عفوا أيها المواطن .. الوقت ليس لك والوطن ليس ملكك وثروات وكنوز بلدك ليست من مقتنياتك . من حقك فقط تنفيذ الأوامر والرضوخ لأولي الأمر شئت أم أبيت هذا هو قدرك وكل ذلك سيصب في مصلحتك أيها المواطن الملعون اللعين روح يا شيخ عليك اللعنة ده إنت اللي موقف عجلة الإنتاج بالخلفة اللي انت مش فالح إلا فيها .. أنا ؟ وهو أنا اللي قافل المصانع اللي ممكن تشغل آلاف الناس وتقضي عالبطالة ؟وهو أنا اللي عومت الجنيه وحررت سعر الصرف ومشددتش الرقابة عالأسواق والتجار وسايب الناس تموت م الجوع ويخبطوا راسهم ف الحيط ؟وهو انا السبب في خروج مصر من تصنيف التعليم ؟وهو انا اللي منعت الدواء ورفعت أسعاره 5 أضعاف ؟وهو أنا السبب في إنتشار الجرائم ولا أنا السبب في فشل التعليم والصحة والإستثمار والسياحة ؟وهو أنا اللي عملت كشك الفتوي ؟ولا أنا اللي عملت مطار النزهة الفاشل وهدرت ملايين من أموال الشعب ؟وهو أنا اللي فشلت في ملف سد إثبوبيا وهعطش المصريين ؟وهو أنا اللي صرفت 600 مليار دولار في 3 سنوات علي مشروعات في وقت قصير جدا مكانش لها أي لازمة ف الوقت الحالي اتسببت في خراب بيت الشعب ولطمته وبهدلته وكنا ف غني عنها وكان فيه بدائل كتير بس أنا حبيت أخلد إسمي وأدخل علي ميه بيضا عشان التاريخ يذكرني ؟
وهو أنا اللي كل يوم بعمل مؤتمر وأكلف الدولة تأمين وتوصيل وطعام وشراب وإحتفالات ف أي هتش والسلام ؟ أيوه إنت بعدم رضائك عن إرتفاع أسعار كل حاجة ف مصر وبعدم إقتناعك بمستشفيات ومدارس ومحاكم ومراحيض الدولة . إنت إيه فاكر نفسك إيه ؟ يكونش نفسك تبقي مواطن له حقوق وكده زيك زي أي مواطن في العالم ؟ لا يا بابا لا إنت هنا في حضرة الحكومة دي وقرارات وأوامر وفرامانات الحكومة دي عليك واجبات وفروض فقط وميجوزش أبدا تتململ ولا تتأوه ولا تتمرد علي أي أمر وإلا هتبقي خاين عربيد سفاح إرهابي خسيس وإن كان عاجبك بقي ولو مش عاجبك أهو عاجب شوية مواطنين خايفين نبقي سوريا والعراق وليبيا واليمن …
إلخ إحمد ربنا عالأمن والأمان يا أخي ومتكفرش بالنعمة وإوعك تقولي هو فين الأمن والأمان ما هو كل يوم فيه عمل إرهابي بيودي بحياة عشرات من المواطنين مش فارقة بقي عسكريين او مدنيين . طب وانت مالك يا أخي هو انت اللي مت ؟إنت حتي إتخدشت ؟ وإوعي تقولي ما هو اللي استشهدوا دول من أهلي وأقاربي وجيراني وأصحابي وأضعف الإيمان دول أهل بلدي . هرد عليك وأقولك خليك في حالك لما تموت والإرهاب يطولك إبقي إتكلم أتكلم إزاي ما انا هبقي ميت ؟ وهو إنت دلوقتي عايش ؟ …. لا .. أنا بموووووت
