باسنت محمد تكتب لـ الأنباء نيوز : قراءة لكوابيس الإحتلال أمس و اليوم و غداً ؟!!

إتولدت قبل نصر أكتوبر بسنة وبعد يوم النصر بيومين أبقوا حلوها أنتوا بمعرفتكم ؟

اللي عايزة أقوله إن الحمد لله معشتش أوقات الإحتلال وبيتهيألي إن شعور مواطن بيحب بلده وقت خوضها حروب أفضل بكتير من إحساسه لو كانت محتلة عشان الحرب فى حد ذاتها شرف لو بدافع الدفاع عن الأرض مش فارقه بقي فزت ولا خسرت فيها المهم إنك خوضتها وعشان كده ولإن دراستي تاريخ أصلا ولأني بعيش بخيال خصب وعامله نفسي كاتبه وكده .. كنت ومازلت دايما بفكر لو أن بلدي لا قدر الله وقعت تحت وطأة الاحتلال تاني !!

وبتخيل اني نازله المهندسين ولا الزمالك ولا مصر الجديدة ولا المعادي ولا السيدة زينب ولا الحسين .. وألاقيلك العسكر الإنجليز ولا الأمريكان ولا الألمان بيمنعوني من السير في الشوارع وبيسألوني عن هويتي وممكن يعذبوني أو حتي يقتلوني علي كيفهم بقي ..

طب وهنروح بعيد ليه ما أحنا عارفين ومتأكدين إن دايماً التاريخ بيعيد نفسه بالذات للشعوب والحكام البلداء اللي مبيقروش التاريخ ومبيتعلموش منه .

عندكو مثلاً الإحتلال البريطاني علي مصر سنه 1882 وقبلها كانت مصر ولمدة 400 سنة يعنى اربع قرون يا باشا كانت فيهم مصر ولايه عثمانية محجوب عنها مياه ونور وهوا في عزلة تامة عن العالم وتلاقي بقي كده في النص الحملة الفرنسية اللى كانت سنه 1798 وفضلت لحد 1801 بس بصراحة كان ليها مميزاتها وغيرت كتير في مصر ..

نرجع بقي للإحتلال البريطاني نبذة بسيطه كده هو مش درس تاريخ لكن مقتطفات وأعتبروه حوار دردشة عشان أوصل حاجه معينة أتمني توصل لحضراتكم ..

عندك مثلاً بريطانيا لما بعتت حمله فريزر سنه 1807 علي مصر و أتحالفت فيها مع المماليك عشان تزيح محمد علي باشا و تعين حاكم صوري يكون مواليها ويأمن مصالحها و حملة فريزر فشلت و مشيت سنه 1809 ..

نيجي بقي لـ سنه 1882 الأوربيين و الإنجليز كانوا عاوزين يأمنوا إستثماراتهم و سياستهم التوسعية والإستيلاء علي قناة السويس وبالتالي التحكم بمصر ..

مروراً بقي بمعركة كفر الدوار بين أحمد عرابي وبين القوات الإنجليزية ومعركة القصاصين والتل الكبير و اللي علي أثرها نفي عرابي وأعوانه لجزيرة سيلان بالهند ..

واللي إنتهت بإحتلال بريطانيا لمصر وفرض الحماية عليها 1914 فخرجت مصر من العباءة العثمانية الي الإحتلال البريطاني مباشرة

كان ايه سبب الإحتلال المباشر ؟؟

الخديوي إسماعيل في سنه 1869 عمل إفتتاح كبير جداً لقناة السويس حضروا ملوك ورؤساء اوروبا ..

وكان الخديو اسماعيل السبب في إغراق مصر في الديون صرف علي مشاريع إنتاجية وصرف علي بناء قصور ضخمه وإقامه الحفلات وكانت إيده فرطه حبتين ..

فعرض أسهم مصر في قناة السويس للبيع !!

بريطانيا قالت انا شاري ((وبين الشاري والبايع يفتح الله)) في حاجة كده إسمها بعثة ((كيف ديي)) متخصصة فى الشئون المالية أرسلتها بريطانيا لدراسة حالة مصر المالية .

البعثة قالت إن سبب ازمة مصر المالية راجعة لفداحه الشروط اللي عقدت بيها القروض والفساد والإسراف في الإنفاق .

فقررت بريطانيا وفرنسا وضع مالية مصر تحت رقابة ثنائية إنجليزية فرنسية ثم الإدارة الأوروبية اللي من خلالها سيطرت فرنسا وإنجلترا علي شئون مصر المالية والإدارية والسياسية كل ده مكانش الشعب ساكت وكان فيه مقاومات ..

اللي عايزة أقوله أن الديون والإقتراض وشروط القروض المجحفه وفوائدها تؤدي في كل الأحوال لسقوط الدولة بعد أما الشعب يفيض بيه وميلاقيش ياكل وتزيد حالات السرقه والقتل والاعتداء فتهتز الدولة من كثرة الجرائم والديون وتعلن إفلاسها وتحتل ؟؟

ملحوظة على الماشي :

وذكر فإن الذكرى تنفع المؤمنين

هناك تقرير صادر منذ أيام عن وكالة ستاندرد أند بورز يتوقع أن تسجل الديون الخارجية لمصر إرتفاعا قياسياً خلال العام الحالي 2022 قد تصل إلي 391.8 مليار دولار بعد أن كان 184.9 مليار دولار فقط في عام 2017 ؟!!

وكل عام وحضراتكم بخير .. واللهم إنى صايمة .