تعيش المدينة الحرة أزمة طاحنة فى أدوية الإسهال بالصيدليات والكركبة فى بطون كل الشمال بميناء بورسعيد وليست الأزمة بالحرة فقط بل أمتدت بشكل طبيعى لموانى العين السخنة بالسويس ودمياط والدخيلة بالأسكندرية حيث تم إستدعاء 33 موظف بميناء بورسعيد بالجمارك والحاويات والصادرات والواردات و12 موظفا” بميناء السويس و11 موظفا” بميناء دمياط و61 موظفا” من ميناء الأسكندرية كدفعة أولى سيتوالى خلفها دفعات آخرى للفحص الرقابى كما سيتم إستدعاء دفعة آخرى من المستخلصين الشمال والخطرين بكافة الموانى لفحص أعمالهم وقيمة ممتلكاتهم الحقيقية والتى تضخمت خلال الخمس سنوات الماضية .. حاولت أن أحكى لكم لكنى أمام إصرار عسلية على اللت والعجن تركته يحكى لكم ويفتح جراب فضائحه من على رصيف الحرة بالتفاصيل المملة .
فقال لى عسلية :
أصل الموضوع مش مجرد موظفين جمارك ومستخلصين حيتفحصوا يا باشا .. الموضوع أكبر من كده بكتير وبإختصار فى تحقيقات مع ناس كبيرة ويتقلدوا مناصب هامة فى كل القطاعات الحكومية فى مصر (( أصل أحنا داخلين على نوة المكنسة)) يا كبيرنا بس المكنسة اللى بتجى فى الصيف غير المكنسة اللى بتيجى فى الشتا أصل نوة المكنسة فى الصيف صعبة عليهم قوى يا باشا لأن كل شىء إنكشفن وبان ومباحث الأموال العامة فى وزارة الداخلية ما بتلعبشى بجد وبأمانة وخصوصا” بعد كشف المستور عن عصابة التلاعب فى الأوزان والمنافستو بميناء بورسعيد الجمركى برئاسة عبد الوهاب رئيس قطاع الشئون التجارية بشركة الحاويات وأبو النجا مسئول ساحة الصفا والمروة وفؤاد مسئول موازين شركة الحاويات المصرية واللى كونوا مافيا للتلاعب فى ميزان 234 الأميرى وباقى الموازين الخصوصى وهيا السبوبة المستمرة من سنوات الفوضى ولغاية دلوقتى لحساب أباطرة المهربين بجمارك بورسعيد وخاصة ببضائع المنطقة الحرة والبالة (الملابس المستعملة) وكل المنسوجات الواردة لساحة الصفا والمروة وزنها مضروب أكتر من النص بالإتفاق مع غالبية المشبوهين الواردين فى كشوفات الخطرين من المستخلصين الشمال بمصلحة الجمارك المصرية وكل الخطرين من الموظفين الخطرين بجمارك بورسعيد وعلى رأسهم حسن زعبولة اللى مأجر منفذ تهريب مجمع 85 الجمركى إيجار جديد لمهربين بالإسم وعواد اللى باع المستودع العام بالطن لكل اللى يدفع أكتر ..
وأكمل عسلية :
أصل الخطرين بقوا كتير قوى يا كبيرنا وخد عندك أول خطر فيهم صاحب أول قضية تهريب عشاء بكارة صينى فى مصر وعلى رأى نبهان أفتحوا أى رولات جلد صناعى وأنتوا حتشوفوا عجب العجاب ده غير باقى العلوج يتقدمهم أول (علج) حرق المنافستو عشان يغطى على قضية تزوير بوالص شحن بـ 10 مليون جنيه واللى تم التعتيم عليها بس ريحتها فحفحت اليومين دول ده غير الواد شمشرجى نقيب المستخلصين اللى فتح محل جديد بشارع التلاتينى ببورسعيد إحتفالا” بعدم تحريك الدعوى الجنائية ضده فى قضية تزوير الرسوم الجمركية الشهيرة واللى لسة لغاية دلوقتى بيدرسوها ويفصلوها فى الشئون القانونية لغاية ما يتأكدوا أنها قضية جنائية ولا لأه مع إنك لو سألت أى عيل صغير فى البلد حيقولك تحريك الدعوى الجنائية طبعا” بس تقول إيه ناس ما بتشوفشى وما بتسمعشى إلا بمزاجها ده غير الواد سلوم اللى كان بيمثل كرهه للشيخ ناصر الإخوانى وهوة نفسه من المرابطين يوميا” والحاجزين كرسى دائم فى مكتبه لتظبيط المسائل بالمنطقة الحرة .. وقال كان نفسه الشيخ يتشال قال دى نمر وشغل أوض يا باشا والواحد سنانه أتخلعت ..
فقاطعت عسلية وقلت له :
إقفل خاشمك يا واد يا مفترى إياك تجيب سيرة شركة الحاويات وعصابة شركة الحاويات ببورسعيد بقيادة عبد الوهاب وأبو النجا والفؤش واللى عملوا ملايين الملايين من اللعب فى المنافستو والموازين بمباركة المزاحى الإخوانى رئيس الإدارة المركزية لشركة الحاويات وده طبعا” كان من مؤسسين حركة حازمون ولازم حازم وكان بيلم توكيلات لمرسى الجاسوس فى بورسعيد أيام ترشحه للرئاسة إقفل خاشمك يا واد وما تسألنيش ليه توحة المزاحى رئيس لشركة الحاويات ببورسعيد لسة ماسك لغاية دلوقتى لأن فيه زيه كتير ماسكين مناصب حيوية فى الحكومة .. إقفل خاشمك يا واد وما تخلنيش أقولك على التحريات اللى كشفت عن عصابة شركة الحاويات وأساميهم منورة فى مباحث الأموال العامة بوزارة الداخلية وإن الكلام ده كله كان بيتم لصالح غالبية الأسماء اللى فى كشوفات الخطرين .. (ويجعله عامر وزيزو وسلوم) إقفل خاشمك يا واد يا واد يا اللى قلبك عامل زى البولاك وما تجيبشى سيرة الخطرين من المهربين والموظفين المنحرفين ده كلام ما ينفعشى يتكتب فى جرايد ده كلام ما يتقالشى إلا فى الأموال العامة وجهاز الكسب غير المشروع لساك شايل فى قلبك السواد يا واد وبتتكلم على أول الخطرين وصاحب أول قضية تهريب غشاء بكارة فى مصر ومحتكر الماركات العالمية المضروبة ده غير المكياج المسرطن اللى لقوه فى الشنط .. لساك شايل فى قلبك السواد يا واد وبتتكلم على قضية حريق المنافستو بجمارك بورسعيد عن طريق نادر الأعرج موظف المنافستو لإخفاء تزوير بوالص الشحن واللى كشف عنها أحمد شحاتة مدير عام مكافحة عمليات الإلتزام التجارى إقفل خاشمك يا واد يا مفترى وأسكت يا لسانى وما تخلينيش أحكيلك عن باقى طابور الخطرين بما فيهم شمشرجى نقيب المهربين اللى بدل ما يحولوه للنيابة فى قضية تزوير الرسوم الجمركية بيطلعلنا لسانه وهوة بيفتتح محل جديد بالفلوس اللى لهفها من خزينة المال السايب بالجمارك ده غير الواد سلوم أخطر الخطرين على الإطلاق بجمارك بورسعيد وكفاية اللعب اللى قاعد يلعبه فى المنطقة الحرة من غير ما حد يمسكه ..
فلاحقنى عسلية وقاللى :
يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد خطرين مين بقى اللى حيلعبوا معاك أنت هارش ألاعيبهم كلها وبما إنك بتتكلم عن الخطرين أكملك بقى طابور الخطرين اللى فى البلد أصل أشرف مهرب فى البلد ماشى يقول فى البلد : شوية عيال سرقوا زباين مكتبى وعملوا ملايين أشتروا بيها أراضى ملك الجمعية اليونانية وأبراج جنب التربية والتعليم وباعونى للنائب البرلمانى الدقهلاوى حوت الإستيراد من الصين وبعدين يا يا باشا أنا مش عارف أشرف زعلان من إيه مهى دى طريقته مع كل صحابه والله يرحم أيام ما كان مشارك الزناتى وكانوا يسرقوا الزباين من المستخلصين بتوعهم أيام قضية التزوير بتاعة اللواء شاهين عبد العال وقت ما كان أشرف هربان فى شاطىء المغربى غرب بورسعيد عند قرايبه اللى سرق زباينهم بردوا يعنى الموضوع مش جديد وداين تدان والملف مليان فضايح كتير من أول لبنى فى جمرك العاشر وحتى عفاف بجمارك بورسعيد وأسألوا الحاجة رضا ….
فلاحقت عسلية وقلت له :
إقفل خاشمك يا واد يا أبو لسان زالف .. إقفل خاشمك وما تجيبشى سيرة أشرف مهرب فى البلد ما تزعلشى مننا اللى يسوا واللى ما يسواشى .. إقفل خاشمك يا واد يا مفترى وأسكت يا لسانى مش هوة ده يا واد اللى كان مسرح الزناتى يسرق الزباين من مكاتب المستخلصين وعلى راسهم زباين نبهان مش هوة ده أشرف مهرب فى البلد اللى بعد ما باع نبهان قام شايط الزناتى بعد ما سرقله زباين البلد قام شايطه هوة كمان وبقى لواحده وعمل فيها معلم وبصراحة وعلى رأيك يا واد يا مفترى أنا مش عارف هوة زعلان من إيه ؟ مهو اللى بييجى م الهوا بيروح فى الطراوة وزباينه أصلا” مسروقين .. إقفل خاشمك يا واد وما تجيبشى سيرة لبنى بتاعة جمرك العاشر ولا عفاف بتاعة جمرك بورسعيد ولا فيلم تتجوزينى يا رانيا .. إقفل خاشمك يا واد إن الله حليم ستار وسيب شوية للحلقات الجاية …!!؟؟؟
