فى هذه الحلقة الرمضانية المميزة يقرأ عسلية الطالع ويوشوش الودع ويكشف المستور والمستخبى واللى جى واللى رايح وبالعربى الفصيح يحى لنا عسلية اللى ما بتتبلش فى بقه فوله أسرار ما وراء الأسوار الجمركية من أهوال وكما قلنا من قبل أن الموضوع ليس بجمارك بورسعيد فقط بل أنه صورة مصغرة وكربونية لما يحدث بكافة الموانى وحاصة موانىء الدخيلة والعين السخنة ودمياط .. حاولت أن أحكى لكم لكنى أمام إصرار عسلية على اللت والعجن تركته يحكى لكم الخفايا بالتفاصيل المملة .
فقال لى عسلية :
الحكاية فيها أسرار كتير وحواديت ياما والليلة أنا حأولع الفتيل الأولانى هوة صحيح أحنا بنقول القشور عشان الجهات الرقابية تجيب كل اللى فى البطون والمستخبى والطالع عن على بابا والسبعين حرامى وجاسوس بجمارك بورسعيد وبما إنه جاسوس واحد نتكلم الأول عالجاسوس مع إنه مش لواحده ده بيدير شبكة المهم ما طولشى عليك يا كبيرنا بعد نّطورة كلام جاى من فوق إن مدير عام بجمارك بورسعيد بيشتغل عميل جمركى عند شركة فيليب موريس وبيبعتلهم تقارير أسبوعية عن حركة تداول الحاويات وأى مستندات وبيانات جمركية توصله مقابل راتب كبير يحصل عليه من مكتب الديب وكيل الشركة بالقاهرة وده غير شبكة كبيرة هوة اللى بيديرها بأكتر من مينا وعلاقاته المريبة مع جميع مهربى السجائر المسرطنة فى مصر .
فقاطعت عسلية وقلت له :
إقفل خاشمك يا واد يا مفترى وأوعى تجيب سيرة الحكاية دى لحد الحيطان ليها ودان ما تزعلشى مننا اللى يسوى وما يسواش .. إقفل خاشمك يا واد وما تجيبشى سيرة فليب موريس واللى بيحصل لحساب فيليب موريس فى بورسعيد إقفل خاشمك يا واد وأسكت يا لسانى وما تخلنيش أحكيلك حكاية كاشف الفساد أكبر فاسد فى جمارك بورسعيد زى ما قولتلك من شهرين وأنا كلامى ما ينزلشى الأرض أبدا” أصل الموضوع قديم من أيام ما شاط المحترم طارق غانم م المكافحة وركب عالكراسى وهات يا مصالح مع مافيا السجاير والشكلة اللى كانت بينه وبين أيمن الله يرحمه كانت شكلة عالزباين مهى أصل كانت ميغة فوضى أياميها على رأى بابا كان بيمسك واحدة ويعدى خمسين مع عصابة المستخلصين إياها اللى هوة عامل إنه ضدهم وخاصة علاقته بالطفل المدلل لكامل أبوعلى شريك إبنه فى حاويات الصواريخ والبرشام .. إقفل خاشمك يا واد وأسكت يا لسانى وما تحكيش عن علاقة كاشف الفساد المريبة برجل الأعمال إيهاب يوسف صاحب توكيل رسك ترى أحد توكيلات السجائر العالمية فى مصر وسفره معاه ألمانيا وسويسر وأمريكا لحضور مؤتمرات وندوات جمركية برفقة قيادات جمركية بطريقة سرية خلال سنوات الفوضى وحتى الآن واللى تم الكشف عنها خلال السنتين اللى فاتوا وبعد بقى مش عملياتى سعى من موقعه الجديد لمواصلة عمله بإخلاص لصالح جهات غير معلومة .
فلاحقنى عسلية وقاللى :
يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وده بالناسبة للجاسوس وقال إيه كاشف الفساد !؟ أما بقى من ناحية السبعين حرامى وعلى بابا بتعاهم فخد عندك على راس القايمة حسن زعبولة من أيام ماكان بمجمع المنطقة الخرة في سنوات الفوضى وكان مشارك عبد الغني وكانوا من مؤسسى الفوضى ومساعدي المهربين فى كل العمليات القذرة اللى حصلت من 2011 وحتى 2013 وهما اللي عملوا غالبية أسامى الخطرين الحقيقيين ياباشا وبعد ماريحتهم طلعت وفحفحت وخربوها فى المنطقة الحرة قاموا موديين زعبولة المطور خارجى وعبد الغني شرق التفريعة بعد ماعملوا ثروة طائلة محدش أتكلم عليها عشان ما يجيش أسماء كوبارات الجمرك أياميها وعلى راسهم الويشى …
وأكمل عسلية
قام زعبولة يا باشا مكفهوش اللي عمله في المنطقه الحرة وأول ماراح المطور خارجي قام ضارب أسافين في زمايله زمول زمول وبالذات في شغل الأحذية والمنتجات الجلدية ونجح في خطته وعملوا لجنة ملاكي للأحذية يقودها حسن زعبوله والمرآة الحديدية وشريف رشوان المتمن وإيهاب كامل ومحمد خالد وأبتدا اللعب ياباشا من جديد وبقي زى مابيقولوا فى الأمثال : الورق ورقنا والدفاتر دفاترنا والأسعار أسعارنا والتحمير والتشمير بقى على ودنه وبقدرة قادر بقي رئيس المطور خارجى رغم ان مش من حقه وفيه اللى أكفأ منه وأنزه منه بكثير بس تقول لمين وتعيد لمين ؟ أما المجمع في عهده بقى سداح مداح لكل من هب ودب واللعب في البنود وذي ماانت عارف وقولتلك كتير إن المهربين بيكشفوا لنفسهم ويكتبوا اللي هما عايزينه ويحمروا ويشمروا ويكتبوا على الكمبيوتر بالمجمع بنفسهم ويخرج الشغل كأنك بتطير حمام من الأبواب الجمركيه والبركة في وزعبوله القلة وسلملى على أشرف …
فلاحقت عسلية وقلت له :
إقفل خاشمك يا واد يا أبو لسان زالف ما يجيبشى سيرة زعبولة وتاريخ زعبولة إقفل خاشمك يا واد ده كلام ما ينفعشى يتكتب فى جرايد ده كلام ما يتقالشى إلا فى جهاز الكسب غير المشروع ومن أين لك هذا يا مبقع !؟ .. إقفل خاشمك يا واد أصل ده الزواج الكاثوليكى اللى قولتلك عليه وما أقولكشى بقى على زعبولة الشرع الجمركى بتاعهم محلله عشرة يعنى ممكن تلاقيه متجوز أشرف عرفى ومتجوز زيزو نظمى رسمى زى ما الشيخ ناصر الإخوانى متجوز إسلام جواز مسيار .. إقفل خاشمك يا واد وأسكت يا لسانى ما تخلنيش أحكيلك عالزغلول الكبير فى حكاية بيع الباسوور الخاص بالحاسب الآلى عن طريق متمنين زعبولة أما ماجدة وأبوسير هما مهندسين الصفقة القذرة من الأول مع شمشرجى نقيب المستخلصين فى 56 شهادة جمركية تم ضبطهم لغاية دلوقتى ومازال البحث جارى عن باقى الشهادات الجمركية خلال الأعوام الثلاثة الماضية ويجعله عامر .
فقاطعنى عسلية وقاللى :
والله أنا مكسوف منك ومش عارف أقولك إيه .. بقى أنا جى أحكيلك ألاقيك أنت اللى بتحكيلى عالمستخبى والمستور .. أقولك إيه ولا إيه بس يا كبيرنا اللهم إما إنى صايم والله يجازيك يا شوشو .. أقولك عاللى بيحصل فى جمارك بورسعيد من أول ساحة الإسكراب وما أدراك ما ساحة الإسكراب فى كشف حاويات قطع غيار السيارات المستعملة برسم الوارد مع كشف حاويات المنطقة الحرة وكلهم أسرة مع بعضيهم وزيتنا فى دقيقنا .. ولا أقولك على ضرب الموازين والأعداد العلنى اللى بيتم فى ساحة الصفا والمروة ولا أقولك على الإستمارة الدوارة فى مخزن 274 ولا أقولك على اللعب اللى فى الصادر وسلملى عالصادر المحلى واللى بيحصل فى الصادر المحلى ولا أقولك على الحريقة اللى فى المستودع العام .. أقولك يا باشا : أحنا لينا الجنة …!!!؟؟؟؟
فقاطعت عسلية بحدة وقلت له :
لساك شايل فى قلبك السواد يا واد يا اللى قلبك عامل زى البولاك .. لساك شايل السواد فى قلبك يا واد يا مفترى وبتتكلم على ساحة الإسكراب واللى بيحصل فى ساحة الإسكراب اللى مكتوب عليها ممنوع الإقتراب والتصوير والملايين اليومية التى يتم إهدارها لعدم كتابة أصناف بالجملة بل وخرج غالبية الأصناف المحضورة برسم الوارد على أنها منطقة حرة ده بالإضافة للكاوتش المستعمل المحظور واللى بيحصل فى الكاوتش المستعمل .. إقفل خاشمك يا واد ما توديناش فى داهية وتزعل مننا البهوات واليشوات .. لساك شايل فى قلبك السواد يا واد وبتتكلم على ضرب الموازين والأعداد العلنى فى الصفا والمروة هو سلو الساحة كدة يا واد والكلام ده ’عرف من سنين .. إقفل خاشمك يا واد وسوكمون بوكمون على موضوع الإستمارة الدوارة اللى دايرة على ودنة فى مخزن 274 الجمركى والتركى اللى بيتمن صينى .. لساك شايل فى قلبك السواد يا واد وبتتكلم على اللعب فى الصادر المحلى والحريقة اللى فى المستودع العام ولا عاوزنى أطرطش بالكلام وأقول إن الأموال العامة تستدعى الجبرونى بتاع البربونى والواد صالح بتاع المصالح وسالم بتاع السلالم وعواد اللى باع المستودع العام والولاد .. إقفل خاشمك يا واد يا مفترى وسيب شوية للحلقات الجاية .
