قولي يا صاحب السعادة .. مونولوج شهير للراحل إسماعيل ياسين كان مطلعه بيقول .. كلنا عايزين سعادة بس إيه هي السعادة ولا إيه معني السعادة قولي يا صاحب السعادة قولي قولي .. ناس قالولي إن السعادة للنفوس حاجة سموها الجنيه قول فضلت أجمع وأحوش في الفلوس لما حسيت إني بيه .. وإلي نهاية المونولوج هتلاقوا فيه مدرسة كاملة متكاملة عن خط سيرنا إحنا وغيرنا في الحياة .. هتلاقيه بيدور عن السعادة في الفلوس والمناصب والنفوذ ولما يوصل للي بيتمناه مبيلاقيش السعادة لإنه اتفاجيء بإلتفاف المنافقين والطامعين حوله وكله بيمسح له جوخ وبيشتم في فلان عشان يرضيه ويخسر أهله عشان يكسب قرش أخينا ..
يعني السعادة مش في الفلوس برغم إنها شيء أساسي عشان تقدر تعيش تقدر تاكل وتشرب وتلبس وتتعالج وتصرف علي أهل بيتك لكن بعد كل ده إنت بتحس بسعادة ؟ لازم تعرفوا إن فيه فرق كبير بين القناعة والرضا والسعادة انتوا ممكن تكونوا قانعين بما أنعم الله عليكم بس مش راضين ولا سعداء وممكن تكونوا قانعين وراضين وبرضو مش سعداء وممكن تكونوا لا قانعنين ولا راضين لكن سعداء ..
أغلب الشعوب بتبقي عايزة الفلوس لقضاء حاجتها الأساسية ومبيطمعوش في أكتر من اللقمة الهنية وحتة الهدمة اللي بتستر الجتة وتعليم العيال علي قد الحال وحتتين اللحمة في العيد الكبير وإزازة الدواء لو عيل جاتله كحة ولا شوية برد .. وحتي ده أصحاب السعادة والفلوس والنفوذ والسلطة بيستخسروه في عباد الله .. وبيكتفوا بشوية الألاضيش اللي حولهم واللي بيمسحوا لهم أحذيتهم ويمثلوا عليهم الحب بكل نفاق وخداع ومكر ..
نرجع لصاحبنا بقي اللي بيدور عالسعادة واللي جرب بتجوز يمكن يسعد وبرضو أخفق لما أختار زوجة مبتهتمش به ولا بتشوف طلباته ولا بتسعي علي راحته وملاقاش السعادة .. هتلاقي بقي أصحاب السعادة بيكملوا كل دينهم مش نصه بس ومتجوزين 4 علي ذمتهم وماشيين في طريق ما ملكت أيمانهم وطبعا مش محتاجة فكاكة الأمثلة كتير حتي منهم صاحب سعادة اتجوز مرتين في السنة وصورة مالية الدنيا مع ست العرايس مع إن فيه غيره آلاف الشباب نفسه ومني عينه يتلم في أوضة بحمام مع حبيبته خطيبته اللي خاطبها بقاله 5 سنوات ومش قادر يتجوز ولا يفتح بيت . ياتري صاحب السعادة سعيد ؟ ولا هو واخد اللقب منظر بس ؟
وبالمناسبة دي .. أحب اسأل ياتري إيه هي السعادة ؟ أنا شايفاها رزق كلنا مرزوقين به بنسب مختلفة ممكن لحظات تمر علينا نشعر فيها بالسعادة في مقابل سنين طويلة عايشين تعاسة وحزن ملو القلب ولكن بتهف علينا اللحظات الحلوة تصبرنا لما بنفتكر إننا في يوم كنا في سعادة إنتوا بقي إيه هي السعادة من وجهة نظركوا ؟
