باسنت محمد تكتب لـ الأنباء نيوز : سياسة الأرض المحروقة واللعب من ورا ضهر الشعب !!

كنت بنادي بتفعيل سياسة الأرض المحروقة في سيناء لدحر الإرهاب المستعر هناك .. لكننا كبرنا يا أمي وفهمنا انها ليست السبيل الذي نسير عليه ليرشدنا ويهدينا للقضاء علي دواعش سيناء .. الحقيقة لما قرأت أكتر في الأحداث عرفت وتيقنت أنه لا يفل الحديد إلا الحديد وما حك جلدك مثل ظفرك فتولي انت جميع أمرك وإذا قصدت حاجة فإقصد لمعترف بقدرك .. واللي هيعرف يدافع عن أرض سيناء زيه زي الجيش ويمكن أكتر بكتير هم بدو سيناء وأهلها لأنهم عارفين طبيعة الأرض والمخابيء والملاجيء والأنفاق وكمان عارفين الخونة اللي ف وسطهم واللي بيأووا إرهابيين او بيمهدوا لهم سبل الوصول لجنودنا وقتلهم .. بالمناسبة للي ميعرفش سياسة الأرض المحروقة هي عبارة عن حرق أي شيء ممكن يستفيد منه العدو زي الزرع والأرض والمعدات والأنفاق والمواصلات وده بيكون إما في أرضك انت او في أرض العدو .. وده حصل في مصر لما بريطانيا زرعت الألغام في كل منطقة العلمين منعا لوصول القوات الألمانية إليها وراح ضحية الألغام مئات بل ألاف من الأرواح حتي أغلقتها مصر وجعلتها منطقة غير آمنة لحد وقت قريب ..

مع العلم انه نصت المادة رقم ( 54 ) من البروتوكول الأول والخاصة باتفاقية جنيف سنة 1997 م على منع العمليات التدميرية من إحراق أو تفجير أو تسميم مياه الشرب أو ردم الأبار أو إحراق المحاصيل الزراعية أو قتل الماشية والحيوانات أو تدمير وحرق المون الغذائية أو عمليات التلغيم والتفخيخ للأراضي لأن كل ده يؤثر على شكل الحياة البشرية و إذا كانت الأراضي دي موجودة في نطاق سكان مدنيين هيتعرضوا للهلاك مهما كانت الدوافع أو الأبعاد .. وبرغم ده بلاد كتير إستخدمت سياسة الأرض المحروقة .. انت ليه تدفع أكتر لما ممكن تدفع أقل ؟ مّلك أهل سيناء أراضيهم اللي عايشين عليها وبيزرعوها وبيقتاتوا منها وهما أول ناس هيشعروا بالإنتماء والوطنية ويحاربوا للحفاظ علي أرضهم وبيوتهم ومكنتهم .. ومتقوليش بحسب اتفاقنا مع إسرائيل وكامب ديفيد مينفعش نملك الأهالي أي أرض لا انت كُفؤ وقادر وتقدر تتصرف بكل سهولة ومرونة ولباقة وكياسة وإسرائيل اصبحت صديقة عزيزة وجارة جميلة ومؤدبة هتوافق علطول ..

إلا إذا بقي كان فيه إتفاق تاني لا سمح الله بيحصل من ورا ضهر الشعب هيقصم ضهره ويكسر قامته وهيبته وقيمته .. أصل أهل الشر مطلعين إشاعات كتير منهم لله هما وقطر وتركيا اللي بيمولوهم وبيقولوا ان كل اللي بيحصل في سيناء مقصود .. اقصد يعني عدم القضاء عالإرهاب بسرعة كما وعدنا سيادة الرئيس .. مقصود ليه بقي ؟ قال إيه دي كده والعياذ بالله إسمها صفقة القرن .. اللي هي نهجر أهل سيناء ونحرق الأرض وبعد شوية وبالتزامن مع الحصار المعمول في غزة اليومين دول ينزح كام غزاوي علي سيناء ويوم ورا يوم يسكنوها ويحطوا إيدهم عليها ويبقي الوضع كما هو عليه إلي أبد الأبدين .. خصوصا مع خروج وظهور مقالات عبر الجرائد وتنويهات عبر الإعلام عن ضرورة تهجير أهل سيناء ومنهم المحامي خالد أبو بكر اللي قالك هما ساعتين زمن نهجر اهل سيناء ونقضي عالارهاب ويرجعوا تاني معززين مكرمين .. أكيد كان يقصد ساعتين ألماظ 90 قيراط .. طب ما انت كده هتدخل الدواعش من إسماعيلية والسويس والقاهرة هتلاحق عليهم إزاي يا إكسلانس ؟ اللي عنده حل تاني للقضاء عالإرهاب ياريت يشرفنا بتعليق ومن بعض نستفيد .. حاكم موضوع إرهاب سيناء ده طول بزيادة مش معقول جيش مصر العظيم مش قادر علي شوية خبؤات بكل أسلحته الفتاكة واللي ضحينا بلقمتنا وكسوتنا ودفعنا من جيوبنا عشان نشتري أحدث الأسلحة ده كده هتخلونا نحس ان فلوسنا حرام ولا إيه ؟