عسلية يكشف : عصابات تحويل الوارد لمنطقة حرة وتزوير الإيلاك وضرب أوراق تسجيل المصانع الوهمية بميناء بورسعيد واللهم إنى صايم

أتفقت أنا وعسلية منذ بداية كتابة حلقاتنا أن نكون عين الحقيقة فى رصد كل الأحداث وأن نكون الضوء الذى يدق ناقوس الخطر لكافة الأجهزة الرقابية فى مصر وأن نلعب دوراً وطنياً لكشف أى فساد وكل فساد إلا أننى ومع أنتهاء كل حلقة من حلقات عسلية أكتشف أننا نحكى القشور والحقيقة مفزعة ومرعبة وما خفى كان أعظم .. حاولت أن أحكى لكم أهوال ما سمعت لكنى أمام إصرار عسلية على اللت والعجن فى جلسات الشلت البحرية تركته يحكى لكم ويكشف المستور عن عصابات تحويل الوارد لمنطقة حرة وتزوير شهادة الإيلاك وضرب أوراق تسجيل المصانع الوهمية بميناء بورسعيد .. واللهم إنى صايم !!

فقال لى عسلية :

ُبص يا باشا أحنا صحيح بنقول القشور بس عشان الجهات الرقابية تجيب كل اللى فى البطون وتكشف المستخبى والمبطون .. وبعدين يا باشا الجمعية كبيرة قوى .. قوى قوى .. والسبوبة كبيرة يا كبير .. وريحتها طلعت لفوق .. لفوق قوى يا باشا وأنت سيد العارفين أما حاجة بتطلع لفوق ما ينفعشى يتلعب فيها وعلى رأى بابا : (ده تشكيل عصابى ممنهج) وشلة مع بعضيهم .. ولو مباحث المينا مش شغالة قول على المينا الجمركى المنكوب السلام .. أصل مباحث المينا شايلين الطين كله فوق دماغهم وربك هوة المعين .. وبالمفتشر العصابات رجعت تلعب تانى .. يعنى فيه اللى بيلعب من تحت الترابيزة وفيه اللى بيلعب من فوق الترابيزة وفيه اللى بيلعب على المكشوف وعلى عينك يا قابض ومدام أبوها راضى وأنا راضى .. مالك أنت بقى ومالنا يا فاضى زى ما بيقول شعار المرحلة بالقلم والمسطرة وميزان 234 الملعوب فى أساسه  ..

وأكمل عسلية :

أقولك إيه ولا إيه بس يا باشا .. أقولك على اللعب فى تحويل كل الحاويات الشمال الوارد لمنطقة حرة بعد اللعب فى عناوين الشركات اللى هيا أصلاً من القاهرة على عناوين وهمية ببورسعيد عن طريق موظفين الشئون الجمركية بالجهاز التنفيذى للمنطقة الحرة وكل الشمال بيطلع يمين فى المنطقة الحرة المتباعة .. ولا أقولك على العيارات اللى وصلت لـ 60% مخصومة من وزن الحاوية فى المنطقة الحرة الملاكى .. ولا أقولك على شهادات الإيلاك اللى بتتزور وش فى الصين عشان تتهرب عصابة الوارد من العرض على هيئة الرقابة على الصادرات والواردات ولا أقولك على العينات اللى بتتعرض على الصادرات والواردات واللى جوة الحاويات حاجة تانية مرفوضة وغير مطابقة للمواصفات وكله لعب يا كبير .. ولا أقولك على ضرب أوراق تسجيل المصانع الوهمية فى الوارد لأن أصلاً محدش أخد موافقات من وزارة التجارة والصناعة وكله مضروب يا كبير .. أقولك إيه بس ولا إيه يا باشا القول ضايع ودى ناس لا ينفع معاها رمضان ولا اللهم إنى صايم ولا أيام مفترجة .. دى ناس بتلعب فى أى حاجة وكل حاجة وزى ما أنت عارف وأنا عارف السبوبة محمية بالفاسدين من فوق ومن تحت ..

فلاحقت عسلية وقلت له :

إقفل خاشمك يا واد يا مفترى إياك تجيب سيرة السادة المهربين واللى بيحموهم .. ده كلام ما ينفعشى ينكتب فى جرايد ولا مواقع ولا يتقال فى قنوات فضائية .. ده كلام ما يتقالشى إلا فى الأماكن العليوى .. العليوى قوى يا واد زى جهاز الكسب غير المشروع والأجهزة الرقابية الكبيرة قوى يا واد مفترى .. إقفل خاشمك يا واد وأسكت يا لسانى وما تخلنيش أحكيلك على سماسرة (شطة وشركاه) فى ضرب أوراق تسجيل المصانع الوهمية يا واد مع إن مفيش أى موافقات رسمية من وزير التجارة يعنى كله فنكوش .. أقولك إيه ولا إيه ولا إيه يا واد يا أبو لسان زالف .. أقولك على حاويات الوش ونعل (للتصنيع) اللى بتخرج برسم المنطقة الحرة وأنا مش عارف إذاى وش ونعل للتصنيع يخرج منطقة حرة وصاحبها تاجر م القاهرة .. أقولك على شهادات (الإيلاك) المزورة اللى بتتجاب مضروبة من الصين على أن البضائع مطابقة للمواصفات لعدم عرضها على الصادرات والواردات وده اللى بيتم فى كل البضائع الرديئة اللى بتخرج برسم الوارد وحلو يا حلو .. ولا أقولك على بندق وفستق اللى بيظبطوا مكتب الشيخ حسنى .. ورمضان كريم يا حلو ..

وأكملت لعسلية :

ولا أقولك على سبوبة الشغل الكتير اللى فى المستودع العام واللى تم تحويلها لمنطقة حرة رغم إن مستوردينها عناوينهم بالقاهرة بعد ضرب عناوين وهمية على شقق مفروشة ببورسعيد عن طريق موظفين بالجهاز التنفيذى للمنطقة الحرة وطبعاً كل الشغل ده مليان شمال وشمال الشمال من كل الممنوعات والمحظورات اللى كانوا مجهزينها لرمضان وأيام وليالى رمضان هما بس أول صفين وبعد كده أتفرج على اللعب اللى على أصوله وزى ما أنت عارف وأنا عارف مفيش شغل بيتفتح يعنى شيل سيل شحن وُحط سيل إفراج تانى وطريق السلامة يا شربات .. يعنى الحاويات بتخرج زى السكينة فى الحلاوة وزى الحلاوة فى الجاتوه  من باب 30 و35 الجمركى للميناء وشاالله يا مهلبى ..

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وتفهمها وهيا طايرة وبما إننا بنتكلم على المنطقة الحرة أقولك بقى اللى بيحصل فى المنطقة الحرة الملاكى مهو بندق وفستق ومكسرات رمضان مقسمين الشغل بين الوارد والمنطقة الحرة بس المنطقة الحرة أكتر وفيها كل الحاويات الملعوب فى أساسها والمتقسمة على سخسوخ وعجاج واللى بتخرج زى السكينة فى الحلاوة بعد التحمير والتشمير والذى منه وده اللى خلا مباحث ميناء بورسعيد تعمل بلاغاتها طوالى على الأبواب الجمركية من غير ما تبلغ حد وزى ما أنت عارف وأنا عارف البلاغات كانت بتتباع وبتتبلغ بالتليفون والبلاغ كان بيتباع بالشىء الفلانى وعشان كده البلاغات بقت على الأبواب طوالى .. ُأمال إيه .. دى تعليمات وبتتنفذ يا باشا ..

فقاطعت عسلية وقلت له :

إقفل خاشمك يا واد ما توديناش فى داهية أنت أتجنيت فى عقلك يا واد ولا إيه ما تزعلش مننا بكوات المينا .. خلينا جنب الحيطة يا واد محناش قد كبرات مهربين البلد أحنا غلابة يا واد يا مفترى .. إقفل خاشمك يا واد وما توشوشنيش عن (أتّح) اللى بيلم الغلة من الموظفين والموظفات عشان ينقلهم المنطقة الحرة ولا تكلمنى على شوربة فواكه البحر والأسماك اللى بتروح الإستراحة العليوي .. لساك شايل فى قلبك السواد يا واد وبتحكى فى المحكى ما الموضوع بقى معروف يا واد وواصل لفوق .. لفوق قوى يا واد .. والجمعية كبيرة قوى قوى يا واد يا مفترى …

فقاطعنى عسلية وقاللى :

والله أنا مكسوف منك بقى أنا جاى أحكيلك وأشكيلك ألاقيك أنت اللى بتحكيلى وبعدين ما أنا جايلك فى الكلام أهو يا كبيرنا .. مهى البلد بلدهم .. والجمرك جمركهم .. والورق ورقهم .. والدفاتر دفاترهم .. وأحنا غلابة قوى يا باشا والقول ضايع وعلى رأى (أبو العلا) : (أنتوا بتكتبوا اللى بتكتبوه وهما بيهربوا زى ما هما عاوزين)  وطول ما بندق وفستق بيظبطوا المسائل وُكل سائل بيظبط الإستراحة .. والفطار والغدا والعشا وكلشن كان بكل بجاحة .. الشغل هيخرج بالراحة من غير تكتكة ولا نصاحة وكله بيمشى بالمية الساقعة واللعب كله فى الساحة .

فقاطعت عسلية مرة آخرى وقلت له :

لساك شايل فى قلبك السواد يا واد يا أبو قلب عامل زى البولاك وبتنبط  على بندق وفستق وشركاه واللعب بأسماء شركات المتحدة وجولدن وتراست والسامبو اللى بيضرب إفراجات الصادرات والواردات على ودنه مهو ده التظبيط المظبوط يا واد يا مفترى ورجعت ريمة لعادتها القديمة بمنفذ تهريب 85 الجمركى وكأنك يا أبو زيد ما غزيت .. لساك شايل فى قلبك السواد يا واد وبتنبط على الميناء الجمركى اللى بقى عامل زى السويقة وبدل الدنيا متظبطة فوق هتبقى بردو متظبطة تحت وسيبك بقى من كشف الجميع والكلام القانونى اللى كنا بنقول عليه زمان سيب زمان فى حاله ..  إقفل خاشمك يا واد وخليها فى عبك وما تقولشى لحد عشان دلوقتى شيل سيل وُحط سيل وظبط الشهادة زى ما عاوز الزبون .. لساك شايل فى قلبك السواد يا واد وقاصدك يعنى تنبط على تعنيف رئيس مصلحة الجمارك للقيادى الجمركى أياه وقاله : أنت بوظت ميناء بورسعيد وخليت سمعتنا زى الزفت .. إقفل خاشمك يا واد وما تقولشى لحد على الوسايط اللى جايبها المذكور عشان يفضل فى بورسعيد وتفضل السبوبة شغالة .. إقفل خاشمك يا واد وخليها فى سرك يا واد ده رايح منفى قرية البضايع بالمطار بتعليمات من فوق .. من فوق قوى يا واد عشان الريحة مفحفحة من البدل للشاشات لـ المروحة .. إقفل خاشمك يا واد يا مفترى وسيب شوية للحلقات الجاية .