اتولدت قبل نصر اكتوبر بسنة وبعد يوم النصر بيومين ابقوا حلوها أنتوا بمعرفتكم اللي عايزة اقوله ان الحمد لله معشتش أوقات الاحتلال وبيتهيألي ان شعور مواطن بيحب بلده وقت خوضها حروب أفضل بكتير من إحساسه لو كانت محتلة عشان الحرب فى حد ذاتها شرف لو بدافع الدفاع عن الارض مش فارقه بقي فزت ولا خسرت فيها المهم انك خوضتها وعشان كده ولإن دراستي تاريخ اصلا ولاني بعيش بخيال خصب وعامله نفسي كاتبه وكده .. كنت ومازلت دايما بفكر لو ان بلدي لاقدر الله وقعت تحت وطأة الاحتلال تاني !! وبتخيل اني نازله المهندسين ولا الزمالك ولا مصر الجديدة ولا المعادي ولا السيدة زينب ولا الحسين .. وألاقيلك العسكر الانجليز ولا الامريكان ولا الالمان بيمنعوني من السير في الشوارع وبيسألوني عن هويتي وممكن يعذبوني او حتي يقتلوني علي كيفهم بقي .. طب وهنروح بعيد ليه ما احنا عارفين ومتأكدين ان دايما التاريخ بيعيد نفسه بالذات للشعوب والحكام البلداء اللي مبيقروش التاريخ ومبيتعلموش منه .
عندكو مثلا الاحتلال البريطاني علي مصر سنه 1882 وقبلها كانت مصر ولمدة 400 سنة يعنى اربع قرون ياباشا كانت فيهم مصر ولايه عثمانية محجوب عنها مياه ونور وهوا في عزلة تامة عن العالم وتلاقي بقي كده في النص الحملة الفرنسية اللى كانت سنه 1798 وفضلت لحد 1801 بس بصراحة كان ليها مميزاتها وغيرت كتير في مصر ..
نرجع بقي للاحتلال البريطاني نبذة بسيطه كده هو مش درس تاريخ لكن مقتطفات واعتبروه حوار دردشة عشان اوصل حاجه معينة اتمني توصل لحضراتكم .. عندك مثلا بريطانيا لما بعتت حمله فريزر سنه 1807 علي مصر و اتحالفت فيها مع المماليك عشان تزيح محمد علي باشا و تعين حاكم صوري يكون مواليها ويأمن مصالحها و حمله فريزر فشلت و مشيت سنه 1809 .. نيجي بقي لـ سنه 1882 الأوربيين و الانجليز كانوا عاوزين يأمنوا استثماراتهم و سياستهم التوسعية والاستيلاء علي قناة السويس وبالتالي التحكم بمصر .. مرورا بقي بمعركة كفر الدوار بين احمد عرابي وبين القوات الانجليزية ومعركة القصاصين والتل الكبير و اللي علي اثرها نفي عرابي واعوانه لجزيرة سيلان بالهند .. واللي انتهت باحتلال بريطانيا لمصر وفرض الحماية عليها 1914 فخرجت مصر من العباءة العثمانية الي الاحتلال البريطاني مباشرة …
كان ايه سبب الاحتلال المباشر ؟؟ الخديوي اسماعيل في سنه 1869 عمل افتتاح كبير جدا لقناة السويس حضروا ملوك ورؤساء اوروبا .. وكان الخديو اسماعيل السبب في اغراق مصر في الديون صرف علي مشاريع انتاجية وصرف علي بناء قصور ضخمه واقامه الحفلات وكانت إيده فرطه حبتين .. فعرض اسهم مصر في قناة السويس للبيع بريطانيا قالت انا شاري ”وبين الشاري والبايع يفتح الله ..” في حاجة كده اسمها بعثة (كيف ديي) متخصصة فى الشئون المالية أرسلتها بريطانيا لدراسة حالة مصر المالية البعثة قالت ان سبب ازمة مصر المالية راجعة لفداحه الشروط اللي عقدت بيها القروض والفساد والاسراف في الانفاق وعندئذ اذا مولاي اذن .. قررت بريطانيا وفرنسا وضع مالية مصر تحت رقابة ثنائية انجليزية فرنسية ثم الادارة الأوروبية اللي من خلالها سيطرت فرنسا وانجلترا علي شئون مصر المالية والادارية والسياسية كل ده مكانش الشعب ساكت وكان فيه مقاومات .. اللي عايزة اقوله ان الديون والاقتراض وشروط القروض المجحفه وفوائدها تؤدي في كل الاحوال لسقوط الدولة بعد اما الشعب يفيض بيه وميلاقيش ياكل وتزيد حالات السرقه والقتل والاعتداء .. فتهتز الدولة من كثرة الجرائم والديون وتعلن افلاسها وتحتل .. وكل عام وحضراتكم بخير .. واللهم إنى صايمة ..
