عسلية يكشف المستور ويفتح ملفات الزمم المالية الخربة للمستخلصين الشمال والموظفين المشبوهين بجمارك بورسعيد
خرج عسلية عن صمته وأصر على كشف المستور وفتح ملفات الزمم المالية الخربة والمسكوت عنها للمستخلصين الشمال والموظفين المشبوهين بجمارك بورسعيد وأمام أهوال ما سمعت وما أعلمه فى ذلك الملف أكتشفت فى نهاية الأمر أننا نحكى القشور .. حاولت أن أحكى لكم لكنى أمام إصرار عسلية على اللت والعجن فى جلسات الشلت البحرية عن الثروات المخفية والمنهوبة من ميناء الحرة بالتفاصيل المملة .
فقال لى عسلية :
’بص يا باشا أحنا صحيح بنقول القشور بس عشان الجهات الرقابية تجيب كل اللى فى البطون وما أخبيش عليك يا كبيرنا فيه أزمة فى شنط (التروللى) اللى هيا (الحجم الكبير) وأختفائها من الأسواق واللى حرامية البلد بيخبوا فيها الفلوس اللى نهبنها م البلد وما أخبيش عليك يا باشا فيه أوض نوم مليانة شنط تروللى واللى بدأت تتهرب من بورسعيد لعقارات يمتلكوها فى القرى السياحية فى عين باى وجاز ووادى دجلة بالعين السخنة والقاهرة الجديدة والرحاب وكمان عقارات بملايين بجوار مول العرب بـ 6 أكتوبر بعد هروب معظمهم هناك وده مربط الفرس وبداية الحدوتة الحقيقية وهوة أنا حلاقى أحلى من كده بداية لما تعرف إن كل موظف جمركى أشترى كام شنطة هتعرف معاه تقريبا” كام بالنسبة للسيولة النقدية مصرى على دورارات أما العقارات فحدث ولا حرج وخد عندك فيه عندك 14 برج ترامادول فى البلد بما فيهم الترامادول 1و2 والأراضى اللى بالعبيط واللى بيضموا موظفين جمارك ومهربين وكل اللى نهبوا المينا والبلد ده غير اللى برة البلد ..
فلاحقت عسلية وقلت له :
إقفل خاشمك يا واد يا أبو لسان زالف ما توديناش فى داهية الحيطان ليها ودان يا واد وأدى أنت شوفت اللى رحوا أتحقق معاهم قبل كده فى الأموال العامة طلعوا زى الشعرة من العجينة واللواء رائد حسنى أتنقل وأتقفل الملف بالضبة والمفتاح .. إقفل خاشمك يا واد يا مفترى ما تزعلشى البهوات والبشوات مننا .. إقفل خاشمك يا واد وأسكت يا لسانى ما تخلنيش أحكيك على الواد (عياض) واللى عمله الواد عياض بعد ما طلع معاش والعربية الروزرويس اللى لونها شمبانيا نمر تجارية بعد ما أشتراها بـ 5 مليون يبقى الواد عياض ده معاه كام ؟ وهيا دى العربية الشمبانية اللى طايح بيها فى البلد ولا حد بيسأله أنت جاى منين ورايح فين وده بيفكرنى بالواقعة بتاعة قبل ما يطلع معاش بأيام لما شبك مع الواد زيزو مهرب الموبايلات لما قال لـ عياض : (أنت مكشر فى وشى كده ليه ده أنت بتاخد منى 200 ألف كل شهر) وده واحد م الوحايد يبقى حسن ومرقص بيدوله كام والطفل المعجزة اللى سرق الجمرك وخلع كان بيديله كام ؟؟ .. إقفل خاشمك يا واد ما تخلنيش أحكيلك على قعدته فى أم كلثوم يوميا” وأتفاقه ومقاولته مع المهربين على كل الشغل اللى جوة المستودع العام يعنى هوة اللى بيدير المستودع العام من الباطن وبيتفق مع كل المهربين على الشغل والحساب يجمع بالليل فى كوكب الشرق .. إقفل خاشمك يا واد إحنا لينا الجنة ..
فلاحقنى عسلية وقاللى :
يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وبدل جيبت سيرة عياض يبقى أكملك أملاكه يمكن الجهات الرقابية ما تعرفشى وأهو لو تعرف يبقى زيادة توكيد سيبك بقى من الخمسة مليون والروزريس والمقاولات اللى بتم على ودنه كل يوم بالليل وطبعا” (الماركات شغالة على ودنة) منطقة حرة ووش ونعل كالعادة و(العّجل شغال على ونة) محشى وسادة و(الترامادول شغال على ودنه) فى الرز بزيادة و(الصواريخ شغالة على ودنه) وأسألوا حمادة .. أنتيم عياض وبمناسبة أملاك عياض خد عندك من أول الشقتين اللى مفتوحين على بعض فى البرج اللى خلف الغرفة التجارية مرورا” بأرض دمياط الجديدة وصولا” لفيلا الرحاب وشقة مول العرب بـ 6 أكتوبر ودوروا على (شغتة)و(سبانخ)و(زعبولة) و(الراضى بنصيبه) ومسميينه (المحلل) حتلقوهم صورة طب الأصل بالكربون لعياض ..
فقاطعت عسلية وقلت له :
بقولك إيه ما (تخربطنيش) وركز معايا فى الموضوع الرئيسى يا واد يا مفترى بلاش خربطة عشان أجيبلك كل أسماء العصابات الجمركية .. لساك شايل فى قلبك السواد يا واد وعاوز تنبش فى ملف الزمم المالية للمهربين الشمال اللى سافروا كلهم يجيبوا شغل شمال من الهند والصين اليومين دول مهو أصل الدنيا بقت زى الفل فى الجمرك قيادات قافلة على نفسها الباب وسايبة الميغة شغالة تحت وبدل الواد عياض ما كان بيدير المستودع العام من جوة هيديره من برة ومن جوة وأهو جوة زى برة والأدوات هيا هيا والعصابات هيا هيا ويعوض على البلد ربنا ..
وأكملت لعسلية :
لساك شايل فى قلبك السواد يا واد وبتحكى على الحقيقة المرة فى الجمارك الحرة وبتجيب فى سيرة المهربين الشمال الناس الكومل وعاوز تتكلم على أملاكهم اللى مالية البلد .. إقفل خاشمك يا واد وأسكت يا لسانى ما تخلنيش أحكيلك على أملاكهم اللى شارى أرض بـ 59 مليون واللى شاريين مربع كامل فى حى الإفرنج الفايف ستار بـ 250 مليون ودى شركة مهربين فى بعض واللى هرب فلوسه وراح فتح مطعم سمك فى الصين واللى عملوا ملايين من (المدقات) أيام الفوضى وغسلوها فى كافيهات ومطاعم ومحلات تجارية لتكون فاترينا لنشاطهم الإجرامى .. لساك شايل فى قلبك السواد يا واد وعاوزنى أحكيلك على كل المهربين الكبار رجعوا لمساكن أهايلهم فى المناطق الشعبية وتركوا شققهم اللى بالملايين وقاموا بإخفاء الملايين من أموال التهريب بالمناطق الشعبية لتضليل الجهات الأمنية بل وكتبوا معظم أموالهم لأبنائهم وأقاربهم من الدرجة الأولى والثانية والثالثة وكمان بقى فيه محلل من أصدقاء أبنائهم يكتبون الأموال بأسمه مقابل مبلغ شهرى كبير وياخدوا عليه ورق ضد .. إقفل خاشمك يا واد القول ضايع و(مسير اللى بّعّترها يلمها) و(مسير المخرطة تيجى تحت الملوخية) ومسير الحى يتلاقى ..
فقاطعنى عسلية وقاللى :
والله أنا مكسوف منك بقى أنا جى أحكيلك ألاقيك أنت اللى بتحكيلى عـ البير وغطاه .. يا سلام عليك يا باشا وأنت بتفضحهم واحد واحد وبالإسم من غير ما تقول أسمه ومعلمتك أنك بتحكى كل بّطحة على نفوخ كل واحد فيهم وبمناسبة البوطح واللعب اللى على ودنة اللى موجود فى مجمع السيارات وساحة الإسكراب والتتمين اللى بيتنقى البند الجمركى بتاعه حسب الفزيتا وطول ما الفيزيتا عالية هتتمن الفيل وبقدرة قادر يبقى نملة وهتكشف السيارات المقطعة نصفين مش أربعة حسب القانون وكله عامل مش من هنا والسيارات كلها بتخرج نصفين فى فضيحة مدوية على مرأى ومسمع من الجميع يا كبيرنا وأى حاوية ما بيتقيدشى نصها وما أخبيش عليك يا كبيرنا فيه متمنين بتروح بـ 100 ألف جنيه فى اليوم بعد ما رفع كل متمن بمجمع السيارات وكل كشاف بساحة (1) الفيزيتا 3 أضعاف يعنى اللى كان بياخد فى الشهادة ألف بقى بياخد تلاتة بعد ما الحكومة عومت الجنيه وهيا يعنى الحكومة تعوم وموظفين الجمارك المنحرفين ما يعّوموش والحكمة بتقول : اللى ما يظبطشى الحسينى ورجب ما يشوفشى شعبان ولا رمضان ولا شوال أما عكاشة فهو حصالة الزغلول الكبير بتعليمات م الفاضى (والفاضى فى جمرك بورسعيد يعمل راضى) بمباركة عبد الراضى …
فقاطعت عسلية وقلت له :
لساك شايل فى قلبك السواد يا واد وبتتكلم على عصابة الإسكراب أمال يعنى ما كلمتنيش على عصابة مجمع المنطقة الحرة بزعامة العرباوى اللى نقلوه الإستثمار فى لجنة المراجعة عشان يراجع الشهادات الجمركية اللى هوة لعب فى أساسها فى المنطقة الحرة عشان يظبطها ويخليها تمام التمام وبعد ما يخلص يرجعوه تانى عشان يسرق نانى ويكمل المعيز والخرفان لـ 10 ألاف معزة مجمع المنطقة الحرة اللى بيجزأ الحاوية 20 جزء وبيخرجوا الحاوية 10 مرات بطريقة البوليصة الدوارو ده غير اللعب فى ميزان 234 ووزن كل الحاويات مضروب وحتى توصيف الحاويات مضروب والفور وردر ملعوب فى أساسه والتتمين شمال الشمال وأسألوا رشوان موظف الجمارك (المستورد) اللى فيزيته أعلى من أجر محمد رمضان بالع السيمة .. لساك شايل فى قلبك السواد يا واد وعاوز تكلمنى على مديرين الإدارات ومديرين التعريفة اللى بيشتغلوا عند المهربين الكبار عشان يفكرولهم ويخططولهم إذاى يهّرّبوا ؟ ولا أحكيلك على التعاون المثمر بين موظفين الجمارك المنحرفين وزملائهم الأكثر إنحرافا” فى كل الموانى يعنى ممكن موظف فى بورسعيد يخلص مصلحة شمال مع موظف من إسكندرية وموظف من السويس يخلص مصلحة فى جمرك بورسعيد وموظفيين فى دمياط مأجرين ساحات ومجمعات فى جمارك الحرة .. لساك شايل فى قلبك السواد يا واد وبتتكلم على محتكر سيارات المعاقين ببورسعيد وأحد المهربين الكبار اللى عمل 500 مليون جنيه من الفوضى وبيقولك (يسقط يسقط حكم العسكر) .. إقفل خاشمك يا واد وأسكت يا لسانى وما تخلنيش أحكيلك حكاية على البومبة الكبيرة فى الجلسة السرية اللى بين الحاج معتز أكبر مهرب ومزور أوراق إستيرادية فى مصر وبين نائب بورسعيد السمسار اللى كان عاوز يستولى على كل شغل الحاج معتز المهرب فى بورسعيد وهو 70% من البضائع المستوردة بالمينا وكان معاهم فى القعدة المهرب إياه اللى هرب مئات الحاويات إياها تحت التحفظ من المينا أيام الثورة والباب الجمركى أتفتحله الساعة 2 فجرا” وبعد ما خرج م الحدوتة بالتدليس والضحك على الدقون راجع دلوقتى عشان يسرق الشغل من المهرب أياه والمهرب إياه اللى كشفوا الملعوب وكانت قاعدة كبيرة فى القهوة أياها وحضرها كل المهربين والنائب السمسار .. إقفل خاشمك يا واد وسيب شوية للحلقات الجاية ..!!؟؟؟
