عسلية يواصل فتح جراب فضائحه ويحكى : حدوتة الطفل المعجزة فى شركة الخلبوطة من على رصيف ميناء الحرة

عاد عسلية بزعابيبه ليروى لى حواديت المهربين داخل وخارج ميناء بورسعيد الجمركى بعد طول صمته خلال الشهور الماضية وما حدث خلالها من عمليات سلب ونهب وحيل جديدة للمهلبين المهربين وعلى رأسهم الطفل المعجزة .. حاولت أن أحكى لكم لكنى أمام إصرار عسلية على اللت والعجن تركته يحكى لكم حدوتة الطفل المعجزة بالتفاصيل التزويرية الموجزة من على رصيف ميناء الحرة .

فقال لى عسلية :

’بص يا باشا قبل ما أحكيلك حكاية الطفل المعجزة عاوز أفهمك إن الملف اللى حيتحاكم عليه كله معايا من أول شركة الخلبوطة لغاية لغاية شركة راما لإستيراد ومكتب توستار للتخليص الجمركى ومكتب ألفريد للإستيراد والتخليص الجمركى فى تزوير 55 شهادة جمركية من الألف إلى الياء يعنى أحنا فى السليم واللى يتكلم نحط صوابعنا فى عنيه ومعاها الملف الأسود للمعجزة وعصابته .

فقاطعت عسلية وقلت له :

مش هوة ده يا واد الطفل المعجزة اللى كان من تلت أو أربع سنين لسة بيشتغل شمشرجى عند نقيب المستخلصين .. مش ده يا واد اللى عمل أكتر من 400 مليون فى كام تكتة تزوير فى جمارك بورسعيد .. مش هوة ده يا واد يا مفترى اللى ضرب توقيع أحمد درويش مدير مجمع المنسوجات وضرب توقيعات المديرين العموم لساك شايل فى قلبك السواد يا واد وبتتكلم على الطفل المعجزة اللى ضرب توقيعات كبار موظفين فى الهيئة العامة للرقابة على الصادرات والواردات بميناء بورسعيد وعلى رأسهم مجدى الجوهرى رئيس الإدارة المركزية .. لساك بتتكلم على الطفل المعجزة اللى زور 55 شهادة جمركية (دول اللى أتمسكوا بس لغاية دلوقتى) بعد ضرب أزونات الأفراج وضرب دفع الرسوم الجمركية لخزينة الدولة .. لساك شايل فى قلبك السواد يا واد يا مفترى وبتتكلم على المعجزة اللى وزير المالية حرك الدعوى الجنائية الأسبوع اللى فات فى 13 شهادة فى القضية الجمركية رقم 1820 و1825 لسنة 2016 والمحرر لها محضر ضبط بتاريخ 19/9/2016 من الـ 55 شهادة جمركية المذكورين ولسة يا ريح كتر م الفضايح فى اللى حصل فى مجمع المنطقة الحرة وما أدراك المنطقة الحرة فى الشهور اللى فاتت .. إقفل خاشمك يا واد وما تخلنيش أحكيك على اللى عمله الطفل المعجزة فى إدارة الترشيد بمجمع المنطقة الحرة بمشاركة الواد عب عال بعد ما خربها فى الوارد .

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وعلى رأيك كله محسوب ومكتوب ومتسجل ومتصور يا باشا .. أما من ناحية اللى حصل فى الترشيد وما أدراك ما الترشيد يا باشا ودى الإدارة الخاصة بحصص البورسعيدية من المستوردين واللى اللعب فيها بقى على ودنه وشالله يا مهلبى وأسألوا طارق خلف مدير عام الإستثمار والمنطقة الحرة مسك إيه فى إدارة الترشيد ؟ واللى ورق اللى مع طارق خلف إيه ؟ بعد تكرار الطفل المعجزة وآخرين ما حدث فى جمارك بورسعيد منذ عام 2001 وحتى عام 2006 فى القضية المعروفة إعلاميا” بتزوير البطاقات الإستيرادية للموتى والغير مستغلين لحصصهم الإستيرادية وهو ما تكرر بالكربون عن طريق عب عال المحلاوى الحاكم بأمر المهربين فى إدارة الترشيد واللى حقق ثروة كبيرة فى الكام شهر اللى فاتوا بعد ما عمل دويتو مع الطفل المعجزة وآخرين فقاموا بإثبات أى حصة إستيرادية بالدفاتر بأكثر من 10 أضعافها وريحتهم طلعت قوى يا باشا وخاصة أنها طلعت للجهات الرقابية اللى فى البلد .

فلاحقت عسلية وقلت له :

إقفل خاشمك يا واد يا مفترى ما توديناش فى داهية ما تزعلشى مننا البهوات والبشوات من موظفين الجمارك المنحرفين اللى بيحموا الطفل المعجزة وآخرين بمجمع المنطقة الحرة .. إقفل خاشمك يا واد وأسكت يا لسانى وما تخلنيش أحكيلك حكاية المخازن واللى حصل فى المخازن الشهور اللى فاتت ..

فقاطعنى عسلية مرة آخرى وقاللى :

المخازن وما أدراك م اللى بيحصل فى المخازن يا باشا وعصابات المخازن الجمركية فى لعبة التجزئة على بضائع المنطقة الحرة والإستمارة الدوارة اللى أشتغلت على ودنه واللى ظبطها أبو زيد رئيس الإدارة المركزية لجمارك بورسعيد والمنطقة الشرقية بعد أما كانوا بيدخلوا حاوية ويطلعوا على حسها 10 حاويات والتركى يخرج على إنه صينى فى كل الحالات والبرشام يخرج على إنه جزم وشنط تحت حراسة موظفين الجمارك المتواطئين.. ده غير اللى بيحصل فى ساحة الإسكراب وما أدراك ما قطع غيار السيارات يا كبيرنا وإذاى تبقى الحاوية منطقة حرة وتتعبى فى عربيات النقل المفرج عنها برسم الوارد وتبقى خالصة الرسوم الجمركية وتخرج فى حراسة مباحث أمن الموانى  .

فعنفت عسلية وقلت له :

إقفل خاشمك يا واد يا مفترى ما توديناش فى داهية وتدوس فى الحلل !! لساك شايل فى قلبك السواد يا واد وبتتكلم على لعبة الإسكراب والتزوير فى حاويات قطع غيار السيارات المستعملة وآخرها سقوط الشاذلى وعبير متلبسين .. لساك شايل فى قلبك السواد يا واد يا اللى قلبك عامل زى البولاك وبتتكلم على التجزئة على بضائع المنطقة الحرة فى المخازن الجمركية واللى كله لعب فيها بالأسماء ومستندات الشهادات الجمركية اللى كلها أطفال .. أقفل خاشمك يا واد وأسكت يا لسانى ما تخلنيش أحكيلك سبوبة المنطقة الحرة فى زمن وائل زهران وطارق الصحفى إقفل خاشمك يا واد وسيب شوية للحلقات الجاية ..!!؟؟