حسن الغيطانى يكتب لـ الأنباء نيوز : نفسى أتعلم الروشنة

سألت نفسي ..؟ ليه بعض الشباب مش فاهمني ..؟ حاولت وبـِ كل هدوء أفهم و أعرف .. العيب في مين ..؟ حاولت أتكلم مع أحد الشباب .. سألته : انا لما بكتب بتفهمني ..؟ قال : أكيد بفهمك بس مش كل كلامك مفهوم .. سألته : السبب ..؟ قال : يا أستاذ لازم تفهمنا و تعرفنا .. تتكلم زَينا و تعيش معانا .. بعدها ممكن نسمعك .. !! سألته : مش فاهم .. فهمني ..؟ قال : لازم تفهم لُغاتنا ..وتخليك ” كُوول ” و ” أنتر” معانا علشان في زمانه ده ما حدش يقدر ” يفرمتنا ” .. وتكون ” لايك ” و ” نشير ” معاك ..

طبعاً أنا بحاول أفهم لَيقول علي جاهل .. !!

سألتة : وبعدين ..؟ أيه كمان ..؟ قال : حاول ” تيكجول الجي ” و تكون .. ” رِوش ” و تتعلم لغة ” الروشنة ” بمعنى تخللي كلامك شوية ” أرابك ” و شويه .. ” إنجلش ” .. و خليك ” تيت TYT يعني خد وقتك .. و لما تضحك معانا لازم تكون ” لول LOL ” يعني الضحك بصوت عالي .. علشان ما نزهقش منك و واحد يقولك : أومج OMG .. و دي إختصار لـ Oh My God ..

… و بعد أن أنتهي الشاب من شرح الدرس الذي لم أفهم منه إلا القليل قلت له : وإن قلت لك أنا مش فاهم بس أنا مصمم أعيش بينكم .. قال : بلاش يا أستاذ .. ” خليك في كوزك لما نعوزك ” ..؟؟؟؟؟؟

قلت لنفسي : ماذا أفعل .. ؟ و كيف أعيش بينهم و معهم .. ؟ و كيف أفهم لغة ” الروشنة ” و كيف أعرفها .. ؟ و من أين مصدرها ..؟ من المسئول ..؟ هل الأباء .. ؟ هل الإهمال في العلم و التعليم ..؟ هل من الإعلام ..؟ هل من السينما و الثقافة العصرية …؟

أبحث عن سبب ..!!

حسن الغيطاني ..