وزير الدفاع الإيرانى أتهبل يا مينززز .. وقالها كده يا مينززز . ايه اللي حصل ؟ اصله هدد السعودية تهديد مباشر انه هيدكها كلها ومش هيخلي فيها إلا مكة والمدينة .. وبنظرة سريعة علي طبيعة العلاقات بين السعودية وإيران هنلاقي ان علاقتهم متوترة من سنوات طويلة وكان فيه قطع للعلاقات الدبلوماسية بين البلدين من سنة 43 بسبب إعدام السلطات السعودية احد الحجاج الإيرانيين وحصل قطيعة تقطع اعداء مصر بين البلدين تاني سنة 87 بسبب وفاة اكتر من 400 ايراني اثناء الحج في صدامهم مع الشرطة السعودية فيما عرف بأحداث مكة وعادت العلاقات واتقطعت العلاقات في 2016 بعد الهجوم علي البعثات السعودية في ايران …
دى وصلت العداوة إن إيران عملت كعبة ليحج إليها الإيرانيون جوه إيران كيدا ونكاية في السعودية .. المجانين في نعيم بس الحقيقة ان ايران جار مشاكس لكل اللي عايشين جنبه .. جار لسانه طويل وايده طويلة وبلطجي ومعاه دايما نووي بيهدد به العالم وماشين في سكة هندمر أعدائنا ونهد المعبد علي أصدقاء أعدائنا يمكن تكون إيران مش عايزة تنسى مساعدة السعودية للعراق لوجستيا في حربهما وبرغم ان ايران اقحمت السعودية في الحرب رغما عنها لما ضربت ناقلات النفط السعودية في الخليج العربي وقتلت الدبلوماسيين السعوديين .. وايران هى العدو الذى لا يصفح ولا يغفر .
هيّ كده طبعها كده حد فاضي مفيش وراه حاجة سوي التستر بستار الدين .. هي حاملة لواء الشيعة ضد السنة في العالم وتقولي ليه كده اقولك معرفش .. ده فيه عشرات الآلاف من السعوديين الشيعة بيزوروا إيران سنوياً في مدينة مشهد و مدينة قم لزيارة ضريح الإمام الرضا و ضريح فاطمة بنت موسى الكاظم .
وفيه نص مليون ايرانى بيروحوا السعودية لأداء العمرة و100 ألف بيروحوا عشان الحج كل سنة .. طب ايه ياجماعة ما تصلوا عالنبي كده ما الامور حلوة والسياحة طيبة وبتدر ربح عالبلدين والدين لله والوطن لأمريكا مالكوا فيه ايه ؟ كل اللي فات لا يعنينا في شيء لكن اللي جاي هو اللي يخصنا .. ياتري دور وموقف مصر ايه لو وزير الدفاع الإيراني نفذ تهديده ؟ هنبقي مع روسيا .. ولا امريكا ؟ بوتن … ولا ترامب ؟ الفستان الأبيض .. ولا الإسود ؟ هضرب فنجان قهوتي وافكرررر ..
