بسنت محمد تكتب لـ الأنباء نيوز : تغيير جلد البلد (مايكل جاكسون المصرى) الجزء الأول

تغيير الشكل الهرمي للمجتمع المصري .. منذ متي والي متي ؟
تعرف المشكلة فين ؟ في تغيير شكل المجتمع المصري وهويته .. تغيير نوعية المجتمع .. تغيير انسجته ..
انا بشبه اللي حصلنا باللي عمله مايكل جاكسون تمام لما حب يغير جلده .. غير لونه وشكله وبالتالي شخصيته مع انه لما كان اسود كان أرجل في اعتقادي ..

عندك مثال تاني لما حد يكون تخيين جداا وزنه فوق ال 150 كيلو مثلا بتلاقيه غالبا طيب ودمه خفيف وغير مبالي بما يحدث .. لو الشخص ده خس ووزنه وصل للوزن المثالي مثلا 80 كيلو وطوله 180 ده يبقي راجل مزز الصراحة بس هتلاقي دمه بقي تقيل وبقي تنك كده وشايف نفسه ومبقاش يحمل في قلبه الطيبة اللي كانت فيه ولا الرحمة اللي كانت في ضميره وعنيه ولا الصبر علي الغير وهتلاقيه بقي عصبي حبتين وده شيء غصب عنه لإن الخلايا الدهنية في جسمك بتحزن علي نفسها لما بتخس وبتسبب حالة اكتئاب للانسان وشوية انطواء وعزلة .
هو ده اللي حصل لينا كلنا لما شكل المجتمع المصري بشكل خاص اتغير ..
تعالي معايا اقولك ازاي .. تعالي بس متخافش ..

كان زمان الملك ملك .. والحاشية حاشية .. والتاجر تاجر . والإقطاعي إقطاعي والبرحوازي برجوازي والثري ثري والفقير فقير .. وبالمناسبة الطبقات العليا مكانتش بتهتم اهتمام كبير بالتعليم لان سنة واحدة بيدرسوها في مدارسهم الهاي كلاس بمقام 10 سنوات من مدارس العامة .. وكانوا بيعتمدوا علي الثقافة والثراء والاملاك والمناصب الكبيرة ..
كان زمان الخادم خادم _وبالمناسبة كان معظم الخدم والحشم من اليهود واليونانيين اللي احتلوا اماكن كتير وشغلوا وظايف عديدة في مصر وكانوا بيشكلوا دور مهم في شكل المجتمع وقتها _والبواب بواب والمكوجي مكوجي والطبيب طبيب وعلي اعلي مستوي من الخبرة والممارسة ..
كان الكاتب والمفكر والأديب والفيلسوف لهم شأن كبير وبيعقدوا الصالونات الأدبية المعروفة والندوات الثقافية . كانت الأم أم وبتعرف تربي العيال وتهنن جوزها وتشوف مصالح بيتها بدون اي كبر او ندية ..
كان الراجل راجل بيشتغل وبيتعب وبيجيب لقمة عيشه بالحلال وبيقدر يلاقي وقت كبير يقضيه مع زوجته واولاده
كانت الزيارات العائلية مقدسة ولها دور كبير في تنشئة الاجيال الجديدة وتربيتهم علي احترام وتقديس العائلة
كان كل حد عارف دوره ومقامه
كان كل واحد راضي بوزنه ولون جلده ..
كان المجتمع برغم الإحتلال والثورات والمناهضات الا انه كان مجتمع سليم نفسيا الي حد كبير .. كان مجتمع محترم متماسك نشيط مبتهج ..
بعد العصر الملكي جه العصر الناصري واللي اتغيرت بسببه نوعية المجتمع المصري وانا هنا مش بتكلم عن مساويء او سلبيات العصر الناصري .. انا بتكلم عن شكل المجتمع المصري وتغيرات كتير طرأت عليه غيرته وبدلته ..
عصر ناصر غير الجلد المصري وابتدت الندية في الظهور والمطالبة بالمساواة بين طبقات الشعب اللي معنديش اي اعتراض عليها .. وبرضو مش بصدد الحديث عن كل ده انا قصدي تغيير الشكل دون الدخول للجوهر ودون الخوض في تفاصيل انا في غني عنها ..
دلوقتي بقي تلاقي المرأة بتبوس ايد الخادمة عشان تلاقيلها يوم تيجي تساعدها فيه واصبحت الخادمات يعملن بالساعة اه والله ..
المكوجي اللي مبقاش مكوجي ده مركز تجميل للملابس مش ناقص الا انه يعمل فتلة للقميص والبنطلون .. بقي بالحجز
البواب بقي يتنك عليك ولو احتاجته وملقتهوش يقولك انا كنت ف شغل تاني لعمارة تانية اعترض بقي لو راجل ده غير ان اغلب البوابين بقوا اصحاب املاك وقدروا يبنوا العمارات والابراج وحصلت معايا من كذا سنة لقيت البواب بيعرض عليا شقة بالقسط وعرفت منه انها عمارته هو وهيكرمني في الاقساط .. بقي هاين عليا امسحله انا عربيته واحب علي إيده كل يوم ..