باسنت محمد تكتب لـ الأنباء نيوز : البقاء لله فى الشعب المغلوب على أمره !!

البقاء لله .. شعب مصر مات واللي قتله ثلة من الأفاقين عديمي المروءة ولسه ليكوا عين تعدلوا الدستور وتجددوا البيعة ؟ كان من الأولي الإهتمام بوسائل مواصلات الطبقة الفقيرة في المجتمع واللي أصبحت هي الأغلبية وتيسير الحياة الصعبة لهم كان من الأولي والأهم العمل علي قدم وساق لإصلاح كافة خطوط السكك الحديدية والقطارات اللي متصلحش تتكهن لأن منظومة القطارات من أيام الإحتلال البريطاني ومحدش كلف خاطره يبص بعين الرحمة علي وسيلة مواصلات الغلابة درجة تانية وثالثة بس فكرتوا تعملوا أكبر مسجد في العالم في العاصمة الإدارية اللي هيبقي فيها عدد محدود من الشعب ممكن نصفه يبقي مسيحيين يعني مجرد فشخرة وعنجهية بفلوسنا وإحنا علي أرض الواقع مبقناش لاقين طوبة نعضعض فيها تسد جوعنا ومبقاش حيلتنا إلا المر بنشربه من كيعانا .. مليارات اتصرفت علي تفريعة قناة السويس اللي مجابتش لنا إلا الفقر والنحس والبؤس ومليارات من الدولارات إتصرفت علي العاصمة الإدارية الجديدة بدلا من إعادة فتح المصانع المغلقة من 2011 واللى كانت هتخدم عدد مهول من الناس وتفتح بيوت الألاف من الأسر اللي بقوا بيسفوا تراب ومبقاش حيلتهم إلا الشكوي لله عز وجل .. حادث قطارين الإسكندرية بشع ومرعب ومهين للإنسانية وكأن العين رشقت فينا وإتحسدنا فـ بقي شوية بيموتوا في إنفجار وعمل إرهابي وشوية في حادث قطار وشوية في حوادث الطرق كل يوم وشوية بسبب خلافات العائلات وكتير بيموتوا كل يوم بجلطة وأزمة قلبية من النكد وشيل الهم واليأس اللي عايشين فيه ده غير اللي بيموتوا من الغيظ ..إتنشينا عين في حياتنا وعددنا والعدد بقي في الليمون للأموات ليس الأحياء وفـ الأخر هنقول إن سبب كل الحوادث أكيد الإخوان أو قطر وتركيا أو يمكن ((معتز مطر)) .. الكلام اللي عندي كتير ولو هكتبه هتبقي كارثة خليني ساكتة ومكتومة كتمة الكحك .