مصر دولة مدنية .. متفقين ؟ طالما فيها سياحة وسياحتها مش دينية زي السعودية مثلاً ..تبقي دولة مدنية بيعيش فيها مواطنين بجميع أشكالهم وأجناسهم وألوانهم ودياناتهم دون التفريق بينهم في الحقوق والواجبات متفقين ؟ سيبك من الدستور اللي بينص علي مدنية مصر وعلي النهي عن إنشاء أحزاب تقوم علي أساس ديني وعلي إنه لا فرق بين مسلم ومسيحي داخل الدولة وعلي إنه يحق بناء الكنائس في مصر ..
سيبك من كل الهتش ده عشان هما خرقوا الدستور وخرموا القانون وعفرتوا كل النصوص اللي أكدت علي مدنية مصر وأكدت علي حاجات تانية كتير أنا وإنتوا عارفينها ومش وقت اللت والعجن فيها متفقين ؟ خلينا بقي في كلام سيادة الرئيس اللي أمر وأمره غير نافذ بتجديد الخطاب الديني والظاهر إن مقصد الرئيس غير مفهم إدارة الدولة يعني اللي فهموه غير اللي الريس بيقصده إلا إذا كانوا فاهمين صح وإحنا اللي فهمنا غلط .. ربما !
الريس قال نجدد الخطاب الديني واللي فهمته أنا و90% من الشعب المصري إننا ننقح الأحاديث وكتب العقيدة والفقه والسنة ونتجاوز عن أحاديث القتل والحدود واللي كان لها وقتها أيام رسولنا الكريم ونتعامل بالمعني الحقيقي للدين الإسلامي السمح ونوضح تفسير آيات الجهاد والقتل والقصاص ونبين مين هما الكفار وأهل جهنم واللي تسببت في إنتشار الإرهاب في مصر بل والعالم كله عشان الأشرار فهموها غلط خصوصاً مع تغلغل وتغول الدين الوهابي المجرم اللي اتنقل لنا رويدا رويدا عن طريق شبه الجزيرة العربية اللي بقت المملكة السعودية اللي حصل بقي إننا لقينا إستئساد للوهابية بشكل مريب من وقت ما أعطي الرئيس أوامره بتجديد الخطاب الديني . نلاقي بقي تفجيرات للكنائس وقتل ابرياء بيتعبدوا لله وتهجير للمسيحيين وقتلهم في سيناء والصعيد علي الهوية وأخر الإبداعات والبدع هو كشك الفتوي في المترو .
حاجة تضحك حتي البكاء اه والله . يعني إيه تحط كشك وتقعد فيه 3 شيوخ من الأزهر في محطات المترو ويفتوا ف الناس ؟ انت هنا بتأكد علي وهابية مصر ؟ طب هل من حق المواطنين المسيحيين يطالبوا بكشك يكون فيه قساوسة وباباوات ويقدموا فيه صكوك الغفران بعد الإعتراف ؟ سؤال أخير . هل يجوز للمسلم ان ينزل في محطة مار جرجس ؟ إنها سنوات العبث
