انا عايزة اللي يقرأ الكلام ده يقرأه بتأني وتريث وحكمة .. انا مفيش علي صفحتي الا المثقفين القارئين المتفتحين والمتطلعين .. وعشان كده مش هأحمل همهم . هأحمل هم اللي بيقرأ البوست وهو مش من اصدقاء صفحتى على الفيس بوك .. بالعقل كده .. افكارك بتجذب لك اقدارك بشكل او بأخر ” مش عايزة تعصب ديني ولا فكري ” افكارك وافكار غيرك ممكن جدا تشكل مصيرك وواقعك ومستقبلك .. وإما تجلب لك الخير والرخاء والسخاء والرغد والصحة والسعادة .. او تجلب لك سوء الحظ والمرض والفقر والإكتئاب .. إلخ ..
والأفكار بتيجي منين ؟ من التفكير ف الأحداث المحيطة .. تعالي معايا هنا .. اه هنا .. لو كل يوم خليتك تتفرج علي فيلم دموي مرعب او أكشن عالي قوي .. لمدة اسبوع او احد افلام الزومبي .. مؤكد وبدون نقاش هتحلم به ولو مرة خلال الاسبوع ومؤكد هتفتكر اثناء اليوم مشاهد من الفيلم .. طيب لو كل يوم خليتك تقرا ف الجرائد عن حوادث الطريق .. وخليتك تشوف افلام عن نفس الحوادث دي وقعدت مع ناس مروا بالتجربة او شاهدوها .. صدقني انت هتتوتر وانت سايق العربية واحتمال كبيير تعمل حادث طريق انت كمان .. نفس الحكاية دي بتحصل معانا جميعاً واحنا مش حاسين . طبعا كل حد فينا عنده يقين ان المقدر والمكتوب لازم هنشوفه . وان الصحة والمرض بيد الله .. لكن .. اعلانات القنوات عن مرضي السرطان سواء مستشفي 57 او بهية او اعلانات عن مستشفي مجدي يعقوب او مرضي فيروس سي او الروماتويد او … او … كل دي بتؤثر تأثير سلبي جدا علي الاصحاء وبتتسبب بشكل او بأخر بزيادة اعداد المرضي المغناطيس يجذب اشباهه .
احنا كلنا عندنا في اجسامنا الخلايا السرطانية لكنها كامنة وليست نشيطة بفضل الله .. بتنشط لعدة نتائج منها الحالة النفسية .. واللي بيحصل ده بيخلينا كلنا حاسين اننا مصابين بالمرض وبرغم ان الهدف نبيل للتبرع للمستشفيات الا ان نتائجه وخيمة وكارثية .. مينفعش اقلب كل القنوات الفضائية وانام واقوم علي كلمة سرطان .. حتي الاذاعة مسلمتش من نوعية الاعلانات دي .. رفقا بنا .. كلنا عندنا مشاكل كبيرة وكل حد يادوبك قادر يشيل مشاكله . مش طالبة ابدا تزودوا همومنا وترعبونا وتشككونا ف نفسنا .. حتي المرضي نفسهم انتوا بتزيدوا توترهم وقلقهم .. رفقا بالمرضي والأصحاء .. رفقا بأعصابنا وكفاية جذب للمرض اللعين ده ..
