجمركى المخضرم عمل بها تقرير ومطالبات مالية لشركة الحاويات .. مش هيا دى الملايين بردو اللى بعد ما المهزوز جه على بورسعيد بشهر واحد أتفاوض مع شركة الحاويات على التنازل عن الـ 150 مليون جنيه مقابل مبنى إدارى بكام ألف جنيه بعد اللجنة اللى شكلها المهزوز واللى ضمت : طأطأ وسى عمر والشيخ حسنى وياشين وأعادو النظر فى مديونيات شركة الحاويات متجاهلين تقرير نجم الموثق بالمديونيات وقرروا تجاهل الملايين المستحقة مقابل تجهيز الحاويات لمبنى إدارى واللجنة دى اللى قدم بيها المهزوز مذكرة بالتدليس على أُنكل مجدى ومضوه على تسوية الـ 150 مليون مقابل المبنى الإدارى بالميناء وأُونكل مجدى وقع وجاى يفتتح المبنى .. وألف ألف مبروك ؟

 

فلاحقنى عسلية وقاللى :

والله أنا مش عارف أقولك إيه ؟ بقى أنا جى أحكيلك ألاقيك أنت اللى بتحكيلى على البير وغطاه وتكشفلى المتغطى والمبطون .. ده اللى بيخلينى مش عارف أقولك إيه ولا إيه بس يا باشا أقولك عن إيرادات خزينة الدولة فى المينا اللى وصلت أقل من 50% بعد ما كانت 220% .. أقولك إيه ولا إيه بس يا كبيرنا .. أقولك على المينا اللى بقت خرابة ومتباعة عينى عينك وعلى عينك يا قابض .. أقولك على حاويات مستلزمات الإنتاج اللى بتيجى بنفس الطريقة منتج كامل وعلى الورق مستلزم إنتاج مصانع وهمية .. أقولك إيه ولا إيه بس يا باشا .. أقولك على حاويات المنطقة الحرة اللى بتطلع بربع تمنها وسلملى على الشهادات اللى بتتمضى فوق 80% عيارات .. ولا أقولك على الإتفاقات والتربيطات اللى بتحصل على كل البضايع قبل ما تيجى والكام بكام اللى بقالها 9 شهور شغال فى المينا .

 

وأكمل عسلية :

أقولك إيه ولا إيه يا باشا .. أقول على فضيحة تسريب خبر تفتيش الرقابة الإدارية على شهادات المنطقة الحرة واللى سربها المهزوز بعد وصوله الخبر بلحظات .. أقولك على إجتماعات المهزوز مع مهربين المنطقة الحرة والموظفين لتسريب خبر التفتيش عليهم وأداهم تعليمات بتظبيط ورقهم عشان فيه كابسة عليهم .. أقولك إيه ولا إيه بس يا باشا .. أقولك على التظبيط المظبوط للمهزوز اللى فضايحوا مالية ميناء دمياط مع البطة المستخلص الدمياطى .. أقولك إيه ولا إيه يا باشا على التظبيط المظبوط للمهزوز مع كل المهربين والمنحرفين بالميناء .. أقولك إيه ولا إيه بس يا باشا على حاويات المكانس الكاملة بتاعة المستخلص إياه اللى خرجت على إنها قطع غيار مكانس بتعليمات من المهزوز ولا أقولك على الـ 8 حاويات بتوع مدكو الخلبوص اللى فيهم مكروييف كامل على إنه قطع غيار للتصنيع ومسكهم (فرغلى) على باب 35 والمهزوز مشاهم بالتليفون ولا أقولك على بلاغات مباحث المينا اللى بيبيعها المهزوز ومهازيزه الموجودين بمكتبه .. أقولك إيه ولا إيه يا باشا القول ضايع .. أقولك إحنا لينا الجنة .

 

فلاحقت عسلية مرة آخرى :

إقفل خاشمك يا واد ما توديناش فى داهية دى مصالح ناس عليوى قوى وأحنا غلابة ومش قدهم يا واد .. محناش قد مهربين المينا دول أسيد البلد يا واد يا مفترى ومش بعيد تلاقيهم أعضاء مجلس محلى أو رؤساء نوادى .. إقفل خاشمك يا واد الحيطان ليها ودان جوة المينا وأحنا غلابة قوى يا واد وملناش غير ربنا .. لساك شايل فى قلبك السواد يا واد وبتتكلم على مدكو الخلبوص واللى شارى منفذ تهريب 85 لحسابه الخاص واللى بيحمرله ويشمرله ويظبطله المسائل  (خضر العجيب) ومش هأقولك بردو على تحمير وتشمير (سلامة) ومدام سلامة بخير خير هيبقى فـ سلامة وزغرطى ياللى ما أنتيش غرمانة والموضوع كله عبارة على 20 كيلوا كابويا فرز تالت !! لساك شايل فى قلبك السواد يا واد وبتصوت عشان المينا متباعة مهى متباعة بقالها شهور طويلة يا واد وصرخنا لغاية ما صوتنا أتنبح .. لساك شايل فى قلبك السواد يا واد وتجيب سيرة المهزوز ومهازيزه ومهربينه .. لساك شايل فى قلبك السواد يا واد يا مفترى وبتنبط على المهزوز وتاريخه الأسود فى ميناء دمياط فى صفقات التفاح الأمريكانى والمشمش والخوخ التركى اللى باعهم الكيلو بجنيه الملف المدفون بالنيابة الإدارية بدمياط .. إقفل خاشمك يا واد وسيب شوية للحلقات الجاية عشان الكلام هيبقى بالمستندات واللى ما يشترى يتفرج ..!!

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي