عسلية يكشف المستور : طابور (المهزوز) يسيطر على ميناء بورسعيد وخراب مستعجل فى الساحات والمجمعات وياريتك سنة يا راضى

الثلاثاء 25-04-2017 07:32

عسلية يكشف المستور : طابور (المهزوز) يسيطر على ميناء بورسعيد وخراب مستعجل فى الساحات والمجمعات وياريتك سنة يا راضى

كتب

أتفقت أنا وعسلية منذ بداية كتابة حلقاتنا أن نكون عين الحقيقة فى رصد كل الأحداث وأن نكون الضوء الذى يدق ناقوس الخطر لكافة الأجهزة الرقابية فى مصر وأن نلعب دوراً وطنياً لكشف أى فساد وكل فساد إلا أننى ومع أنتهاء كل حلقة من حلقات عسلية أكتشفت أننا نحكى القشور والحقيقة مفزعة .. حاولت أن أحكى لكم أهوال ما سمعت لكنى أمام إصرار عسلية على اللت والعجن تركته يحكى لكم ويكشف المستور عن طابور المهزوز الذى يسيطر على ميناء بورسعيد والخراب المستعجل فى المجمعات والساحات ويا ريتك سنة يا راضى !!

 

المهزوز لوجو

 

فقال لى عسلية :

ُبص يا باشا أحنا صحيح بنقول القشور بس عشان الجهات الرقابية تجيب كل اللى فى البطون والمستخبى والمستور (وزى ما أنت علمتنا يا كبير مش كل اللى يتعرف يتقال) وهنيالك يا فاعل الخير والثواب ومدام بنتكلم على القشور هأحكيلك حكاية طابور المهزوز اللى أنتشر وسيطر على المينا (قشرة قشرة) .. أى والله .. (زمبقولك كده) .. وحكاية إصرار المهزوز على الراضى المرفوض من الجهات الأمنية والرقابية واللى عينه المهزوز فى منصب هام وحساس عشان يدوروا المينا كلها بمباركة ُأونكل (مجدى) حتى أصبح شعار المرحلة (أبوها راضى وأنا راضى مالك أنت ومالنا يا فاضى) ..!!

 

وأكمل عسلية :

أقولك إيه ولا إيه بس يا باشا أصلها حكاية ما يتسكتشى عليها وريحتها طلعت ووصلت كل الأجهزة الرقابية بعد ما قدر الراضى فى لمح البصر يجيب الزباين للمهزوز فى لقاء قاهرى تم من 3 شهور فى جمعية دايرة لغاية دلوقتى مع 5 مهربين حيتان ومشاهير 3 منهم فى المنطقة الحرة والأتنين الباقيين من قطع غيار السيارات المستعملة وكلهم معروفين بالإسم أهم حاجة الربع مليون يتوردوا جنب أخواتهم كل أسبوع أما (الراضى وياشين) فمقدمين طلب على يد (محضر) وبيخدوا أسبوعية ناشفة من المنطقة الحرة والإسكراب وعشان كده (ممنوع النقل أو الإقتراب والتصوير من المنطقة الحرة والسيارات .. منطقة تهريبية محظورة) .

 

أقولك إيه بس ولا إيه يا باشا عن المهزوز اللى شاغل الجهات الرقابية بالزج بالموظفين عاطل فى باطل على أنهم تشكيل عصابى (منظرة) قدام الأجهزة الرقابية عشان يدارى على التشكيل العصابى الحقيقى اللى هوة عامله واللى بيتفاوض دلوقتى مع 5 مستخلصين تانيين على أسبوعية وجمعية تانية (من أول شوف نفسك وتيجى جاهز قبل ما تقعد معاه لغاية أعتبر أبنى محمد أبنك وأديله أسبوعية عشان أنا واعده بفيلا وعربية أول ما أمسك السبوبة فى بورسعيد) !!؟؟؟

 

فلاحقت عسلية وقلت له :

إقفل خاشمك يا واد يا مفترى الحيطان ليها ودان .. ده كلام ما يتنشرشى على مواقع ولا يتكتب فى جرايد .. ده كلام يتقال فى جهاز الكسب غير المشروع والأموال العامة والجهات اللى فوق قوى .. إقفل خاشمك يا واد ده أحنا غلابة .. ما تزعلشى مننا البهوات والبكوات محناش قد الحجاج يا واد يا مفترى .. محناش قدهم يا واد ولا قد المهربين والمهازيز اللى فى المينا .. لساك شايل فى قلبك السواد يا واد وبتتكلم على (المهزوز والراضى وياشين) وطلباتهم الفورية اللى بتم على يد محضر .. لساك شايل فى قلبك السواد يا واد وبتتكلم على عصابة على بابا والأربعين حرامى اللى فى الميناء .. مش هوة ده يا واد المهزوز اللى أول يوم جه مكتبه سأل السعاه : مين بيجى هنا يشرب (قهوة) ومين بيشرب (سحلب) ومين بيشرب (مانجة) ومين بيشرب شاى (بالياسمين) (ومين بيدفع باللتى هى أحسن ومين ناوى يتعبنا معاه عشان نعلم عليه ونربيه) .

 

وأكملت لعسلية :

لساك شايل فى قلبك السواد يا واد يا مفترى وبتتكلم على أسيادك وأسياد المينا شركاء اللى ما يتسموش .. لساك شايل فى قلبك السواد يا واد وبتتكلم على الـ 5 مستخلصين (نخنوخ وعجاج وشطه وسى عبده وسى عبده التانى) اللى بيوردوا الربع مليون جنيه الأسبوعية (للراضى بالمقسوم) شيال الشنطة ودلدول المهزوز .. لساك شايل فى قلبك السواد يا واد يا اللى قلبك عامل زى البولاك وبتتكلم على الراضى بقسمته ونصيبه من الفتة الأسبوعية واللى هوة فى الأصل شمال الشمال من أيام الفوضى وشريك نخنوخ فى تتمين كل الحاويات الشمال والمرفوض أمنياً ورقابياً مش هوة ده الراضى بقسمته ونصيبه من المجمعات والساحات اللى بيلم الغلة للمهزوز من المنطقة الحرة عن طريق (العرباوى) ومن السيارات عن طريق (عكاشة) و(الغمرى) بتاع الإسماعيلية وبيتفاوض مع التخين فى المستخلصين مش هوة ده الراضى بقسمته ونصيبه من السبوبة واللى بيقاولهم من دلوقتى على سبوبة شعبان ورمضان وهنيالك يا فاعل الخير والثواب فى كل المهازيز اللى فاتحينها على البحرى ومش هاممهم أى حد .. !!

 

فقاطعنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد .. وده اللى يخلينى أجيبلك الحكاية على بلاطة بعد ما وصلت الجراءة إن مقابلات المهزوز تتم فى الإستراحة الحكومية بحضور الراضى بقسمته ونصيبة مع المهربين لأنهم واثقين إن اللى بيحصل على صدر ُأونكل (مجدى) زى العسل وُأونكل مجدى شخصياً مبسوط باللى بيحصل واللى زود المبلة طين تضحيته بعدد كبير من الموظفين فى قضايا متعددة ومقدمش المتهمين بس .. لأ عمل زيطة ودخل ناس ملهاش فى المواضيع عشان يغطى على كل اللى بيعمله واللى كشف الكلام ده وأكده (موضوع أبو العلا وإبن المسئول الجمركى) فاكر يا باشا القضية بتاعة الأربع حاويات مستلزمات إنتاج مصانع (وش ونعل) وأتمسكوا فى منفذ النقل ولقوا فيهم أحذية كوتشيات كاملة وملابس مستوردة من 6 شهور وساعتها طلعت إشاعة إن نجل قيادة جمركية فى مركز هام هوة اللى كان ماشى بورق الحاويات المضبوطة بيخلصه جوة المستودع العام وبدل ما المهزوز يحول الكشاف والمراجع والمستخلص للنيابة ويرفع القضية لوزير المالية بتحريك الدعوة الجنائية ضدهم لأنهم المتهمين الرئيسيين فى السبوبة المضبوطة لأ حول 8 موظفين لا يعرف عنهم شىء وقال عليهم تشكيل عصابى ويضم موظف المرحلة الأولى والمتمن ومدير التعريفة والاجراءات وموظفين من منافذ الميناء وأسألوا (ناجى) اللى حطوه فى القضية أونطة ؟

 

وأكمل عسلية :

وده اللى بيأكده كمان أحالته لـ 9 موظفين متهمين فى قضية الكمبيوتر المضبوط مؤخراً والمطلوب ضبطهم وأحضارهم ده غير اللى أتحبسوا أحتياطى بالفعل بوصفهم (تشكيل عصابى) بناء على طلب المهزوز بمخاطبات رسمية (يعنى بتاع الخزنة ماله وبتاع الإجراءات ماله ومدير التعريفة ماله والمتمن ماله ده كلام غير قانونى ويبوظ أتخن قضية) دى ظيطة وزمبليطة على الفاضى لأن المتهمين الرئيسيين الكشاف والمراجع اللى على باب المينا وإن هوجة الموظفين المتهمين فى إسهال القضايا عاطل فى باطل وليس المتهمين الحقيقيين بناء على مخاطبات منه وكل ده بيحصل فى الوقت إن الشهر اللى فات بس أتمسك حاويتين قطع غيار سيارات على باب 35 لأن أكتر من نصف قطع غيار السيارات اللى فى الحاويتين المضبوطتين (مش متأيدين) عن طرق مباحث ميناء بورسعيد ومش عن طريق حد تانى لأن مفيش حد شغال فى المينا غير مباحث المينا ولأن الحاويتين تبع (سى عبده التانى) ولأن ربك (كريم) قوى أعاد المهزوز الحاويتين بتوع سى عبده لساحة (1)  وإعادة الأوراق لمجمع السيارات اللى عاد التقييم تانى وعملهم 49 ألف جنيه فروق بس بدلاً من 200 ألف رسوم مستحقة  وعند خروج الحاويتين مرة تانية تم ضبطهم مرة آخرى بنفس الطريقة من مباحث الميناء لأن التتمين كان نص لبة والتحمير والتشمير للشهادات كان على مزاج (سى عبده) وتفصيل (الرمالين) المهددين بنقلهم من المجمع الملاكى ولأن سى عبده فى جمعية المهزوز كفوا على الخبر ماجور وقاله زيتنا فى دقيقنا بلا نيابة بلا دياوله بلا محاربة فساد أنما لو واقعة مشابهة لواحد برة السبوبة يتعمل عليه حفلة ويطلع تلاتة ديك أهله ويتعمل تشكيل عصابى وزيطة وزمبليطة عشان اللى ما فهمشى النظام يفهم ..

 

فقاطعت عسلية وقلت له :

إقفل خاشمك يا واد يا يا مفترى يا أبو قلب عامل زى البولاك .. إقفل خاشمك يا واد ما توديناش فى داهية محناش قد المهزوز ورجاله المهازيز ومهربينه المهاميز .. لساك شايل فى قلبك السواد يا واد وبتتكلم على أسيادك وأسياد المينا .. مش هوة ده المهزوز يا واد يا مفترى اللى متحول نيابة إدارية فى 10 مواضيع تهريبية بدمياط .. مش هوة ده المهزوز المتورط مع لجنة جرد المصانع بالمنطقة الحرة بإستثمار الإسماعيلية بعد ما وصل العجز عند المصانع هناك لـ 8 مليون جنيه بضائع مستوردة وغير خالصة الرسوم الجمركية واللى المهزوز عملهم لجنة ملاكى أونطة عن طريق (ُأونكل مجدى) وخلاهم 2 مليون بس بدل 8 مليون .. مش هوة ده المهزوز الصديق الأنتيم للمستورد والمستخلص (البطة الدمياطى) صاحب صفقة الصواريخ الحارقة والألعاب النارية المضبوطة الأسبوع الماضى من قبل مباحث المينا واللى المهزوز أتفق معاه يحول شغله كله على بورسعيد وملكشى دعوة .. مش هوة ده المهزوز يا واد يا مفترى اللى رافض يشغل أجهزة الكشف بالإشاعة (الإكسريه) للكشف على كل الحاويات الشمال ودى الأجهزة اللى مكلفة الدولة مليار ونصف جنيه مش ده المهزوز يا واد يا مفترى اللى رافض يشغل أجهزة الإكسرية بقاله 5 شهور عشان السبوبة ما تقفشى .. إقفل خاشمك يا واد وسيب شوية للحلقات الجاية ..!!؟؟

 

 

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي