دي بقي الربع كلمة قبل الأخيرة في موضوع ان الشعب منحوس لانه شعب جميل لذوذ حبوب وطيب وجدع وبندعي اننا ناخد حظ الوحشين هتلاقي الشعب ده دمه خفيف بزيادة .. مجرم عفريت عكروت كده .. يا إبن الذين ياشعب .. انت معندكش هنا حاجة اسمها ون واي .. انت عايش حياتك المرورية في طريق مزدوج حتي لو الطريق اتجاه واحد احنا اصلا بنعتبرها عنصرية واحنا شعب ديمقراطي بطبعه فبنكسر العنصرية دي عشان بنحب اللمة وتلاقي العربيات رايحة جاية في حتة حارة لا تسع الا موتوسيكل راكب واحد .
شعب بيحب الونس .. قوم ايه .. الدولة تعمل المطبات العكسية اللي تسمحلك تعدي من اتجاه واحد ولو مشيت عليها عكسي العجل هيفرقع .. هي ساعة زمن وكانت المطبات كلها انعم من ايدي اليمين .. متعرفش يا اخي العفاريت بتوع التكاتيك والميكروباص بططوها وسووها بالأرض ازاي ورجعت ريما لعادتها المشاغبة اللئيمة .. ومن هنا بقي تبص تلاقي ادارة المرور اسم الله عليهم بيدققوا معاك انت وبس يا سيد يا محترم .. وسايبين الحابل بالنابل يعني تروح تطلع شهادة المخالفات يا ابن بلدي تلاقي عليك مخالفات ملهاش عدد مع انك ممكن تكون رافع عربيتك وملمستش دريكسيونها من 3 سنوات وحصلت معايا انا شخصيا ودفعت المخالفات زي القطة مع ان التوقيت ده انا مكنتش موجودة ف البلد من اساسه ومحدش معاه مفتاح عربيتي غيري ..
ادارة مرور شقية حبتين المهم وانت بتدفع كل الضرايب والدمغات والشاي والقهوة والذي منه عشان تخلص الورق وبالمناسبة انت مجبر تدفع رشوة مش بخاطرك يعني وبتكون في حدود 100 جنيه وانت طالع ممكن توصل لألف جنيه مع ان ورقك جاهز وانت صاغ سليم ..
وانت بتدفع بقي كل ده تلاقي الشعب مكفهر ومفرهد وبقول الشعب عشان في ادارة المرور بيبقي الشعب كله موجود وممكن تعمل احصائيات وتتعامل لو انت موظف واهو منها شغل ومنها بتقضي مصلحة او تعمل بحث ميداني او تقييم وتصويت علي اي شيء حتي لو برنامج ذا فويس ما انت امام كل شرائح المجتمع وبأعداد غفيرة وفيرة غزيرة ياختي اخاف عليهم م الحسد ربنا يزيد ويبارك ..
واللي بييجي من افراد الشعب الساعة 8 صباحاً بيفضل موجود حتي الموعد الرسمي للانصراف . ليه ياعم ؟ هو كده من غير ليه يعجب ولا ميعجبشي ؟ اكيد بقي الشعب ده بيخرج من وحدة التراخيص مش طايق نفسه ولا طايق حتي ناموسة تعدي من جنبه ومن هنا بتحصل الحوادث والخناقات والحبشتكنات .. الشعب ده لازم يتهني بقي .. مطلوب من الدولة تفرفش الشعب !!
