أخبار عالميةعسليةكاريكاتيرمختارات الانباء نيوز
عسلية يكشفهم : حدوتة التنظيم البورفؤادي لـ عصابة ((عب عظيم)) و((الفارسكوري اللئيم)) بميناء بورسعيد !!
الشماعة يباصيها لـ ((السمانة)) على يد ((مُحضر)) والسمانة يشوط في الجون لـ كل ((زغلول وزغلولة ومرايتهم)) و(((الحكم الفراسكوري قابض))) وكل الجهات عارفة والموضوع واصل لـ فوق قوي
حكاية ((أبو علي)) في (((فضيحة الحزام المسموح))) وجمعية المنطقة الحُرة اللي بتروحله فى علب الحلويات من عند ((لورد)) وبوكس الجمبري الجامبو والأستاكوزا اللى بتجيله من مراكب الصيد
فضيحة ضبط شركتي ((الأندلس)) و((الإتحاد الأوروبي)) ((محتكرين الأدوات المنزلية في مصر)) وهما بيسرحوا شعر بنت ((السلطان)) فى ساحة المستودع العام وسقوط (((مدكو الخلبوص))) اللى قدام الجهات الرقابية (((بلبوص))) بحاويات مواتير الغسالات الملعوب فى أساسها بميناء بورسعيد
إتفقت أنا وعسلية منذ بداية كتابة حلقاتنا أن نكون عيناً لهذا الوطن وليس عيناً عليه لأحد وأن نُقدم أيضاً خدمة وطنية صادقة للجهات السيادية والرقابية ..
وأن نكون أيضاً وأيضاً عنواناً للحقيقة أمام الرأى العام المصرى لكنى كُنت أكتشف مع نهاية كل حدوتة وكل حلقة جديدة بالموانى المصرية أننا نحكى القشور والحقيقة مُفزعة .
حاولت أن أحكى لكم أهوال ما سمعت من عسلية لكنى أمام إصرار عسلية على اللت والعجن فى جلسات الشلت البحرية تركته يحكى لكم ويفضحهم ويكشفهم يفك طلاسم ((حدوتة التنظيم البورفؤادي لعصابة عب عظيم والفارسكوري اللئيم بميناء بورسعيد)) بالتفاصيل المملة !!
فقال لي عسلية :
بُص يا باشا إحنا صحيح بنقول القشور عشان الجهات الرقابية تجيب كل اللى فـ البطون والمستخبي والمبطون .. وعشان كده أنا جاى أحكيلك وعالمِفتشر كده ((القديم والجديد)) فـ حدوتة التنظيم البورفؤادي لعصابة (( عب عظيم)) و ((الفارسكوري اللئيم)) بميناء بورسعيد .
ويكمل عسلية :
بُص يا باشا كل إخباريات الجِهات الرقابية والشُرطية بتوصل لشلة المُهربين فـ المينا بسُرعة البرق وبتتسربلهم ((على يد مُحضر)) و (((هوة أُس الفساد فـ المينا))) وهوة اللى بيتولى التوصيل من فُلان لـ علان لـ ترتان وحسب الحالة أصل ((المُحضر)) ده حكايته حكاية وموضوعه قديم وهوة اللى كان مدور المينا ومازال مدورها لغاية اللحظة دى من أيام عب عظيم لغاية العهد الأسود لـ الفارسكوري اللئيم .
يقوم عب عظيم يتحاكم على جرايم وياخد فيها 10 سنين وجرايم لسة هيتحاكم عليها مع إن اللى منفذها ((مُحضره)) الشهير بـ عب حليم وعصابته اللماليم اللى ما حصلهُومشي حاجة وعب عظيم هوة اللي حاسب عـ المشاريب كلها ((جديد وقديم)) حتى مًوززه من الحريم ؟
فقاطعت عسلية وقُلت له :
إقفل خاشمك يا واد مفتري يا أبو قلب عامل زي البولاك .. لساك شايل فـ قلبك السواد يا واد وبتفكرني بعصابة عب عظيم والفرسكوري اللئيم .. يا فتاح يا عليم يا رزاق يا كريم ..
وكمان بتكلمني عن ((مُحضره)) اللى عامللي فيها عبد الحليم .. يا فتاح يا عليم يا رزاق يا كريم .. وهوة اللي مدّورها بقاله 4 سنين وكُله فى السليم ..يا فتاح يا عليم يا رزاق يا كريم ..
إقفل خاشمك يا واد يا مُفتري ده كلام ما ينفعشي يتكتب فـ جرايد ولا مواقع ألكترونية ولا سوشيال ميديا ولا فـ قاعدات الشلت المستكوفي اللي عالبحر .. ده كلام ما يتقالشي إلا فـ الأماكن العليوي قوي قوي وفـ جهاز الكسب غير المشروع ببلاغ لـ الأموال العامة ومن أين لك هذا يا مبقع !!
إقفل خاشمك يا واد يا أبو لسان زالف ما تخلنيش أتكلم وأسكت يا لساني : مش هوة ده (((مُحضره))) اللى كان مفهمك إنه عايش بالملاليم وهوة ((حوت كبير)) على رأى ((عمك العربي)) الله يصبحه ويمسيه بالخير لما قالك ده حوت كبير والمُحضر الحليم هوة اللى باع ((عب عظيم)) لـ ((الفارسكوري اللئيم)) و((هوة اللى جاب كل أفراد عصابة عب عظيم يشهدوا على عب عظيم نفسه)) رغم إنهم شركاته فـ سبوبة بيع المينا وإيجار الساحات والمُجمعات إيجار جديد ومفروش سنة 2017 و2018 .
والسبوبة ما وقفتشي بحبس عب عظيم السبوبة بالعكس دي لسة شغالة وأكتر م الأول بكتير لغاية دلوقتى بالإتفاق بين العصابتين وبرعاية (((الفارسكوري اللئيم نجم النجوم نفسه))) وسبحان الله المُغير الذي لا يتغير .
يعني عصابة عب عظيم وعصابة الفرسكوري اللئيم ((بعد ما قروا الفاتحة على قِلة الأصل)) مع بعض و(((حِلفوا بالعظيم إنهم يبيعوا عب عظيم))) وبعد ما باعوا ولي نعمتهم عب عظيم بقوا زي السمنة عالعسل وزي السكينة فى الحلاوة مع بعض .
رغم إنهم كانوا أيام عب عظيم ما بيطيقوش بعض بس على رأي ((جدو)) ((المصالح بتتصالح)) والدنيا دارت وبقت أسخم من أيام عب عظيم بس المرادي (((تحت حماية الفارسكوري اللئيم))((النضيف)) ((الشريف)) ((العفيف)) ((الشريف)) نجم النجوم الحريف ((طويل العُمر يطول عمره ويزهزه عّصره وهاي هيْ)) وطبعاً دي عدة النصب اللى بيروجلها عـ الفيس بوك كل اللماليم بتوع الفارسكوري اللئيم وشركائه فى السبوبة بمواني بورسعيد ودمياط .
وعلى رأي بابا الله يصبحه ويمسيه بالخير لما قاللي : ((أوعى تفتكر إحنا مش عارفين النجم بيقبض إذاى .. (((مش فلوس لا سمح الله))) .. بس أشتريلي حتة الأرض دي .. وضبلى البُرج السكني ده .. إفرشلي الفيلا اللى فـ دمياط الجديدة دي .. أو دخلني شريك فى (((شركة المقاولات إياها اللى جنب مرور فرسكور البلد))) أو أشتريلي شقة الرحاب دي أو عشة راس البر وأفرشهالي من عند شنشن .. وأشحنلي شكراً)) .. !!
وطبعاً بابا حافظ دمياط ومينا دمياط بالمللي وعارف النجم من أيام ما كان بيقبض ((طقم مطبخ بمبى وأنا جنبك وأنت جانبى)) عشان يعدي مصيبة من ميناء دمياط شالله يا مهلبي .
وكمان على رأي طنط إحسان الله يمسيها بكل خير لما قالتلي : ((اللى حصل فى عهد الفارسكوري اللئيم .. ما حصلش فـ عهد عب عظيم ولا فـ أي عصر لتهريب التماثيل الأثرية فـ أى عهد قديم .. أصل الفارسكوري حوت لئيم .. وعصابته فى دمياط وبورسعيد لامة كل اللماليم))
وطبعاً طنط إحسان عارفة الفارسكوري اللئيم وخبزاه وعجناه من أيام ما كان فارسكوي لئيم وصغنون وعارفة البير وغطاه وإيه اللي حصل وبيحصل ومين مع مين ؟
وبدل الفارسكوري اللئيم بابا وطنط وكمان جدو وعمو عزيز وأُونكل نديم ونسيم وكل العيلة عارفينه (((يبقى البلد كلها عارفة)) ومدام هوة ((ممشيها كده)) يبقى كل عصاباته فى مينائي دمياط وبورسعيد (((هيمشوها كده وكده وكدة))) .. و (((كده))) ؟
فقاطعني عسلية وقاللى :
يا سلام عليك يا كبيرنا صندوق أسود بحق وحقيق وتعرف القرد مخبي إبنه فين فـ مصر وتعرف كل الفيران الفيران اللى فـ البلد ((فار فار وعِرسّة عِرسة)) ؟ وبتِفهامها وهيا طايرة من أول النجم اللئيم وعصابته فـ مواني بورسعيد ودمياط لغاية شركائهم من عصابة عبد عظيم رجالة وحريم .
وعشان كده عاوز أكملك الحدوتة اللى ما بتنتهيش بعد ما عصابة عب عظيم إختارت تبقى هيا اللى مَسّيطرة فوق وعصابة الفارسكوري اللئيم إختارت إنها تبقى مِسيطرة تحت و((الشغل يبقى شغال)) ..
و ((اللي عاوزينه اللي تحت يصدق عليه اللى فوق)) و ((اللى يرسموه اللى فوق ينفذوه اللى تحت بالحرف الواحد)) وعلى رأي ((أبو العربي)) ((شيلني أشيلك .. وعديني أعدلك))
وكأنك فى ماتش كورة يا باشا ((الكورة تبقى مع الشماعة)) يباصيها ((للسمانة)) مقشرة على يد ((مُحضر)) يقوم السمانة يشوط فـ الجون وطبعاً زي ما أنت عارف والبلد كلها عارفة ((الحكم الفارسكوري قابض)) نظمي .. رسمى .. وبلاش ((فهمي)) عشان فهمي قرفان من خٍلقتهم وسيرتهم اللي بقت على كل لسان فـ البلد !!
فلاحقت عسلية وقُلت له :
الحكاية مش بالبساطة دي يا واد يا أبو لسان زالف .. وماتش الكورة لازم يتحكي على حق يا واد يا اللي لسانك عاوز حّشه .. يعني أما يكون السمانة عاوز ينقل حد عاوزه في المُجمع فلو الموضوع عند ((مُحضره)) اللى عامل فيها عب حليم يكلم ((الشماعة)) الكريم عشان يكلم عب حليم و((الكام بكام يا برنس)) مش ملاليم ..
زي ما نقلوا ((نشأت)) بعد قضية الـ 6 مليون بتاعة الأموال العامة اللى لقوهم فى بيته فى القضية إياها بكل بجاحة وعين أد كدهو .. مهو أصل (((حسابات النقل))) لواحدها و((كل مكان وله برغوته ومكانه ومقامه)) ده غير حساب الجمعية الأسبوعي اللي دايرة من فوق وكل واحد وله حِصته و(((عبيلوه وأديلوه))) .
أهم حاجة السمانة تجيب كل ((زغلولة ومرايتها)) أو كل ((زغلول ومرايته)) مهي المرايا دي هيا اللى بتعتمد الشُغل يا واد يا مُفتري و ((عشان كلها تبقى مّية واحدة)) وكله يصُب فـ الآخر عند سمانة واحدة والسمانة ليها فى الجمعية وليها ((توتو براني)) وفيه حاجات خصوصى ((براني وجواني)) اللي بياخدها م المُهربين والعصافير الطايرة اللى تبعه يوم الجُمعة عند شقته الجديدة اللي فـ إشلاق السواحل .
مهو يا واد يا أبو لسان زالف عاوز حّشُه .. كل عصابة عب عظيم وعصابة الفراسكوري اللئيم ما بقوش تنظيم بورفؤادي بس زي زمان دول بقوا تنظيم بورفؤادي بورسعيدي ((2 فى واحد)) كمان وأغلبيتهم أشتروا شقق فى إشلاق السواحل لدرجة إنهم بيفكروا يسموه ((إشلاق موظفين المينا المنهوب )) على رأي بابا ..
وبيقولوا كمان حدانا فى ((بورتو التِرعة)) إن فيه ناس فيهم إشتروا فى برج أرض قسم الشرق القديم والمربع كله بما فيهم بُرج القُبة اللى قدام هيئة قناة السويس ويبص عالمينا من كل الإتجاهات عشان يأمنوا عالسبوبة وتبقى قدام عنيهم شايف الإخلاص فـ العمل يا واد يا مُفتري .
فقاطعني عسلية مرة آخري وقاللي :
والله العظيم أنا مكسوف منك .. بقى أنا جاي أحكيلك ألاقيك أنت اللى بتحكيلي وبتقوللى عالبير وغطاه ومين اللى غطاه ؟ بس أنت يا باشا أتكلمت شوية عـ اللي فوق خليني أحكيلك شوية من حكاية اللي تحت من أول أبو على وحكايته فى المنطقة الحرة مروراً بـ طأطأ بتاع 85 لغاية سبوبة شركات الأندلس والأتحاد الأوروبي بتوع الأدوات المنزلية الفايف ستار وهما بيسرحوا شعر بنت (((السُلطان))) بميناء بورسعيد من 3 سنين ((زي السكينة فـ الحلاوة)) وكمان حكاية سقوط ((مدكو الخلبوص)) بحاويات مواتير الغسالات الملعوب في أساسها ..
وبقى شعار المرحلة بميناء بورسعيد : ((شِيل سِيل شّحن وحُط سِيل إِفراج .. وقبل ما أمضي ورقك والإفراج .. حُط فلُوسك فـ اللـ إدراج)) وفى قول آخر : لو أتزقت روح لـ المُتمن (((ليلى))) من غير إحراج بس ظبط الإدراج وخد بالك عشان الفيديو بتاعك معايا وأسأل (((فراج))) !!
وأكمل عسلية :
يعني مثلاً ((أبو علي)) اللي خرج بفضيحة الحزام الدوار فى المنطقة الحرة اللي كان في كل وزنة بيتحط من 3 لـ 5 طن حزام مسموح وكانت بتخرُج زي السكينة فـ الجاتوه ومئات من حاويات خرجت كده منطقة حرة ((زي موضوع العيارات بالظبط اللى حبس عب عظيم وآخرين)) مهو أصل العيارات ما وقفتشى بحبس عب عظيم دول أخترعوا موضوع ((الحزام المسموح)) فـ المنطقة الحرة عشان يبقى بديل للعيارات اللى أتهرشت والدنيا كانت ماشية زي الفُل .
بس الشىء ((الجميل)) إن ((أبو علي)) كان شغال فى ضّرب الحزام المسوح لمستخلصين بالإسم بكُل ذمة وضمير ..
لدرجة وإن أبو على نفسه (((قعد 45 شهر في المنطقة الحُرة))) ما أخدشي يوم أجازة ولو طال يشتغل يوم الجمعة كان أشتغل ده ((شايف الإخلاص فـ العمل يا باشا))
ده حتى يوم الشتا فـ عاصفة التنين اللى فاتت يا كبيرنا كان بيُشفط المّية اللى مغرقة الساحة فـ المينا كأنه بيشفطها من بيته ولا من ((الصيدلية)) ((القديمة الجديدة)) وبكل ذمة وضمير (((شايف إخلاص أبو علي عشان الوطن يا باشا))) .
المُهم .. بعد ما الرقابة الإدارية عكشت الموضوع وحطت إيديها عالشهادات تم نقل أبو على ((بطلوع الروح)) عشان التيار الرقابي كان عالي رغم إن حكاية أبو على كانت معروفة من أول مراكب صيد السمك اللى بتبعت ((البوكس)) لغاية علب الحلويات اللى كانت بتروحله فيها الفلوس فى ((كرتونة المشبك الطري اللي من عند لورد)) ..
المُهم .. بقُدرة قادر أبو على راح الخليج و ((الجميل)) في الأمر إنه أخُدله أجازة يومين ((يعني ما راحشي أصلاً الخليج)) وراح ((خصوصي المستودع)) بعد يومين أتنين بس وفـ مكان فيه سبوبة أكبر م المنطقة الحُرة ودي (((تعليمات عُليا لعصابة عب عظيم وعصابة الفارسكوري اللئيم))) بنقل أبو على المستودع
زي ما بيقولوا ((أصل أبو علي مشهور فـ المينا إنه حبيبه قوي والدليل .. قالولوه)) زي ما مسرحية شاهد ما شافشي حاجة بالظبط .. والدليل قالولوه يا باشا وإسأل وأنت تعرف ؟
وطبعاً الموضوع عدا ولا أي أندهاش يا كبيرنا وكان زمان اللي بيتقفش ويكون عامل أي غلطة أهدرت المال العام أو غلطة إدارية أدت لخسارة أي رسوم لخزينة الدولة كان بيروح مركون عالرف فـ ساحة الغربان اللى فـ البترول أو فـ ساحة الكلاب اللى فـ قسم رابع فما بالك بواحد ممسوك بايع ساحة وبيأجر أطنان الحزام المسموح الدوار في الصفا والمروة !!
أما طأطأ بتاع 85 اللى كانوا عاطيينه ختم الإفراج يروح بيه واللى عاوز يختم يروح يختم عنده فى البيت والكام بكام وطبعاً أنت يا باشا عارف هما عاطيينه الختم ليه ؟ !!
عشان زباينهم طارق يختملهم الإفراج والمغضوب عليهم يباتوا يوم زيادة ويبقوا يختموا تاني يوم عشان طأطأ بيقفل الساعة 4 العصر وطبعاً حصل دوشة م الجهات الرقابية عالختم قام ((الفرايحى)) ساحبه منه وكفى عالخبر ماجور بتعليمات م العصابتين اللى أقوى من أي حد فـ المينا .
وكل ده بيحصل مقابل اللي السمانة بيعمله لما بيفتح كل يوم ما يقرب من 200 بيان ويتفتح بالمستودع العام ما بين 15 و 20 حاوية على أرض الواقع والكام حاوية اللي بيتفتحوا دول كل يوم فـ الساحة دول ((ششنة)) و(((بتوع الغلابة اللي ما لهومشي ضهر فـ المينا))) والكام حاوية دول بيبقوا (((منظر))) بيضحكوا بيهم على أي حد أو أي لجنة داخلة تفتش عالساحة وزي ما قولتلك يا باشا : ((شيل سيل شحن وحُط سيل إفراج .. وقبل ما أمضي الإفراج حُط فلوسك فـ الإدراج )) وأسألوا (((ليلى)))
والليلة كلها بتتلم عن طريق طأطأ ومنه للسمانة وتتحط عند مُحضره فى الخزنة ويسجل عنده دُفعة يومية لحساب جمعية عصابة عب عظيم والفارسكوري اللئيم ((ليمتد)) طرف أخوكم ومُحضركم عب الحليم وكله فـ السليم !!
