مولد وصاحبه غايب، زي ما بيقولوا كدة بقت وكالة من غير بواب… كل اللي عاوز يقول حاجة يطلع على قناة من اياهم يطُس الكلمتين وهوبا بقا نجم شباك، وحديث وسائل التواصل والقنوات خد عندك حصاد اليومين اللى فاتوا بس
شرين رضا غابت سنين طويلة وظهرت فجأة بأكتر من موضوع اكثرهم جدلاً رأيها فى صوت الآذان ووصفه بالجعير وقامت الدنيا ولم تقعد ( قد تكون اساءت الوصف واخطاءت فى التعبير )،، وخلاصة القول من وجهة نظرى التى لا قيمة لها من المفترض ان يكون المؤذن من اعذب الناس اصواتا وان تكون الميكروفونات فى حدود المعقول ومن اجل تأدية غرض معين وهو اعلام الناس بوقت الصلاة. ولكن أليس من الاحرى ان يتحدث اهل العلم فى هذا الموضوع.
ونجم الشباك الاول المدعو يوسف زيدان مؤخرا قال فى أحد البرامج الفضائية إن “المسجد الموجود فى مدينة القدس ليس هو المسجد الأقصى” وأضاف بـ “أن القدس ليس مكانًا مقدسًا”،خبر ايه يا جدعان هى البلد دى بقت سداح مداح كدة اللى عاوز يقول حاجة يقولها ولا ايه النظام
والواد ابن الفيشاوى اللي عامل فيلم الشيخ جاكسون فيه مشهد رقص جماعى في المسجد، وحساب القبر على الشاشة.
وقال ايه حرية التعبير والفن الراقي واي كلام في اي كلام.
وفتوة جديد فى المولد قال ايه… جابر عصفور… بيقول ايه ده كمان؟! اسمع يا سيدى :إن الطلب بأن يسن مجلس النواب قانونًا بمنع الإلحاد “مطلب غير دستورى”، وتقف ضده جميع الدساتير المصرية، موضحًا أن كل الدساتير فى العالم تنص على أن حرية الاعتقاد مكفولة لكل مواطن، حتى الإلحاد مكفول لكل مواطن مصرى وكل بلد بها دستور
لا يا راجل؟! بجد والله؟!؟
وعاوزين بعد كل ده الشباب يكون عنده انتماء لبلده ويحترم هويته ويعتز بتاريخه، طاب ازاى يا جدعان؟!ازاي والاعلام ونجومه بيشككوا فى وناصر والسادات ومبارك، الملك فاروق وعرابى وسعد زغلول، الخديوي اسماعيل،وصلاح الدين وعمروبن العاص… مش كدة وبس كمان فى التاريخ الفرعونى جملةً وتفصيلاً. كل الناس دي سيئة،، اومال مين الكويس وفين التاريخ ولا احنا كان بينضحك علينا.
ازاي عاوزين شباب واعى وانتوا عندكم اعلام داعر،،صحف تافهه اخبارها لزجة ومقززة، ومرتبات من دم الشعب، وتليفزيون فاشل ومرتبات من دم الشعب، وقنوات خاصة جميعها ضد الدولة ولا حياة لمن تنادي.
وعاوز بعد كل دة شباب عنده انتماء… يا اخى…….
