دايما بنقول التكرار يعلم الشطار نعديها الشطار .. الحقيقة ان بكتب المرة دي مش بقلمي ولا بخاطري لوحدي .. بكتب بقلمي وقلم كل مصري شريف ومحترم ووطني مخلص .. بكتب بخاطري وخاطر كل المصريين العظماء اللي وقت الجد اوصفهم لعدوك وهما هيتصرفوا ..
بأكتب بإسم كل الأساتذة الأجلاء اللي بيكتبوا هنا ف موقع الأنباء نيوز وأولهم صاحب الموقع ورئيس التحرير .. انا بكتب ” حلقة عايزة العالم يحطها في ودنه ” المصريين اللي علي حق روحهم في مصر .. بيعشقوا ترابها وبيدعموا جيشها .. دي عقيدة مصرية واعتبروها عقدة ان أردتم .. هو احنا كده طبعنا كده اسلوبنا كده وعيشتنا كده تلاقينا يا اخي مش طايقين حكومتنا وممكن نغضب من ريسنا وقالبين وناقمين علي برلمانا وبنكسر عين اعلامنا .. لكن تيجي عند الجيش نقف لك كلنا حيطة سد .. مبنشوفش مبنفهمش مبنسمعش مبنتفاهمش .. بنبقي اصنام بس غير قابلة للكسر اصنام بتكسر دماغ اللي يقرب من جيشنا .. اصنام بتصب لعنتها عاللي بيسرب واللي بيصور واللي ورا جيشنا بيدور بتدوروا علي ايه ؟
بالمناسبة الاخطاء كتير جملة وتفصيل وممكن تلاقوا استجابة .. لكن تقربوا من الجيش ؟ هننسي السكر والمكرونة والزيت واللبن وهننسي كل اخطاء الحكومة بل وجرائمها في حقنا وهننسي تفاهة وسفاهة البرلمان وهننسي حتي يا اخي احمد موسي شوفت بقي لدرجة ايه ؟ وهنقف وقتها ايد واحدة مع جيشنا فقط .. مصر يا ضي عيني مش هرم ومسلة ونيل وضلة .. مصر شعب عظيم وجيش باسل قوي نزيه عن اي تسريب دنيء .. ده مقال استثنائي وعلي وعد بعد ساعتين هرجع للوجع وهنتقد واشاغب ومش هحيد عن كلام الحق .. الله
الوطن
الشعب المصري العظيم
جيش مصر رجال علي حق
