ساقتني الظروف الراهنة لمتابعة معتز مطر في حلقات برنامجه علي قناة الشرق المعارضة للدولة وطبعا كنت في البداية مستاءة جدا وغاضبة جدا جدا جدا وناديت لسنوات لغلق قنوات الشرق ومكملين وبالطبع عشان اقدر انتقد إنسان او برنامج لازم اتابعه … (وكمان لازم أتابع اللي بيعارضهم’) وتابعت بالمرة محمد ناصر وزوبع وهشام عبد الحميد وهشام عبد الله . في كل البرامج مشدنيش الا #معتز_مطر .. ثواني يا أفاضل أقروا الكلام للأخر عشان تفهموني ..
معتز مطر هو الوحيد اللي إتمنيت إنه يكون إعلامي في مصر لمهنيته الشديدة وتخصصه وموضوعيته فيما يعارضه وينتقده ويكرهه وحتي لو قلنا إنه قابض وممول وخاين وعميل ده كله لن ينفي مهنيته .. ليه ؟ لإنه عنده تحضير معتبر للمادة اللي بيقدمها وعنده لباقة وطلاقة لسان كان نفسي تبقي في مذيعين مصر وبالمرة خد عندك ولا حلقة تلفظ فيها بألفاظ نابية كما فعل اسم النبي لا حارسه ولا صاينه أحمد موسي .. ولا انتقاد او إعتراض صدروا منه وطلعوا غلط ده كل كلمة قالها طلعت صح حتي تنبأ بموضوع الـ 100 مليار دولار قبلها بكتير معتز مطر خسارة كبيرة كإعلامي انه يكون في دولة ضد مصر . أتمني يراجع نفسه وييجي مصر كمعارض وناقد لسياسة الدولة والحقيقة هو مش هيتعب ف التحضير لإن سياسة الدولة كلها فاشلة فشل ذريع ومكشوفة ومفضوحة للأعمي قبل البصير ..
بكل شفافية وموضوعية كنت أتمني معتز مطر يكون هنا حتي لو معارض .. ولو إني عارفة انه مش ممكن حد هيسمح له بالمعارضة عشان مبقاش عندنا معارضة بقي عندنا #تثبيت_الدولة و #فوبيا فرضت علينا وما أختارناها بأنفسنا وليس لها علاج اللي حصل ان كتير جدا اتجهوا لقنوات الإخوان اللي بتبث من خارج مصر فأصبحت هي الملجأ والملاذ بعد غلق كل برنامج معارض وقصف أقلام النقد وتكميم أفواه تقول الحق .. خوفا من المؤامرة والأشرار والمتربصين والخونة والعملاء والإرهابيين والفوضي اللي بيعملوا أحمد موسي وعمرو أديب وأماني الخياط ولميس الحديدي وأسامة كمال وغيرهم أفظع بكتير من اللي بيعملوا معتز مطر .. ليه ؟ لإننا مسبقا وسابقا إتهمنا مطر بالعمالة والخيانة والتمويل والجاسوسية طيب لو فرضنا جدلا صحة الإتهامات يبقي متوقع منه أي أكاذيب وخزعبلات ولو إنه بجد بيشرح الواقع المرير اللي عايشينه اما إعلام مصر والمفترض فيه النزاهة والشفافية فالمفترض إنه بيتسم بسمو الأخلاق والمهنية والموضوعية والحياد وده كله طبعا مش موجود إطلاقا .. رفقا بأنفسكم وعودوا لكلمة الحق دي دنيا فانيا ولا تسوي كذبة واحدة .
