عسلية يقرأ الطالع ويحكى الحقيقة المرة فى تغييرات مجمع المنطقة الحرة بجمارك بورسعيد

ما أن رآنى عسلية حتى حاصرنى بما يحويه جراب فضائحه من أهوال مما فعله مجموعة من المهربين بمجمع المنطقة الحرة بميناء بورسعيد الجمركى خلال الشهور الماضية بمساعدة عصابات جمركية ممنهجة وأكتشفت أننى أحكى القشور أمام الحقيقة المفزعة حاولت أن أحكى لكم بعض من أهوال ما سمعت لكنى أمام إصرار عسلية على اللت والعجن تركته يحكى لكم الحقيقة المرة فى المنطقة الحرة بجمارك بورسعيد .

فقال لى عسلية :

’بص يا باشا أحنا صحيح بنقول القشور عشان الجهات الرقابية تجيب كل اللى فى البطون وعلى عينك يا قابض .. وأنا جى أحكيلك عالبير وغطاه من (طأطأ) لسلاموا (عنيكوا) وكمان جاى أقرا الطالع فى التغييرات المرتقبة بمجمع المنطقة الحرة وهيا التغييرات اللى حتحرق كل الكروت من الموظفين الشمال بتوع المهربين شمال الشمال بتعليمات رقابية من فوق قوى قوى يا كبيرنا وأول حاجة عملها أبو زيد الله يرضى عليه أنه طير الواد (عبد العال) بتاع إدارة الترشيد اللى راح منافذ المدينة الحرة وطير (خالد) الذكر والتتمين والتحمير والتشمير ووداه شرق بورسعيد وطير (الإمام) و(الصحفى)و(عبد الحفيظ) ووداهم سكة اللى يروح ما يرجعشى ..

فلاحقت عسلية وقلت له :

مش هما دول اللى تم أستبعادهم بتقارير رقابية يا واد واللى جه مكانهم (لاشين) و (عبد العظيم ــ 1) و(عبد العظيم ــ 2) و(عبد الملك) و (إسماعيل) بتاع التضريب فى الإسكراب والسيارات واللى جه مكان الواد (عبد العال) بتاع المحلة اللى كان ماسك ترشيد البطاقات الإستيرادية واللى كان بيخلى النملة فيل وفى 6 شهور بس جاب عربية مرسيدس رقمها 2325 ملاكى سوداء اللون موديل السنة وكمان أشترى شقة تساوى ملايين فى البرج اللى قدام مستشفى ناصر .. مش هوة ده يا واد يا مفترى اللى كان بيسجل البطاقة الاستيرادية أم 2400 بتاعة الغلابة ويحط جنبها صفر عشان تبقى حصة إستيرادية بـ 24 ألف الجنية .. مش هوة ده يا واد اللى كان بيضرب البطاقة فى 10 وياخد فى الـ 10 اللى زودهم 5 آلاف جنيه .. مش هوة ده يا واد يا مفترى اللى سهل خروج مئات الحاويات من غير ترشيد وبطاقات أستيرادية لصالح الطفل (المعجزة) و (كوهين) مش هوة ده يا واد الورق اللى ماسكه عليهم طارق خلف مدير عام الاستثمار والمنطقة الحرة …

فقاطعنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى إبنه فين فى البلد وبتلقطها من على لسانى وتفهمها وهيا طايرة .. حتى الواد (عبد العال) المحلاوى جبت أراره وكمان السبوبة اللى كان عاملها مع المعجزة وكوهين أنت ما يفوتكش تايهة وده اللى حيخلينى أحكيلك كل بلاوى الموظفين المنقولين وزواجهم الكاثوليكى بمهربين المنطقة الحرة من أول المعجزة لغاية إسلام وزهران والعريان …

فقاطعت عسلية وقلت له :

إقفل خاشمك يا واد يا مفترى ما تزعلشى مننا البهوات والبشوات اللى فى الجمرك .. إقفل خاشمك يا واد الحيطان ليها وادان وأحنا مش عاوزين (زهران) أسمه يتلط فى الموضوع وأوعى حد يفهمك أن ده زمن (حاتم زهران) يا واد يا مفترى (أبسيوتلى) ده زمن إسلام وزهران والعريان .. إقفل خاشمك يا واد وأسكت يا لسانى ما تخلنيش أحكيلك عن كروتهم اللى حتتحرق من أول (الإمام) و (خالد الذكر) و (الصحفى اللى مش صحفى) والجمعية اللى كانت شغالة كل يوم وبيقبضوها جماعة وأدخل المنطقة الحرة وشوف بعنيك يا اللى حتصلى عالنبى وطوف وشوف كل موظف حاطط لستة فى درج مكتبه بعدد الشهادات الجمركية اللى خلصها وحتلاقيه كاتب : 6 فلان و8 علان و13 ترتان والباقى بتوع حجاج ..

فلاحقنى عسلية وقاللى :

والله أنا مش عارف أقولك إيه ؟ بقى أنا جى أحكيلك ألاقيك أنت اللى بتحكيلى وبمناسبة الحكايات سمعت إن المرأة الحديدية راحت المنسوجات عشان اللى عملته فى منفذ تهريب مجمع 85 الجمركى تعمله فى المنسوجات وزيتنا فى دقيقنا بردو وبيقولك كمان راحت بقرار من فوق فى المصلحة بعد أما تم أستبعادها من مجمع 85 بتقارير رقابية بعد علاقتها المريبة ببعض مستخلصى الجمارك والريحة اللى كانت مفحفحة فى عمليات غسيل الأموال فى حاويات الجزم والشنط العام قبل الماضى …

فقاطعت عسلية مرة آخرى وقلت له :

بطل إفترا يا واد يا اللى شايل قلبك وحاطط مكانه حجر .. لساك شايل فى قلبك السواد يا واد وبتتكلم على المرأة الحديدية يا واد يا مفترى .. لساك شايل فى قلبك السواد يا واد وبتتكلم على اللعب اللى حصل فى حاويات الجزم والشنط اللى حصلت السنة اللى فات واللى قبل اللى فاتت واللى قبل قبل اللى فاتت وأسأل على الأراضى اللى أتباعت من ملايين النهب فى مجمع المطور خارجى واللى بسببها جت لجنة مخصوص من مصلحة الجمارك لتسعير الجلود وإتنقلت بعدها فى ظروف غامضة وفلت من المقصلة (حسن زعبولة) شريكها فى السبوبة .. إقفل خاشمك يا واد وأسكت يا لسانى ومتخلنيش أحكيلك إيه اللى كان مكتوب فى التقارير الرقابية عن المرأة الحديدية وعصابتها من المهربين اللذين غير بعضهم نشاطه باللعب فى المنطقة الحرة مع حجاج من الباطن وعمل البعض الآخر فى الوارد بشهادات تسجيل المصانع المزورة أو بأوراق مضروبة أو باللعب فى المخازن الجمركية .. إقفل خاشمك يا واد يا اللى قلبك عامل زى البولاك ما (تخربطنيش) وسيب شوية للحلقات الجاية ..!!؟؟