عسلية يكشف المستور فى حدوتة جمعية جيمى النطاط وشركاه بميناء بورسعيد

الأربعاء 15-08-2018 13:02

عسلية يكشف المستور فى حدوتة جمعية جيمى النطاط وشركاه بميناء بورسعيد

كتب

أتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه وأن نقدم خدمة وطنية للجهات الرقابية وأن نكون عيناً للحقيقة .. لكنى كنت أكتشف مع نهاية كل حدوتة جديدة بالموانى المصرية أننا نحكى ونكتب القشور والحقيقة مفزعة ..

حاولت أن أحكى لكم أهوال ما سمعت من (العوالم الخفية الجمركية فى قضية القبض على رئيس مصلحة الجمارك والذى كان يعمل منذ ثلاثة أشهر فقط رئيس للإدارة المركزية لجمارك بورسعيد متلبساً بالرشوة ) لكننى أمام إصرار عسلية على اللت والعجن تركته يحكى لكم فى جلسات الشلت البحرية عن حدوتة جمعية جيمى النطاط وشركاه بميناء بورسعيد والأمن والآمان الجمركى والدار آمان وممنوع اللمس والإقتراب والتصوير بالتفاصيل المملة !!

 

فقال لى عسلية :

بُص يا باشا أحنا صحيح بنقول القشور بس عشان الجهات السيادية والرقابية والأمنية تجيب كل اللى فى البطون والمستخبى والمبطون وبعدين الحكاية اللى جاى أحكيهالك النهاردة على كل لسان والفضيحة على عينك يا قابض .. والموضوع مش رأى عام وبس دى حدوتة كل البيوت والقهاوى ومش فى بورسعيد وبس .. لأ فى مصر كلها كله بيتكلم يا باشا والكلام ده طبعاً مش غريب عننا أحنا قولنا كل الحكاية وحكينا الحقيقة على مدار السنتين اللى فاتوا ده حتى رئيس الجمهورية صدق على كلامنا وعلق على قضية فساد الجمارك بنفسه لأنها مش قضية عادية دى قضية أمن قومى وحتى الفضائيات نقلت المعلومات عن القضية من الجهات الرقابية اللى هيا نفس المعلومات اللى قولناها من شهور طويلة ودى نصرة من عند ربنا يا باشا لأن ربنا أسمه الحق ..

وأكمل عسلية :

وقعدت أسأل نفسى أسئلة كتيرة يا كبيرنا وأقول فى بالى : أشمعنى يا واد يا عسلية (جيمى) ما يتقبضشى عليه طول السنتين اللى فاتوا فى بورسعيد وأتقبض عليه دلوقتى لما مسك منصب رئيس مصلحة الجمارك بالقاهرة  ؟ ومين يا واد يا عسلية اللى ضغط على وزير المالية السابق ورئيس الوزرا عشان يمضوهم على قرار تعيينه رئيس مصلحة رغم إن الكبير والصغير والطويل والقُصير فى بورسعيد عارفين إن جيمى بايع المينا بساحاتها ومجمعاتها ومستودعاتها وسلاطاتها وبابا غنوجها للى يدفع ؟ ده حتى مرة مستخلص جمركى قاللى : أنه أول مرة يشوف رئيس إدارة مركزية فى بورسعيد بيلاغيه بعنيه وحواجبه أهـ والله يا باشا يتضحك ليه ده كان بيعتبر أى متعامل مع الجمرك زبون ويلاغيه زى ما التاجر بيلاغى زبونة بس ده بيلاغيه بعنيه وحواجبه وساعات بحتة طرية من الزغلاليل اللى كانت بتروح الإستراحة !!

ورغم إننا لما كتبنا عن (جيمى النطاط) من سنتين قاله علينا مزقوقين ومأجورين وولاد ستين فى سبعين وأعداء البلد وكتبوا الكلام ده فى ورق رسمى وأرسلوه للقاهرة لتشويه صورة الحقايق اللى كتبناها من سنتين واللى بتتناقلها المواقع الألكترونية والسوشيال ميديا دلوقتى عننا بس هما مش أخدين بالهم إن البلد عارفة كويس مين اللى مأجورين ومين اللى مزقوقين ومين أعداء البلد اللى بجد واللى باعوها عشان مصالحهم فى جمعية الملايين بميناء بورسعيد .

 

فقاطعت عسلية وقلت له :

إقفل خاشمك يا واد يا مفترى ده كلام ما يتكتبشى فى جرايد ولا يتقال على مواقع إلكترونية ولا سوشيال ميديا ولا إذاعة وتلفزيون ده كلام ما يتقالشى إلا فى جهاز الكسب غير المشروع والجهات العليوي قوى ومن أين لك هذا يا مبقع ؟

إقفل خاشمك يا واد محناش قد بهوات المهربين ومسئولين المهربين دول صحاب البلد يا واد يا مفترى وأحنا غلابة قوى يا واد مش هيا دى الجمعية الأسبوعية اللى كانت شغالة فى المينا من بدرى واللى زيها فيه جمعية تانية أكبر فى المنافذ الجمركية للمدينة الحرة لسة هنفتح ملفاتها بالأسماء اللى قعدت شغالة لمدة سنتين لدرجة إن (جيمى) كان له قول مأثور لما قال للمهربين (أشتغلوا أشتغلوا .. الدار أمان) والدار كان أمان قوى يا باشا حتى أسأل فلان وعلان وترتان اللى كانوا بيقولوا على جيمى أنضف م النضافة وشريف وأحلى من الشرف مفيش .

إقفل خاشمك يا واد يا مفترى متخلنيش أتكلم وأبعبع باللى عندى وأسكت يا لسانى .. مش هوة ده جيمى يا واد اللى مفيش قرار عمله جوة ميناء بورسعيد أو إستثمار الإسماعيلية ومن قبلهم ميناء دمياط إلا وقابض تمنه .. مش هوة ده جيمى يا واد اللى كان بيخّرج للتاجر فلان الفلانى من المنصورة 5 حاويات 40 قدم صواريخ شهرياً من ميناء بورسعيد والحاويات كانت بتخرج بالسيل الملاحى اللى جاية بيه من الصين من غير ما تتفتح مقابل 6 مليون جنيه شهرياً وبتليفون من جيمى لـ ونيس لـ الأبواب الجمركية .. مش هوة ده جيمى يا واد اللى كان عامل فى كل مجمع جمركى بميناء بورسعيد عصابة له (لسة موجودين لغاية دلوقتى) عشان يظبطوله الشغل للمهربين .. مش هوة ده جيمى النطاط اللى ورط رجال أعمال وأجبرهم يدفعوله بمساعدة مسئولين ونواب كانوا بيحموه وبيقاتلوا عليه لغاية ما خلوه رئيس مصلحة عشان يلعبوها على كبير وهما نفس المسئولين اللى بعد فضيحة جمعية الملايين الأسبوعية ما ريحتها طلعت ووصلت لفوق قوى وأتقبض على جيمى عاوزين يضللوا كل الجهات المعنية ويعملوا لجنة تفصيل لإلغاء المدينة الحرة وتشريد شعب بورسعيد عشان أتكلموا ووصلوا الحقيقة للجهات السيادية عشان ده شعب فى جيناته معنى الوطنية وبيخاف عالبلد .. يقوموا هما يضللوا البلد بإلغاء المنطقة الحرة (فى التوقيت ده بالذات والناس أصلاً مش لاقية) لغلق الملف الأسود بأكمله وفاكرين إن بكده أسمائهم مش هتيجى فى القضية يعنى بالبلدى (بدل ما سبتوناش ننهبها وسكتوا .. يبقى هنلغيها ونشرد شعبها وأهالينا .. المهم نحافظ على كراسينا) !!؟؟

 

فقاطعنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وتفهمها وهيا طايرة وده اللى يخلينى أقولك على القرارات الملاكى اللى كان بيديها جيمى حسب الكيف والمزاج (والكام بكام) .. يعنى الموضوع ما كانشى على قد المنطقة الحرة وبس لأ .. ده كان فيه وارد داخلى وخارجى وضيف يشمر وونيس يحمر على كيف كيفك وكان فيه إسكراب ولعب فى السيارات على كيف كيف كيفك وكان مظبط مع كله ودى جمعيات أسبوعية تانية غير جمعية المنطقة الحرة وجمعية منافذ المدينة الحرة اللى كان ليها عصابات تانية خالص وطبعاً الكلام ده ما كانشى جيمى بيعملله لواحده كان معاه عصابة كبيرة قوى بتظبط الشغل جوة المينا وعلى رأسها الراضى وياشين وسى عمر وونيس وخالد ورشوان ووزيزة ده غير الواد (محروس) الأسكندرانى بتاع (جيمى) اللى كان بيفصلله كل حاجة من أسكندرية زى ما هوة عارف بالأمارة كان جيمى كل ما يجيبله موضوع يفصله كان يقوله : (أُمال أنت عاوز تبقى رئيس منطقة شرقية إذاى من غير ما تضحى) ..

 

فلاحقت عسلية وقلت له :

لساك شايل فى قلبك السواد يا واد وبتتكلم على جيمى وعصابته المؤسسين لنهب ميناء بورسعيد من بداية 2017 وحتى النص التانى من 2018 .. لساك شايل فى قلبك السواد يا واد يا اللى قلبك عامل زى البولاك وبتتكلم جيمى وعصابة جيمى دول عصابات كتير قوى يا واد وعلى رأى المستخلص اللى قالك : (لو هما شغلونا سليم كنا أشتغلنا سليم .. أنما هما شغلوها شمال وبوظان لأنهم عاوزين يبوظوها عشان ينهبوها) .. لساك شايل فى قلبك السواد يا واد وبتنبط على اللى بيحموا جيمى وعصابة جيمى دول ربنا يتولاهم برحمته الوقتى يا واد .. ولا الخزوق تكون قصدقك على الأمن والأمان الجمركى اللى كان أيام جيمى .. ولا قصدك يا واد يا لئيم على أعترافات (محمود أبو حبيبة) الساعى بتاع جيمى على كل اللى كان بيقبض منهم أسبوعيات للجيمى (نفر نفر)  .. لساك شايل فى قلبك السواد يا أبو لسان زالف وبتتكلم على جيمى النطاط وعصابته اللى فيهم (مدير عام) كان بيجيبله المُزز والكتاكيت لغاية إستراحته الحكومية ببورسعيد ده غير اللى كانت بتجيبهم (شاهيناظ) وبالأمارة كان بيقول للمزموزة فى الإستراحة : (لازم تورينى أمكانياتك عشان أشوفك تستحقى الترقية ولا ما تستحقيش) .. إقفل خاشمك يا واد وسيب شوية للحلقات الجاية !!؟؟

 

الرابط لفيديو عن بعض ما نشرناه وأنفردنا به منذ أكثر من عام ونصف

https://m.facebook.com/story.php?story_fbid=1097881017034323&id=476958152459949

التعليقات مغلقة.

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي