فاطمة مُندي تكتب لـ الأنباء نيوز : أخلاق الزومبي ؟!!

عن الأخلاق وأصولنا الشرقية حدث ولا حرج من ساعة ما الكاكاو بقي هوت شوكلت والبليلة بقت بينز والفشار بقي بوب كورن والملوخية بقت جرين سووب كله كوم والجرين سووب دى كوم لوحدها طبعا والقهاوي بقت كافيهات والقهوه نفسها بقت كوفي إيشي تركش وأميريكان و أسبرسو وكمان الحليب بقي ميلك ومن ساعة ما الكلسون بقي ليجن والبقسماط بقي باتون ساليه والفطير بقي أسمه كريب من ساعة ما العري بقي open mind والهدوم المقطعه بقت ستايل والمخدرات بقت روشنة وصياعة وكمان بقي عندنا Single mother و Single Father .

وبرضو علشان محدش يزعل ويبقى فيه مساواة من ساعة ما الراجل بقي مُز والبنت بقت رجوله من ساعة ما الوطنية بقت عماله والتدين بقي تخلف والعادات الشرقيه بقت بيئه و((السلام عليكم)) بقت بلدي من ساعة ما الخلافات بقت onLine والزعل بقي Block والطعمية بقت جرين بورجر green porger والضحك بقي إيموشن وكمان بقينا نكتب عربي بحروف إنجليزي وسميناه فرانكو من باب الروشنة ومن ساعة ما البني آدم بقى قيمته فـ لبسه ونوع موبايله مش فى أخلاقه وأحترامه من ساعة ما بقينا نحس بالوحدة في وسط أهالينا ومن ساعة ما القرايب بقوا عقارب والصحاب بقوا عرر وإحنا أتغيرنا أوي وبقينا عاملين زي الزومبي بالظبط ؟!!