تحقيقات وملفاتصحتك بالدنياعسلية
عسلية يفضحهم ويفك طلاسم علاقة ((العبيط)) بـ الفارسكورى ((الحويط)) ويفتح ((دكان شحاتة)) الوسيط ويحكى حواديت سبوبة الغمرى وبيع القضايا بميناء بورسعيد ومافيا نجم النجوم فى عزبة ميناء دمياط وحكايات المُهرب عباس الزفر الشهير بـ الساحر بميناء الأسكندرية
إتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه لأحد وأن نُقدم أيضاً خدمة وطنية صادقة للجهات السيادية والرقابية وأن نكون أيضاً وأيضاً عنوناً للحقيقة أمام الرأى العام المصرى لكنى كنت أكتشف مع نهاية كل حدوتة جديدة بالموانى المصرية أننا نحكى القشور والحقيقة مُفزعة .
حاولت أن أحكى لكم أهوال ما سمعت من عسلية لكنى أمام إصرار عسلية على اللت والعجن فى جلسات الشلت البحرية تركته يحكى لكم ويفضحهم ويفك طلاسم علاقة ((العبيط)) بـ الفارسكورى الحويط ويفتح ((دُكان شحاتة)) الوسيط ويحكى حواديت سبوبة الغمرى وبيع القضايا بميناء بورسعيد بالإضافة إلى مافيا نجم النجوم فى عزبة ميناء دمياط وحكايات عباس الزفر الشهير بالساحر والشيخ نصر الإرهابى بميناء الأسكندرية بالتفاصيل المُملة ..
فقال لى عسلية :
بُص يا باشا إحنا صحيح بنقول القشور بس عشان الجهات السيادية والرقابية تجيب كل اللى فى البطون والمستخبى والمبطون أصل الحواديت كتيرة والحكايات أكتر والمافيا واحدة وما أخبيش عليك يا كبيرنا إن الموضوع ريحته مفحفحة والأجهزة كلها مصحصحة والكلام وصل لأعلى المستويات قدام كل الجهات فى فك اللغز الكبير عن العلاقة المريبة لـ الدمياطى العبيط بـ الفارسكورى الحويط وإصرار وتصميم العبيط على حماية الفارسكورى الحويط ورغم التقارير العليوى وكلام الرأى العام السليط مازال يُصر العبيط على بقاء الحويط من أجل عيون ((البيج بوص)) الوسيط !!
فقاطعت عسلية وقُلت له :
ما تدخل فى الموضوع على طول يا واد يا أبو لسان زالف .. لساك بتلف وتدور على الدمياطى العبيط والفارسكورى الحويط بكلام محدش يفهمه م الخليج لـ المحيط .
مهو شىء طبيعى إن العبيط يُصر على الفارسكورى الحويط وأى فضيحة لـ الفارسكورى الحويط هيا هيا نفسها فضيحة كبيرة وفشل لـ العبيط وده السبب الظاهرى اللى بيتحجج بيه العبيط كُل ما الدُنيا عليه تشيط .
إنما السبب الباطنى والخفى هو السر اللى بيربط بين العبيط والفارسكورى الحويط واللى يعرف السر الخفى ده جهات عليوي فى المقام والصيت ؟؟
فلاحقنى عسلية وقاللى :
يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وتفهمها وهيا طايرة .. وعلى رأى بابا لما قالك : إن كل اللى أنت شايفه قُدام عينيك ده ((مُحاربة الفساد على الطريقة الحديثة)) يعنى إذاى تكون بتحارب الفساد بكل قسوة أمام شاشات الفضائيات والصحف والمواقع الألكترونية و((أنت أبو الفساد كُله)) !!
يعنى بإختصار إذاى قعدوا يصدعونا بالفارسكورى .. الشريف .. العفيف .. النضيف وإذاى هوة ورجالته مقطعين جيوب الناس بميناء دُمياط وما خُفى كان أعظم بميناء بورسعيد ؟؟
وإذاى قعد النجم الفارسكورى يقدم بلاغات فى ((جيمى النطاط)) ((المحبوس حالياً)) لكل الجهات ولما خلص من النطاط عمل اللى ما عملوش النطاط وريحته طلعت وفحفحت فى بورسعيد ودمياط ووصلت حتى لرئاسة الجمهورية ؟؟
فلاحقت عسلية وقُلت له :
إقفل خاشمك يا واد يا مفترى ده كلام ما ينفعشى يتكتب فى جرايد ولا يتقال على فيس بوك ولا تويتر ولا حتى مواقع ألكترونية .. ده كلام ما يتقالشى إلا ف الجهات العليوي قوى وجهاز الكسب غير المشروع ومن أين لك هذا يا مبقع ؟؟
إقفل خاشمك يا واد وما تفكرنيش بكلام بابا اللى قالهولى وأنا بأفطر معاه عالنجم الفارسكورى وحكايته مع العبيط وعصابة ((نطاط الحيط)) فى عزبة ميناء دمياط وعلى الموانى المُجاورة مراعاة فروق التوقيت التهريبى لمحاربة الفساد على الطريفة الحديثة وإذاى عامل فيها شريف وعفيف ونضيف قدام كل الجهات وبتحارب الفساد وأنت أفسد م الفساد نفسه !!
إقفل خاشمك يا واد وأسُكت يا لسانى : مش هوة ده الفارسكورى اللى ما رضاش ياكل عين الجمل السورى ورفض ياخد عربية كورى اللى صدعونا بيه وطلع بايع قضية عين الجمل لحسابه وبيركب عربيات كورى أو غير كورى وهوة ياكل مال النبى ويحلي بالصحابة .. لأ ومش إحنا بس !! دول صدعوا أجهزة البلد كلها بالفارسكورى الشريف .. العفيف .. النضيف .. وهوة مولعها نظمى رسمى هوة ورجالته فى عزبة ميناء دمياط وعلى الموانى المجاورة زى بورسعيد والسُخنة مُراعاة فروق التوقيت التهريبى يا واد يا مفترى يا اللى أتهموك إنك بتشوه صورة الناس الشرفا والعجيب إن ما طلعشى ولا واحد منهم شريف .
مش هوة ده الفارسكورى اللى عامل أخطر تنظيم إرهابى ومركبهم على كل المواقع القيادية بعزبة ميناء دمياط رغم المنع الأمنى .
مش هوة ده الفارسكورى اللى عامل تشكيل عصابى يعلمه القاصى والدانى وريحته طلعت وفحفحت ووصلت لأعلى الجهات فى مصر .
فقاطعنى عسلية وقاللى :
والله أنا مُحرج منك يا باشا بقى أنا جى أحكيلك ألاقيك أنت اللى بتحكيلى وتقوللى عالبير وغطاه وبمناسبة البير وغطاه وبمناسبة عصابة الفارسكورى بالعزبة أياها فأنا عندى خريطة كاملة لرجال الفارسكورى الحويط بميناء دمياط من أول ((ولى الله)) و ((البنا)) و ((موسى)) و ((الحسينى)) ودول بقى أذرعته وأيديه ورجليه الأساسيين ..
مروراً بـ ((الدلدول)) و ((المليخى الإخوانى)) ((بس ما تنساش تُحط النُقطة تحت)) بالإضافة لـ ((الجاسوس عبيد)) عصفورة النجم فى المُهمل والترانزيت ودول شغلتهم عالمدفع ((بولولووووم)) !!
وصولاً لـ ((بدر البدور)) و ((عب عاطى)) و ((سلامة فى خير)) و ((عنايات)) و ((يحى إبن موسى)) ((أعضاء الجماعة الإرهابية)) ..
بالإضافة لـ ((الأطرش الخطير)) مكافح التهريب و ((طأطأ)) العملياتى المكافح للتهريب بردو و ((وردة الأُلعوبان)) الشويط فى الصادر و ((نور اللعيب)) فى أى كارثة تهريبية تلاقيه ده غير ((أبو العربى الجوادى)) الترانزيتى اللى بياكل على كل الموائد وغالبيتهم متهمين فى كل ما هربه ((السقا شريك الفارسكورى)) من صواريخ وألعاب نارية وأدوية جنسية وحبوب مُخدرة واللى كان بيتفق معاهم يدخل كل الممنوعات والمحظورات على شركات ((ريفولى)) و ((أنوار طيبة)) و ((الوادى الأخضر)) و ((فوكس)) ده حتى السقا شهد عليهم كلهم وقال : (( كانوا بيقسموا معايا)) وقال كمان أنا اللى شطبطت فيلا الفارسكورى فى دمياط الجديدة أم 30 مليون جنيه ولا أقولك على اللى دفعه الداوودى والعدوى وهنداوى فى أرقام الحسابات ؟؟
فقاطعت عسلية مُجدداً وقلت له :
إقفل خاشمك يا واد يا اللى قلبك عامل زى البولاك .. لساك شايل فى قلبك السواد يا واد وبتجيب سيرة البهوات والبشوات بتوع عزبة ميناء دمياط دول صُحاب المينا وناس عليوى قوى يا واد يا مُفترى وتّبع الفارسكورى الكبير واللى بيحمى المافيا دى كلها العبيط اللى أتقدمتله تقارير كاملة عن النجم الفارسكورى وعصاباته فى الموانى من أكتر من شهر وهوة لا حس ولا خبر ومستنى الجهات الرقابية تمسكهم مُتلبسين عشان يتحرك .
إقفل خاشمك يا واد يا أبو قلب كله عتمة وعنين كلها ضلمة وأما تيجى تحكى عالإتفاقات والتربيطات يبقى تحكى صح وتدى العيش لخبازه ..
يعنى يا واد يا مفترى تحكى كل دول وتنسى اللى فى النُص .. إذاى تنسى ((الحُسينى)) اللى صابر على إتفاقه مع الفارسكورى من إنه متخصص التربيط والتظبيط مع الداوودى والعدوى وهنداوى والسبع وكل اللى عاوز يوصل للفارسكورى أو يتفق مع الفارسكورى لازم يعدى عالحسينى اللى صابر على ما بلاه النجم بيه ويظبطله الكلام ..
أما بقى لو بتنبط على الزغلول الكبير وبتتكلم عالدرويش المدروش فده سبحان ((العاطى)) وإسمه بقى ((الأس نمرة واحد)) و ((مشكوك فيه إنه خلايا نايمة تبع الجماعة الإرهابية)) وهوة شريك الفارسكورى فى تجارة الخشب الدروباك وعشان كده قام الفارسكورى بنقل ((صلاح السفاح)) عشان يمسك لجنة الخشب ويظبط الدرويش شريك الفارسكورى فى السبوبه ناهيك عن اللعب فى الأراضى والعقارات فى القاهرة الجديدة والرحاب ودمياط الجديدة وراس البر ودمياط البلد وبورسعيد وبورفؤاد ..
وكمان الدرويش الكبير كان القاسم المُشترك فى عمليات تهريب الآثار اللى ظهرت نعمتها على الفارسكورى والدرويش الكبير اللى أصلاً موظف حكومى تحت رئاسة الفارسكورى اللئيم وحدث ولا حرج عن شراء شاليهات وفلل جديدة بـ رأس البر ودمياط الجديدة ولا أقولك عـ الزغلول الأكبر فى شراكة الدرويش والنجم الفارسكورى مع ((السُنباطى المقاول)) بأمارة البُرج السكنى اللى بيتبنى بجوار مرور فارسكور وأسألوا ((راغب)) الموظف اللى ف مخازن دمياط الجديدة وبيشتغل سمسار من الباطن بعد الضهر بيبيع الشقة بكام فى بُرج مرور فارسكور ؟؟
فلاحقنى عسلية مرة آخرى وقاللى :
يا سلام عليك يا كبيرنا أنت مش صندوق أسود واحد بس أنت صناديق سودة متحركة وكتيبة وطنيين فى بعض والعصافير كلها تحت إيدك وإيديك طيلاهم كلهم وعشان كده لازم نكمل شلة الفارسكورى اللئيم فى ميناء بورسعيد من أول ((بهلول فى أستنبول)) وده شُغلته عالمدفع بلولوووووم بردو مهو كلمة فى سرك كل البهاليل القماحة اللى زيه فى كل الموانى شُغلتهم على المدافع فى الموانى بلولوووووم بردو .
أما اللهو الخفى اللى بيدير المينا من الباطن ((جُرعة أمل)) بيديها الفارسكورى يومياً وساعات كل خميس لـ ((بهلول)) وشركاه بالتعليمات وتظبيط التظابيط ومن الآخر فيه تنظيم حريمى بيدير المينا فى الخفاء بشكل فعلى بتعليمات من الفارسكورى من أول جرعة الأمل الرئيسية بميناء بورسعيد مروراً بـ ((نهلة بتاعة قضية سيستم المينا اللى تم مسحه بعد سرقته)) والمسكوت عنها ووصولأ لـ ((ماما نونا)) زعيمة الشلة والمتحكمة فى كل شىء بتعليمات من الفارسكورى الكبير صاحب العزبة .
وطبعاً ماما نونا ساندة ((عز بُقلظ)) و((عز بُقلظ)) ساند ((حمدى شكشك)) و((حمدى شكشك)) هوة اللى ساند ((مرمر)) خبير دفن القضايا ومنهم قضية الغمرى حوت السيارات .
بالإضافة إلى باقى أفراد عزبة الفارسكورى وعلى رأسهم ((المندوب السامى النُعمانى)) اللى بيظبط التظابيط فى قطع الغيار وهو المتحكم الرئيسى و((عب هادى)) مُجرد منظر ومركز إجتماعى وملوش فيها .
أما ((الجيزاوى) فدة المسلكاتى مسئول خروج أى حاوية ملعوب فى أساسها أو مضروب وزنها أو مضروب ورقها فى المنطقة الحرة زى حاويات مُعتز إبن بوحة اللى بيضرب وبيزور كل حاجة وفاتحها على البحرى هوة وفيجو وشاريين نُص بطايق البلد الإستيرادية .
وحدث ولا حرج يا باشا على حواديت ((حسن زعبولة)) و ((منة النبوية)) وكلمة السر : ((أصل النبوية الكبيرة ليها فضل عليا)) وظبط الكابوريا عشان ما تتحرقشى عالنار يا زعبولة بأمارة الـ 3 حاويات الموتوسكلات اللى كتبتهم دراجات عشان خاطر عيون الـ ((كابوريا)) قبل رمضان واللى كانت من ضمن الأُوكازيون اللى عملته بمناسبة عيد ميلادك الشهر الجاى وإستلامك الشُغلانة الجديدة فى المركز الجديد اللى أنت موعود بيها بواسطة الفارسكورى الكبير .
أما مستخلصين الفارسكورى بميناء بورسعيد فدول بقى معروفين بالأسم و ((التطبيل ليه ناسه وهما أساسه)) وكفاية تطبيلهم للنجومية وشركاه أثناء إفتتاح الفارسكورى للمركز الألكترونى الضعيف والذى لم يستكمل بعد فتطبيلهم يا باشا كان فج للرأى العام المينائى الغاضب حتى الآن عليهم وخسارة نقول أسمائهم يا باشا ويا نحلة لا تقرصينى ولا عايز أشوف خلقتك !!
فقاطعت عسلية مرةً آُخرى وقلت له :
إقفل خاشمك يا واد يا مُفترى ده كلام ما يتقالشى عالمفتشر كده .. ده كلام مكتوب فى تقارير عليوى قوى وواصلة لفوق قوى قوى يا واد يا غشيم ومنهم قضية الغمرى حوت السيارات اللى كشفت عن سبوبة بيع القضايا اللى وصلت لمئات الملايين من المال العام وده اللى جه فى تقرير شعبان عامر بالتفتيش من 74 صفحة وبيكشف على ضياع أكتر من 150 قضية بمئات الملايين المستحقة لخزينة الدولة يا واد يا مُفترى ولا الخزُوج يا واد تكون بتنبط عشان أفتح ((دُكان شحاتة)) وأحكى حكاية شحاتة وبنات شحاتة وبوتيكات بنات شحاتة بس أنا مليش فى الخبص ده يا واد وفيه جهات مُحترمة هيا اللى هتجيب كل حاجة رغم إن إحنا مصورينها .
بس أنا ممكن أفتح ((دُكان شحاتة)) ورجالة شحاتة فى القضايا اللى باعوها جهاراً نهاراً عياناً بياناً وطُظ فى الدولة وخزينة الدولة ومنهم قضية الغمرى حوت السيارات الهارب من مصر إلى دبى ثم إلى ألمانيا وشريك الوزير إياه وهو مكمن نفوذه وهوة اللى خلا الغمرى وقت القبض عليه العام الماضى لدفع 38 مليون جنيه مستحقة للدولة فى قضية مماثلة مقترنة بالتزوير واللى دفعهم وخرج بعد الطرمخة على القضية التانية اللى بـ 260 مليون جنيه واللى كانت مُستحقة وقت الإفراج عنه واللى بعد كده كانوا عاوزين يبوظوها .
وحاول الغمرى حوت السيارات تنويم القضية فى الأدراج على مدار أشهر طويلة عن طريق إتفاقه مع مرمر القانونى بوساطة المصرى المستخلص وحصل كلاً منهم على سيارات من معرض الإسماعيلية بأسماء آخرين وتم نقلة ملكيتها لهم بتوكيل وبعد ما ضاقت كل السُبل فى التنويم المغناطيسى للقضية وبعد أن قاموا بسرقة 4 شهادات يورو ون من الـ 17 شهادة المزورين ظناً منهم إن القضية خلاص هتدفن ويدفن كل شىء معاها وكمان يضمنوا بوظانها .
فأتفق الغمرى مع النجم الفارسكورى على حل بعمل شهادة يورو ون جديدة بالمنشأ من أوروبا بالمخالفة للقانون وسيقبلها بعد مرور أكثر من عام على ضبط القضية من قٍبل إحدى الجهات السيادية وتحريز الأوراق المزورة وشرعوا فعلاً فى قبول الأوراق المضروبة الجديدة التى كلفت الغمرى أكتر من مليون دولار بأوروبا وكان سيتم تحويل القضية المدفونة بالأدراج عند مرمر على أنها إختلاف مناشىء وتتحول من المادة 121 ((تهريب)) إلى المادة 114 من قانون الجمارك لتضيع مئات الملايين المُقدرة وكان الدور الرئيسى لـ ((دكان شحاتة)) فى ذلك بعد أرساله خطاب لميناء بورسعيد يشرح فيه إتفاقهم جميعاً برئاسة الفارسكورى على قبول الأوراق الجديدة المضروبة والتغاضى عن قضية التزوير والتغاضى أيضاً عن ملايين المال السايب بل والتغاضى عن كل الموظفين اللذين شاركوا فى تزوير وقبول مستندات شُحنة الغمرى من البداية وهو المستند المثبت على كل من شاركوا فيه من أول الفارسكورى ومروراً بدكان شحاتة ووصول لماما نونا وعز بُقلظ وحمدى شكشك وصولاً لـ مرمر القانونى وكان الوسيط فى تلك السبوبة المصرى صديق شقيق الغمرى فى أكبر رشة سيارات كيا سبورتاج ونيسان وهونداى فى تاريخ الموانى من أجل عدم دفع 260 مليون جنيه لخزينة الدولة .
ولما وصل مستند إدانتهم جميعاً لمسامع جهات سيادية وتم إحالة القضية لنيابة ميناء بورسعيد بتحريات رقابية عن كل اللى حصل من إتفاقات بين الغمرى وشقيقه وآخرين مع الفرسكورى ودُكان شحاتة ورجاله وحريمه بميناء بورسعيد ده غير تقرير شعبان عامر بتاع التفتيش عن بيع القضايا واللى بيتحقق فيها فى النيابة الإدارية كمان واللى من المؤكد إنه هيتحول لمحكمة تأديبية بالإضافة إنه من المؤكد إنها هتتحال كمان للنيابة العامة لإهدار الملايين من أموال الدولة بطريقة مُتعمدة إما بإخفاء القضايا لتّسقُط بمضى المدة أو تسويف القضايا وإضاعة المليارات فى كل الحالات ودى متورط فيها جيش طويل من الموظفين بميناء بورسعيد وأخرين .
فقاطعنى عسلية مجدداً وقاللى :
بُص يا باشا أنا أبصُملك بالعشرة أيدين ورجلين إنك مذاكرهم كويس وحافظ بيعملوا إيه مع إنك ما بتقولشى كل حاجة عشان فيه حاجات ما ينفعشى تتقال .
بس من غير ما أطول عليك ما ينفعشى نحكى كل ده وننسى نكمل باقى البوظان اللى فى الموانى المصرية وعلى رأسهم ميناء الإسكندرية اللى مسيطر عليه عصابة التنظيم التُركى واللى بتساعدهم عصابة كبيرة من الموظفين المعنيين بميناء الأسكندرية بقيادة المُهرب عباس الزفر الشهير بـ الساحر وتابعه الشيخ نصر الإرهابى واللى بيهربوا الملابس والطُرح والستاير المستوردة الصينى وبيفرجوا عنها على إنها تُركى عشان يستفيدوا من أعفاء الرسوم ضمن إتفاقية التجارة المصرية التركية .
لأ ومش كده وبس دول ما بيكتفوش إنهم بيتهربوا من رسوم خزينة الدولة .. لأ وما بيكتفوش إنهم بيفرجوا عن حاوياتهم مقفولة من غير ما تتفتش ولا حتى تتفتح .. لأ وكمان ما أكتفوش بكده دول بيحولوا فرق رسوم بالملايين للبضائع الصينى وبيحولوها لدولارات ويعيدوا تحويلها للبنوك وشركات الشحن التُركية على إنها فلوس الحاويات الصينى اللى خرجوها على إنها تركى لأ ومش كده وبس دول أحتكروا سوق المنسوجات وأشياء آخرى وما خفى كان أعظم .
