باسنت محمد تكتب لـ الأنباء نيوز : (شبابيك باسنتية) على العالم الصهيوأمريكى (2)

اهلا بكم في ضيافتي لليوم الثاني علي التوالي .. انهارده هنشوف جزء من العالم .. شباكي بيبص عليه بحذر وتخفي .. اصل المنظر اللي هنشوفه مخيف حبتين وبينذر بصفارات حرب عالمية ثالثة قادمة لا محالة .. الشباك ده هتلاقي فيه إيران واللي بتسعي لإحياء الحضارة الفارسية وزعامة العالم .. وهنلاقي فيه تركيا اللي بتسعي لإحياء الدولة العثمانية وزعامة العالم الإسلامي ونسيت انها رجل اوربا المريض الذي لا يشفي ولا يموت .. وهنلاقي كمان شبه الجزيرة العربية واللي بقي اسمها السعودية واللي عايزة تحيي وتدعم وترسخ مباديء الوهابية وهتلاقيها هي وإيران بيتعاركوا كتير والأحوال بينهما مش ولابد ..

بس لازم ادخلكم معايا في غرفة المعلومات عن إيران .. اصل اللعب هيبقي معاها وعليها الفترة الجاية وخصوصاً بعد ما صرحت صحيفة الإندبندنت ان ترامب قال الحرب قادمة علي إيران لامحالة بعد إتفاق مريح بينه وبين ملك السعودية .. ايران عدد سكانها تقريبا 79 مليون نسمة ولها نظام حكم غريب شوية اسمه حكم الولي الفقيه . هي دولة اسلامية مذهبها الرئيسي الشيعي وميمنعش ان فيها بعض من اهل السنة واللي زاد عددهم الفترة دي وده اللي مخوف القادة في إيران ..

وعشان كده تواصل السلطات الإيرانية اضطهادها لأهل السنة، واللي آخرها حرمانهم من ممارسة طقوسهم الدينية فى أول أيام عيد الفطر المبارك العام الماضي وذلك بمنع إقامة صلاة العيد فى بعض المناطق بإيران وكانت أبرز هذه المساجد كان مسجد تهرانبارس بالعاصمة طهران، ومسجد صالحية بمدينة إسلامشهر .

دلوقتي إيران علي المحك من الحرب وهي مستعدة بكل ما أوتيت من قوة .. هتحارب السعودية في المقام الأول وهتهدها علي بعضها زي ما صرح وزير الدفاع الإيراني انه هيهد السعودية ولن يترك بها سوي مكة والمدينة .. وبنظرة سريعة علي طبيعة العلاقات بين السعودية وإيران هنلاقي ان علاقتهم متوترة من سنوات طويلة وكان فيه قطع للعلاقات الدبلوماسية بين البلدين من سنة 43 بسبب إعدام السلطات السعودية احد الحجاج الإيرانيين وحصل قطيعة تقطع اعداء مصر بين البلدين تاني سنة 87 بسبب وفاة اكتر من 400 ايراني اثناء الحج في صدامهم مع الشرطة السعودية فيما عرف بأحداث مكة وعادت العلاقات واتقطعت العلاقات في 2016 بعد الهجوم علي البعثات السعودية في ايران … ده وصلت العداوة ان إيران عملت كعبة ليحج إليها الإيرانيون جوه إيران كيدا ونكاية في السعودية ..

بس الحقيقة ان ايران جار مشاكس لكل اللي عايشين جنبه .. جار لسانه طويل وايده طويلة وبلطجي ومعاه دايما نووي بيهدد به العالم وماشين في سكة هندمر اعدائنا ونهد المعبد علي اصدقاء اعدائنا يمكن تكون ايران مش عايزة تنسي مساعدة السعودية للعراق لوجستيا في حربهما وبرغم ان ايران اقحمت السعودية في الحرب رغما عنها لما ضربت ناقلات النفط السعودية في الخليج العربي وقتلت الدبلوماسيين السعوديين .. وايران هي العدو الذي لا يصفح ولا يغفر . ده فيه عشرات الآلاف من السعوديين الشيعة بيزوروا إيران سنوياً في مدينة مشهد و مدينة قم لزيارة ضريح الإمام الرضا و ضريح فاطمة بنت موسى الكاظم .

وفيه نص مليون ايراني بيروحوا السعودية لأداء العمرة و100 ألف بيروحوا عشان الحج كل سنة .. طب ايه ياجماعة ما تصلوا عالنبي كده ما الامور حلوة والسياحة طيبة وبتدر ربح عالبلدين والدين لله والوطن لأمريكا مالكوا فيه ايه ؟ بعد لقاء ترامب بملك السعودية واتفاقهما علي النيل من إيران وتوعد ترامب بمحاربتها .. إيه اللي هيحصل ؟ كل اللي فات لا يعنينا في شيء لكن اللي جاي هو اللي يخصنا .. ياتري دور وموقف مصر ايه لو وزير الدفاع الإيراني نفذ تهديده ؟ هنبقي مع روسيا .. ولا امريكا ؟ بوتن … ولا ترامب ؟ الفستان الأبيض .. ولا الإسود ؟ هضرب فنجان قهوتي وأفكرررر ..!!