وبقول ربع كلمة الحق وهحتفظ بالثلاث إرباع الاخريات لوقت تاني .. ليه ؟ عشان ده هيعتمد علي خيال كل حد فينا ووجهة نظرنا المختلفة ..
لما واحدة بتكون حلوة قوي وفيها صفات يتمناها اي حد وتلاقي حظها مايل بيتقال لها ياختي ياريت تاخدي حظ الوحشين .. اه والله ..
والظاهر كده ان شعب مصر حلو بزيادة وعشان كده تلاقيه علطول منحوس ؟ اي والله .. احنا شعب منحوس بالفطرة .. تبص يا اخي علينا منذ بدء الحضارات وما قبلها تلاقينا شقيانين وطافحين الكوتة وشاربين الهم من كيعانا ..
شعب بيتحمل المشقة والألم وبيصبر وقت المحن .. شعب جدع ستات قبل الرجالة تلاقي فينا الجدعنة والشهامة وبرغم همومنا يا اخي بتلاقي فينا خفة الدم والنكتة والشقاوة والكحرتة .
احنا شعب دمه حامي وقت الشدة بنشد بعض ونآزر بعض وبنعرف نلم بعضنا لو جه اليوم واتبعترنا . شعب صبر عالأحتلال والحروب والثورات وقدر يبني حضارته وتاريخه رغم كل الصعاب .
بس يا أخي ارجع واقولك برضو شعب منحوس
دايما شايلين الهم عشان جدعان
دايما صابرين عشان عندنا امل
دايما شقيانين عشان اتعودنا نشق الصخر وناكل بعرق جبيننا .. ودايما ودايما ودايما .. لم نجد من يحنو علينا ….. !!
احنا اتحرمنا من حاجات كتير ومازلنا .. محرومين حتي من الإستمتاع بنعم ربنا علينا اللي انعم بيها علي بلدنا . النيل مبقاش بتاعنا والكورنيش مبقاش لينا والشوارع والأرصفة احتلها السياس اللي اجروها من رؤساء الاحياء مبقاش فيه مبدأ مشاه عشان التكاتك اللي مش مترخصة احتلت الشوارع والحواري وطبعا انا مسمياهم التكاتك الطائشة اللي بتجري وتلف وتدور حول نفسها وتعمل هوووووب في الهوا بغض النظر عن عربيات ماشية او بني ادم بيعدي ..
القهاوي احتلت كل حتة في مصر وبعيدا عن الادخنة اللي بتتصاعد منها وبتهلك صدورنا وانفاسنا بسبب الشيشة والسجاير والذي منه ” اه ” دي كمان محتلة الأرصفة والشوارع حرفيا .
مبقاش فيه مكان ولا زمان للإنسان عشان ياخد عيلته ويتمشي حتي لو خطوتين . ناهيك بقي انك لو غامرت او الست بتاعتك جازفت ونزلت تقضي طلبات البيت او غلطت وخدت الولاد ونزلت تشرب عصير قصب هتتسحل .. اه والله هتتسحل من اي موتوسيكل معدي وفيه شابين هيشدوا شنطتها ويجرجروها في الشارع دون رحمة لحد ما يخلعوا بالشنطة وهما وحظهم بقي فيها كام .. المدام هترجعلك متشلفطة .. ده اذا رجعت ..
شعب منحوس بطبعه يا أخى .
وإلى لقاء آخر إن شاء الله في بقية ربع كلمة الحق
