زي اي انسان في العالم لما بيحتاج يشتري مستلزمات بيته بينزل يشتريها من اي هايبر او سوبر ماركت ويرجع سالم غانم او حتي باسنت .. المهم انه من المفترض انه بيرجع خسران شوية فلوس في مقابل بضاعة اشتراها . ده الطبيعي . خطوة ونص .. فرقت معايا امبارح ونقلتني من مرحلة الامان الي مرحلة الخطر ..
نزلت اشتري طلبات لبيتي واسرتي وخدت عربيتي برغم ان السوبر ماركت جنب بيتي عشان مبحبش امشي خطوة واحدة في الشارع تحسبا لأي معاكسة او مشاكسة او التعرض لسخافات بعض الناس .. دخلت المحل واشتريت وحاسبت ومسكت شنطة ايدي من ايدها الصغيرة وحطيتها تحت ذراعي وبكل احساس بالخطر وحدسي الداخلي اللي بيؤكد لي ان حد هيخطف شنطتي وفي اقل من ثانية تحقق احساسي ولقيت حد بكل قوة جاي من ورا ضهري بيشد شنطتي بكل قوة وبيقطعها بآلة حادة وخليكوا فاكرين اني ماسكة الشنطة من ايدها الصغيرة يعني ملاصقة لجسمي ولإيدي تماما يعني بكل سهولة ممكن يطعنني بسلاحة ..
ربنا ستر وكان بيجري ومعرفش ياخد شنطتي وهو جوه التوكتوك وطبعا معاه اتنين بلطجية غيره واحد بيسوق واتنين بيسرقوا . الشنطة كان فيها رخصة سيارتي ورخصة القيادة وكروت الفيزا والرقم القومي وموبايلاتي واوراق شخصية اخري وطبعا فلوسي .. لكم ان تتخيلوا كنت هعيش في مرار اسود لو كنت فقدت الاوراق دي .. هو انا مش بخير والحمد لله لان حصلي كدمة في ذراعي وورم في كل ايدي .. اما نفسيتي فحدث ولا حرج .. تحت الصفر ومن وقتها مدوقتش طعم النوم ومش حاسة بأي امان .. قفلت باب بيتي بالمفتاح والترباس وقفلت كل الشبابيك والظاهر انه جالي هسهس هيستمر معايا حبتين .
طب انا وربنا سترها معايا تعالوا نشوف ايه اللي حصل لجارتي من 4 ايام في نفس المكان .. كانت ماشية ومعاها بنتها الصغيرة الساعة 9 صباحا وجه موتوسيكل خطف الشنطة وهي تشد وهو يشد سحلها عالارض خرشمها كلها وش وضهر وراحت عالمستشفي وخد شنطتها اللي فيها اوراقها وفلوسها .. تعالي بقي ياغالي شوف ايه اللي حصل لجارنا .. جارنا العزيز اشتري عربية كيا سيراتو موديل 2017 فرحان بيها وخايف عليها جدا راح دخلها في الجراج حفاظا عليها وبيدفع للعروسة السيراتو 300 ج شهريا ايجار مكانها ف الجراج . قوم ايه ؟ ييجي راجل اول امبارح ماسك موبايل في ايده وبيتكلم فيه ادام سايس الجراج وبيقول بكل عصبية يلا بسرعة خرج العربية الكيا رقم كذا لفلان بك عشان عايزها حالا .. حاضر يا باشا هو هيخرجها اهو .. يلا انت مش سامع ولا ايه فلان بك معايا عالتليفون وبيقولك خرج العربية .. قوم السايس بكل سلاسة يفرط بالعربية بمفتاحها للراجل العصبي اللي افتكر انه من طرف فلان بك . بعد ساعة يظهر جارنا للسايس ويقوله خرجلي العربية ويتفاجيء انها خرجت واتسرقت والراجل جاتله جلطة وفـ المستشفي ..
انا لو حكيت عن اللي حصل في الشارع بتاعنا بس ممكن احتاج صفحات الموقع كله واحتكرها لحكاياتي وبرغم اني ساكنة في منطقة معروفة ومش عشوائية والمفروض ان سكانها ناس كلاس إلا اننا بنتعرض بشكل يومي للبلطجة والسرقة علي كل شكل ولون وروح اعمل بلاغ يا محترم وعيش ..
الغياب الأمني بقي واضح جداً .. البلطجة زادت والسرقة بقى لها اشكال كتير ترعب .. ارحمينا يا حكومة من سائقي التوكتوك وكفاية مسخرة لحد كده .. التوكتوك هو السبب في زيادة البلطجة والسرقة والإغتصاب والمخدرات والقتل في الشارع المصري وكأن القائمين علي الدولة متفقين معاهم عشان يخلصوا علينا وبعدين هما يبقوا يخلصوا عليهم بمعرفتهم .. فوقوا بقي عشان كده الحياة بأمان بقت مستحيلة وانتظروا ثورة جياع هتخلي الناس تاكل لحمنا نى .
