بكره وبس بيفصلنا عن شهر رمضان المعظم .. كل سنة وحضراتكم طيبين وسالمين وغانمين وفي طاعة دائمة لله عز وجل .. بالمناسبة دي أكيد لازم أحط التاتش بتاعي .. عايزة افكركوا وأفتكر معاكوا أجمل ذكريات واللي مبتختلفش من بيت لبيت كل البيوت كان لها نفس الريحة ونفس الطعم ونفس الطقوس وعشان كده تلاقي ذكرياتنا الرمضانية شبه بعضها كلنا بنشبه لبعض .. طبعا قبل حلول الشهر الكريم بإسبوع كنا بننزل نشتري كل طلبات البيت وكأن المحلات هتقفل في رمضان . ننزل بقي نشتري الخضار والبقول والفاكهة والعيش والزبادي اللي كان في طواجن فخار .. الله .. وبعدين نعدي علي خضر العطار اللي كان وقتها أكبر محل وحاجة أبهة كده ونشتري منه الياميش قمر الدين والمشمشية والقراصيا والتين والبلح ونيجي بقي عالمكسرات إيشي بندق وإيشي فستق وعين جمل ولوز وحاجة فخمة كده كان إسمها بيكان الله يرحمه بقي ..
طبعا كانت المكسرات بقشرها مكانش وقتها فيه شغل الدلع والمكسرات الجاهزة عالأكل بدون قشر لاااا طبعا دلوقتي ممكن يقبضوا علي اللي إشتري مكسرات هيعتقلوه ويعتبروه متمول من دولة أجنبية ومتآمر عالبلد وبعدين ندخل علي محل الفوانيس ونختار فانوس بشمعة او الفانوس الحديث بقي ذو التكنولوجيا العالية اللي بينور وجواه كتكتوت لونه أصفر .. ياوعدي .. مبقاش موجود الا فوانيس فيها ماكارينا والفوانيس السنة دي جعلوصة كده وكبيرة ودمها تقيل كانت أيام لها ريحة حلوة قوي لما كنا بنعمل الزينة مع الجيران عشان نعلقها في الشوارع كنا بنعملها ونلزقها ببعضها بمية ونشا اه والله السنة دي مفيش اي زينة في الشوارع ودي أول مرة تحصل من يوم ما وعيت عالدنيا ..
فاكرين لما كنا بنصوم ونشك في صيام أصحابنا ونقولهم طب طلع لسانك عشان نشوفه أبيض ولا لأ ؟ فاكرين ساعة الفطار وانطلاق مدفع الفطار لما كنا نشغل الرايو علي إذاعة الشرق الأوسط ونسمع المسلسل وبعدين ندخل علي البرنامج العام نسمع فزورة رمضان اللي بتقدمها آمال فهمي وبعد الفطار نفتح التليفزيون ونشوف فزورة نيللي الخاطبة او فطوطة او شيريهان ؟ كان زمان أيام الخير والبركة والعبادة كان الإعلام محترم بيساعدك علي الطاعة .. كنا نجيب جريدة الأهرام والأخبار عشان نشوف البروجرام للتليفزبون والراديو خلال ال 30 يوم .. تلاقي كل يوم التليفزيون يفتح الساعة 10 يقدم برامج اطفال وبرامج طبق اليوم والساعة 3 العصر كل يوم فيلم عربي وبعدها برامج دينية وتواشيح وبعدها قرأن المغرب ومدفع الافطار والفزورة ومسلسل عالقناة الأولي ومسلسل عالقناة التانية وبرنامج دوري النجوم ويا تليفزيون يا وفي السهرة فيلم من أفلام إنتاج التليفزيون وكانت كلها أفلام هادفة ولها معني كان بيبقي عندك وقت للصلاة طول اليوم والتراويح وقراءة القرأن الكريم وزيارة الأهل والأصدقاء .. كان فيه بركة ورحمة ومحبة .. كان فيه ف الحياة حبة بهجة . كان فيه أصلا حياة ..
دلوقتي كل العالم بيحاربك في صيامك مستخسرين فيك وعليك إنك تستأنس بالشهر الكريم الفضيل .. سباق هايل من المسلسلات سيل بل سيول من الدراما والبرامج وكل ألوان البعد عن ربنا .. كان زمان ممنوع نيللي او شيريهان يلبسوا في الفوازير أي فستان فوق الركبة وكان لازم يبقي فستان طويل او لو قصير ببقي تحته بنطلون .. دلوقتي أعمالنا الدرامية في رمضان سباق للعري والدعارة .. إنت مش ملاحق علي شياطين الإنس يا حضرت عشان شياطين الجن بيتسلسلوا لمدة 30 يوم تحس ان الدنيا كلها بتقولك إفطر وبلاش تصوم او صوم وإتعب وهنخسرك صيامك لو نزلت وإنت صايم عشان تروح شغلك لازم تربط إيدك وتحط بلاستر او حتي شيكارتون علي فمك عشان متضطرش تضرب او تشتم الناس اللي هيكسروا عليك او يخبطوا عربيتك او عشان متسبش وتلعن في الحكومة اللي مش ممهدة لك الطريق برغم الضرايب اللي بتدفعها .
ولو نزلت عشان تقضي مصلحة .. اوووووووه خد بالك الرشوة هتفسد الصيام ومفيش مصلحة هتتقضي من غير رشوة استقبل بقي يا عم .. ولو هتفضل في بيتك كافي خيرك شرك يبقي لازم تطفي التليفزيون والراديو كمان عشان هتشوف وتسمع حاجات هتخسرك صيامك .. ولو طفيت الراديو والتليفزيون ومنزلتش من بيتك ولا قضيت مصالحك … يبقي خد بالك .. اوعي تفكر في اللي بيحصل هنا .. اوعي تفكر في اللي بيحصلك من ”أعداء ” مجلس الشعب ولا من الحكومة ولا من الإعلام .. عشان بمجرد التفكير في كل ده هتبقي خسرت صيامك وعليك كفارة وتعويض اليوم .. عشان كده خليكوا هنا في خانة الذكريات وإفتكروا رمضان أيام زمان وتغاضوا عن أيامنا دي .. وفي كل الأحوال لكم مني كل التقدير والمودة وكل عام وحضراتكم جميعا بخير
