عسلية يكشف (العوالم الخفية الجمركية) فى عزبة ميناء دمياط لصاحبها نجم النجوم وشركاه

الجمعة 22-06-2018 08:35

عسلية يكشف (العوالم الخفية الجمركية) فى عزبة ميناء دمياط لصاحبها نجم النجوم وشركاه

كتب

أتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه وأن نقدم خدمة وطنية للجهات الرقابية وأن نكون عيناً للحقيقة .. لكنى كنت أكتشف مع نهاية كل حدوتة جديدة بالموانى المصرية أننا نحكى ونكتب القشور والحقيقة مفزعة ..

حاولت أن أحكى لكم أهوال ما سمعت من (العوالم الخفية الجمركية) لكننى أمام إصرار عسلية على اللت والعجن تركته يحكى لكم فى جلسات الشلت البحرية عن (العوالم الخفية الجمركية) فى عزبة ميناء دمياط لصاحبها نجم النجوم وشركاه .. وبالتفاصيل المملة ..!!

 

فقال لى عسلية :

بُص يا باشا إحنا صحيح بنقول القشور بس عشان الجهات الأمنية والرقابية تجيب كل اللى فى البطون والمستخبى والمبطون أصل الموضوع كبير قوى قوى قوى فى ميناء دمياط يا باشا ..

يعنى لمؤاخذة فيه شراكة ومصالح بين مستخلصين معروفين وموظفين نص ونص وموظفين كبار وكبار كبار الموظفين أصلها عزبة ومقفولة على صحابها والحكيوة معروفة ومباحث المينا والأمن الوطنى والجهات السيادية عندها كل الحكيوة والقضية مستوية وعلى عينك يا قابض !!

يعنى خُد عندك مثلاً (إن تاريخ ميلاد المستخلص الجمركى عصام . س هو نفس تاريخ وصول نجم النجوم لرئاسة العزبة) يعنى بالمفتشر صنعوه مستخلص ومش مجرد مستخلص عادى دول عملوا منه أمبراطورية كبيرة وشبكة مصالح أكبر من الموظفين الكبار والصغيرين فى كل الأماكن الحيوية .

وخُد عندك يا باشا مثلاً علاقته الوطيدة بالمسئول الكبير عماد . د والأخطابوط الأكبر ثروت . د ومسئولى المجمعات محمد . ع . أ ومحمد . خ ومجدى . د وأشرف . م ومعاهم على . س وتامر . ز وتامر . أ وجميعهم بتربطهم مصالح وسبابيب مع نفس المستخلص وآخرين وإن الله حليم ستار ..!!

 

فقاطعت عسلية وقُلت له :

إقفل خاشمك يا واد يا مفترى إياك تجيب سيرة البهاوات والبشاوات صحاب عزبة المينا .. إقفل خاشمك يا واد محناش قد بشاوات مهربين المينا ده أحنا ماشيين جنب الحيطة وجوة الحيطة كمان وبنقول يا حيطة دارينا يا واد يا مفترى ورُكابنا بتخبط عـ الجيران ..

أقفل خاشمك يا واد ما تخلنيش أتكلم وأقول عـ البير وغطاه .. إقفل خاشمك يا واد وأسُكت يا لسانى ..

مش هوة ده نجم النجوم يا واد يا مفترى اللى عمل حركة تنقلات صورية للدليس على رئيس المصلحة الجديد قبل زيارته لدمياط عشان يحافظ على رجالته ويقوله نقلتهم على خلفية ضبط مباحث المينا لـ 45 حاوية فيهم ديناميت وألعاب نارية وشيش ألكترونية على إنها خردوات ورغم كل ده نقلهم فى أماكن حيوية أكثر نفوذ ..

مش هوة ده نجم النجوم يا واد يا مفترى اللى أعطى تعليماته بتعطيل العمل بساحة الحاويات رداً على نقل رئيس المصلحة لرجاله المُخلصين فى ضبط الشُغل مش هوة ده نجم النجوم يا واد يا أبو لسان زالف اللى كان دايماً يقولك معنديش وهوة عنده جوة وبانى غير الفيلا أتنين وغير الأرض أرضين بدمياط الجديدة .. مش هوة ده نجم النجوم اللى كان (أبو الأمجاد) بينفُوخلك فيه إنه قيادة إستراتيجية بالمهلبية وبيصلى على سجادة المينا وطلع فى الآخر أبو الأمجاد شريكه فى العزبة .

ولا أقولك على الزغلول الكبير بقى وأعرف بكل أفراد العزبة وأهمهم الموظف الكبير قوى أشرف . م أخطر موظف فى ميناء دمياط لأنه المتحكم فى كل أسعار السلع المستوردة وهوة نفسه أكبر تاجر قطع غيار سيارات وموتوسيكلات بمركز المنزلة ومدينة المنصورة دقهلية وله عدة محلات بيديرها أخوه هناك ولا أحكيلك على الموظف الكبير مجدى . د اللى بانى برج شهير بدمياط الجديدة وهوة نفسه اللى المستخلص عصام . س شارى مكتب عنده فى نفس برج دمياط الجديدة وشريك م الباطن معاه .. إقفل خاشمك يا واد خلينى ساكت بدل ما ننزل بالصور ونخليها بجلاجل !!

 

فقاطعنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وإستكمالاً للعوالم الخفية اللى بتحكيها معاليك أحب أعرفك إن فيه مجموع مستخلصين لهم السطوة الكبيرة فى المينا ومظبطين مع النجم الكبير ورجالته غير عصام السقا المحبوس على ذمة فضيحة الـ 45 حاوية إياهم واللى قلبوا الموازين فى المينا المنكوبة اللى ريحتها طلعت ..

وخد عندك كمان يا كبيرنا ناجى . ع مستخلص المواد الغذائية الملعوب فى أساسها ورضا . أ . س بتاع كله وسره باتع فى الأجهزة الكهربائية بأرخص الأسعار على حساب خزينة الدولة أما جمال . ش مستخلص الأدوات الصحية ده حكايته حكاية وعلاقته الوطيدة بصحاب العزبة وده اللى خلاه إحتكر شغل الأدوات الصحية على مستوى مصر بأرخص الأسعار عن أى ميناء فهرب مستوردوا الأدوات الصحية من مينائى بورسعيد والسخنة بالسويس لميناء دمياط لحساب المستخلص المذكور خلال عام 2017 وحتى منتصف 2018 (وإن كنتوا نسيتوا اللى جرا هاتو الشهادات تتقرا ) ..

أما باقى رجال العزبة فخد عندك على سبيل المثال لا الحصر ( الحلو ) مكافح التهريب بالمينا المنكوب وهو رجل المستخلصين المذكورين واللى بيبلغهم بأى بلاغ عليهم والعربى . ع . أ الترانزيتى اللى بياكل على كل الموائد وأى إدارة شمال هوة شاكب راكب فيها ده غير إن صحاب العزبة بيعدوه فى السر بعد فضح المستور ليكون بديل لـ ثروت . د الكوماندا الكبير بعد رحيله لتستمر السبوبة ..

أما بقى الزغلول الكبير على رأيك يا كبير هما دكاترة الحاسب الآلى واللعب اللى فى العلالى ودول أخطر العناصر على الإطلاق وهم محمد . ن وياسر . أ وأشرف . م ومحمد . ع وما أقولكشى على حواديت التلاعب بالأسعار والأصناف واللعب على كبير قوى فى البنود لصالح المستخلصين المذكورين أما بقى الأمين فبياخد أتاوة من كله آخرهم تليفونين من المستخلص عصام . س والحكمة فى دمياط بتقول إن اللى ملوش خير فى (أمين) ملوش خير فى مصر .

 

فلاحقت عسلية وقُلت له :

إقفل خاشمك يا واد يا مفترى ده كلام ما يتكتبشى فى جرايد ولا يتقال على مواقع ولا سوشيال ميديا .. ده كلام ما يتقالشى إلا فى الأماكن العليوي قوى وفى جهاز الكسب غير المشروع و(كلم الباشا عٍدل) ومن أين لك هذا يا مبقع ..!!

لساك شايل فى قلبك السواد يا واد يا اللى قلبك زى البُولاك وبتتكلم على أسيادك وأسياد المينا .. لساك شايل فى قلبك السواد يا واد وبتتكلم على مستخلصين المينا الشمال الناس الكُومل .. لساك شايل فى قلبك السواد يا واد وبتجيب سيرة صحاب العزبة الشُرفا شركاتهم فى السبوبة .. لساك شايل فى قلبك السواد يا واد وبتنبط على أكتر من 50 حاوية جايين فى المية ومشحونين م الصين والهند ده غير أكتر منهم جايين من أوروبا لنفس المستخلصين .. لساك شايل فى قلبك السواد يا واد وعاوز تفضح الشركات (أنوار طيبة وريفولى والوادى الأخضر وفوكس للإستيراد والتصدير) اللى جايبين حاويات خردوات وهيا فيها (ديناميت وألعاب نارية ومستحضرات تجميل محظورة ومنشطات جنسية وترامادول جنسى) وشعارهم (أمشى شمال يحتار عدوك فيك) ..

لساك شايل فى قلبك السواد يا واد وعاوز تفكرنى بالحاويتين بتوع شركة الوادى الأخضر اللى مباحث المخدرات جابتلهم إذن نيابة من ساعات عشان فيهم ترامادول جنسى وأتفاجئوا إن مباحث المينا عاملين عليهم إخبارية كمان .. وألا عاوزنى ما أنساش الحاوية الـ 20 قدم بتاعة المستخلص ناجى . ع اللى جاية من لبنان على إنها ورق شيكولاته ولقوها مليانة ألعاب نارية ومنشطات جنسية ..

لساك شايل فى قلبك السواد يا واد وعاوز تفهمنى إنك عارف بحاويتين قطع غيار الجرارات بتوع المستخلص محمد . أ . ع اللى مكتوبين فى الورق قطع غيار دراجات  وألا عاوزنى أحكيلك على حاويات الشيش الإلكترونية والسجاير ولا عاوزنى أحكيلك على الزغلول الأكبر بحبس مستخلصهم عصام . س الطفل المدلل لنجم النجوم 15 يوم بقرار من نيابة دمياط فى قضية جديدة وألا عاوزنى أقولك على عمال المينا بتوعه اللى باعوه للمباحث والجهات السيادية والرقابية .. إقفل خاشمك يا واد يا مفترى وسيب شوية للحلقات الجاية فى المفرمة الجمركية ..؟؟

اضف تعليق

مشاركتك بالتعليق تعنى أنك قرأت بروتوكول نشر التعليقات على موقع الانباء نيوز ، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من الانباء نيوز

الأكثر قراءة

ads

الأكثر تعليقاً

الانباء نيوز, الانباء, نيوز, موقع الانباء نيوز , الأنباء نيوز , جريدة الانباء نيوز , احمد فهمي الصحفي , الصحفي احمد فهمي