عن آية حجازي اتحدث ..
أية شابة مصرية من أم امريكية واب مصري اتعلمت ف امريكا وبشكل او بأخر نزلت التحرير وقت ثورة 25 يناير ومن هناك اتعرفت علي حسنين واتجوزته . ميهمناش كل ده .. تهمتها انها عملت جمعية بتجمع فيها اطفال الشوارع وكان مقرها شقة صغيرة جمعت فيها 20 طفل حسب ما يقال .. وبشكل او بأخر واختصاراً للهري اتقبض عليها بتهمة انها اجبرت العيال بخلع ملابسهم وممارسة الرزيلة وتصويرهم وتهديدهم عشان ينفذوا أوامرها هي واعضاء جمعية بلادي ..
انا بعترف جدا بالمثل اللي بيقول اذا كان اللي بيتكلم مجنون فالمستمع عاقل .. مينفعش اصدق كل حاجة بالجملة انا بصدق بالتفصيل تفصيلة تفصيلة .. لو فعلا اية اجبرت الاطفال اللي هما اصلا اطفال شوارع وبيعملوا كل الرزائل نهاراً جهاراً امام المارة عادي لو اجبرتهم علي فعل ما حرم الله وهددتهم عشان ينزلوا يخربوا في البلد دي تبقي بلد هزؤ اللي يخربها عشرين عيل يا جدع تبقي بلد هشة وملهاش اي لازمة لو شوية عيال قدروا يخربوها ويهدموها ناهيك بقي عن ان العيال دي ملهمش مبدأ ومعرفوش معني الحرام والعيب يعني مش صورهم عرايا هي اللي هتخدش حيائهم وتخليهم يخضعوا ويخشعوا ويركعوا امام تهديدات أية واتباعها .
انت ممكن تتهمها بإنها عملت جمعية بدون ترخيص واشهار وممكن تشك في تمويل الجمعية خصوصاً اننا عندنا ارتيكاريا من كلمة حقوق انسان ومن اي حد بيحمل جنسية مزدوجة .. لكن انك تشهد اطفال ميعرفوش الليل من النهار وهما اصلا قنابل موقوتة فـ البلد يبقي انت اخترت اكون انا المستمع العاقل وانت المتحدث المجنون .. يا محترم انا هنا مش بدافع عن أية لاني لا اعرفها ولا يلزمني معرفتها لكن واجب برضو اقول كلمتين حق خانقين قلبي وكاتمين علي صدري . لما القضاء المصري اصدر حكمه بتبرئة أية حجازي من أي تهمة موجهة اليها .. مين اللي هيحاسب علي 3 سنوات حبس احتياطي من عمرها ؟ مين صحيح وهو العمر فيه كام 3 سنوات يا أخي عشان تضيعهم وتقهر ناس انت ف الاخر برأتهم ؟
بلاش دي .. لما خرجت براءة واستعملت حقها الشرعي القانوني الانساني في عودتها لأمريكا حيث انها وطنها الثاني ورئيس امريكا بذاته ونفسه وعضمه ولحمه بعتلها طيارة مدنية تاخدها من مصر واستقبلها استقبال الملوك والرؤساء فـ البيت الأبيض .. انت هنا زعلان ليه ؟ ايه اللي مزعلك ؟ طب نرضيك ازاي قولي !! واحدة لقت الذل والهوان في بلدها وليها اكبر واعظم بلد علي وجه الارض بتستقبلها وبتكرمها تفتكر انها ترفض ؟ اذا كان رب العالمين جل وعلا اوصانا إننا لو مستضعفين ف الارض نمشي ونسيبها ونشوف مكان تاني يئوينا ويقوينا اعترض بقي علي كلام ربنا أعترض .
بص يا شريكي في الوطن .. انت اليومين دول متوتر وقلقان ومش مبسوط انا حاسة بيك والله .. انت عمال تلمها من هنا تلاقيها اتبعترت واتفكت من هنا تلمها بس انا وانت وهما وهن شايفين وعارفين وواثقين ان الامور ليست علي ما يرام .. انت وانا وطنين جدا وبزيادة كمان بس انا قررت اقول بعد سكوت طويل وقررت انتقد وقررت انطق بكلمة حق لعل وعسي صوتي يوصل وينصلح الحال لو حد خد بكلامي المتواضع لكن انت قررت تسكت وتكتم صرخاتك وآهاتك وده مش صح .. لا انا بكلامي خاينة للوطن ولا انت بسكوتك وطني بزيادة .. بس انا واللي زي حالاتي بنحاول ننفع القائمين علي الدولة بإننا بنشاور لهم علي مواضع الإخفاق عملا بالمثل اللي بيقول يابخت من بكاني وبكي عليا ولا ضحكنيش وضحك الناس عليا .. أية حجازي كانت صح لما سافرت امريكا ترامب كان صح لما استقبلها السيسي هيبقي صح لو وضح لنا الأمر بكل شفافية انا صح لأني بقول انت غلط لانك ساكت احنا فـ الاخر اتفقنا علي حب الوطن #بدون_هري
