باسنت محمد تكتب لـ الأنباء نيوز : (شبابيك باسنتية) على العالم البريطانى الأعظم (3)
صبحكم بالخير انا جايبة بن يكفي كل القراء متقلقوش ده انا كرمي طائي وميهمنيش اننا ” فقراء قوي وغلابة قوي ” تعالوا بقي ننفسن واحنا بنبص عالشباك ده .. اصله شباك حلو كده بيفكرنا بساحرة القلوب برنسيس ديانا أميرة ويلز .. إنهارده هنبص من شباك بيطل علي ” الأرض التي لا تغيب عنها الشمس ” .. الكبيرة القوية ” بريطانيا العظمي ” وبنظرة سريعة هنلاقي بريطانيا العظمي جزيرة بتقع شمال غرب فرنسا وشرق إيرلندا وبتتكون من 3 مناطق مستقلة إستقلال داخلي .. إنجلترا وعاصمتها لندن إسكتلاندا وعاصمتها ادنبرا ويلز وعاصمتها كارديف بجانب شمال إيرلندا لكن جنوبها دولة مستقلة .. وعشان كده بقي يا غوالي اسمها المملكة المتحدة اللي لها نظام ملكي دستوري وهي دولة اتحادية بموجب قرار سنة 1800 بيحكمها نظام برلماني لها 14 اقليم يخضعون لها بالأمور الدفاعية فقط ..
ومن الناحية الإقتصادية هي واخدة المركز السادس عالميا .. ومن الناحية العسكرية من أقوي جيوش العالم ولكن قوتها فترت شوية بعد خوضها للحربين العالميتين الاولي والثانية .. فإتجهت للصناعة عشان تقوي مركزها وعندها بقي مفاعلات نووية عايزة تتخلص منها مع نهاية سنة 2025 .. فى القرن الـ 18 اتجهت انظار بريطانيا لقارة آسيا وحطت عينها علي الهند .. عملت فيها هيئة اسمها “شركة الهند الشرقية” هدفها السيطرة علي الهند بالتدريج .. فشغلت العمالة في الهند وشجعت الأقليات علي النزاع مع الجماعات الأخري بسبب الطائفية .. وبعدين طمعت اكتر وحطت عينها علي الدول العربية والإفريقية فعملت اتفاقية مع فرنسا لتوزيع الدول العربية بينهما اسمها اتفاقية “سايكس بيكو ” .. المهم يعني بريطانيا استعمرت 90% من دول العالم استعمار جزئي وكلي وفرضت الانتداب البريطاني علي بعض الشعوب للإستفادة اكتر من موارد بلادهم وتوسيع رقعة الإمبراطورية .. إمتد الوقت الزمني لـ اﻹمبراطورية ما بين 1583 إلي 1997 .. فإحتلت علي سبيل المثال الاردن .. العراق .. فلسطين .. البحرين .. قطر .. الكويت .. الإمارات .. عمان .. اليمن .. وطبعا مصر .
أنا ليه بحكي لكم حكاية بريطانيا ؟ عشان دي العقرب .. عقرب بيقرص قرصته السامة ويقتل ضحيته كده من سكات .. إبحث مع أي كارثة عن بريطانيا ومترحمهاش .. بس فيه حدث كبير وخطير وله تبعات مهمة لازم احكيلكم عنه وهو خروج بريطانيا من الإتحاد الأوربي بعد 43 سنة من العضوية واللي أثر وقت الإنتخاب عليه علي الإسترليني بشكل ملحوظ وتراجعه امام الدولار .. الحدوتة دي ظريفة مش هتملوا وانتوا بتشوفوها .. دي بترجع لسنين طويلة مع قصة إستفتاء Brexit سنة 1975 اللي كان السبب في انضمامها للإتحاد واللي مقدرش يغير شعور البريطانيين بعدم الإنتماء له وده اللي خلاهم عاملين مساحة فاصلة بينهم وبين أوربا .. بعد ما رفضوه سنة 1957 .. اللي يهمنا هنا ليه بريطانيا خرجت من الإتحاد الأوربي بعد إستفتاء Brexit 2 وإيه نتيجة وتبعات الخروج ده علي العالم والإتحاد وبريطانيا ؟ رشفة قهوة ياذوق وإهدي كده ده الموضوع لسه في أوله .. قالك ان الإنفصال بداية إنهيار للإتحاد اللي مفلحش في الحفاظ علي جوهر الديمقراطية بسبب المشاكل المرتبطة باللاجئين السوريين والهجرة وعدم إحترام الهوية المحلية للدول الأعضاء وده أدي لتنامي الحركات اليمينية المتطرفة في بريطانيا ومطالبتها بالإنفصال .
وقالك انها ذكية وشقية من يومها رمت الحمل علي ألمانيا اللي كان لها الصوت الأعلي في الإتحاد وده اللي معجبش بريطانيا خصوصا بعد ما ميركل أجبرت كل دول الإتحاد علي استقبال اللاجئين السوريين ودفعت الدول الأعضاء علي توقيع اتفاق مع تركيا بهذا الشأن .
حط في إعتبارك كمان يامان إن بريطانيا مش عايزة تشيل هم دول اخري أوشكت علي الإفلاس خصوصاً بعد أزمة اليونان هنلاقي فيه البرتغال وإيرلندا وإسبانيا .. مشاكل ملهاش فيها .. بس فيه إحتمال كبير يحصل إنسحاب تاني وثالث من الإتحاد وعيوننا بتشاور علي فرنسا .. ربما . نرجع نقول عشان نحفظ الدرس ده ونراجعه كويس عشان هنحتاجه ..
الأيام الجاية هنحتاج نقرأ التاريخ كله عشان نستوعب اللي جاي .. لازم نفهم اللي فات .. بريطانيا خرجت ليه من الإتحاد الأوربي ؟
(1) التخلص من عبء المهاجرين واللاجئين . خصوصا ان بريطانيا بقي عندها كم هائل منهم وفيه كتير بيشكلوا خطر عليها وعلي أمنها فهي اللي فتحت أحضانها لكل الهاربين الإرهابيين وأهي جنت علي نفسها .
(2) الخوف من الإرهاب .
(3) توفير المال اللازم للصحة والتعليم بدلا من إنفاقه علي قضايا مهاجرين ولاجئين
(4) وعود بالإزدهار في حالة خروجها من الإتحاد
(5) التجارة الحرة دون التقيد بقوانين الإتحاد
(6) النفوذ الدولي والحصول علي مقاعد في مؤسسات عالمية .
(7) المخاوف من إنضمام تركيا للإتحاد ووفود المزيد من اللاجئين إلي بريطانيا . يووووه .. ده انا سايبة قهوتي عالسبرتاية واتلهيت معاكم في الفرجة عالشباك البريطاني .. افوتكوا دلوقتي بعافية ولينا لقاء ونظرة اخري عالشباك ده ..
