أي مشوار فيه تقضية مصلحة يلزمه اوراق حكومية بيبقي أكبر عقاب لكل إنسان محترم .. وبما إني إنسان ومحترم فأنا وبكل فخر ممكن أتنازل عن كل حقوقي من الدولة عشان أعفي نفسي من الذل والإهانة اللهم إلا مشوار واحد إجباري ولا محيص من القيام به وهو .. أأأأأه .. وحدة التراخيص لأي مرور في أي منطقة في كل بر مصر أنا تابعة لمرور حدايق الأهرام واللي تم إنشائها من 3 سنوات فقط وكنت من أوائل المواطنين اللي دخلوها برجلي اليمين وسميت وكبرت قبل ما ادخل ..
كانت نضافة إيه وشياكة إيه ومكان واسع ومفيهوش زحام .. ياسلاااام كانت أيام وكنت أشدت قبل كده بالمكان وسرعة أداء العاملين فيه .. ولكن … مفيش شيء بيفضل علي حاله فبعد قرار ”سيات ”النايب سعيد حساسين بتوجيه مواطنين الكرداسة وتحويلهم علي مرور حدايق الأهرام بدلا من أوسيم التابعين لها المكان فجأة إزدحم وبقي مكدس بالمواطنين ومبقاش فيه أي إمكانية للشهيق والزفير معا حيث إنك مش هتاخد ولا تدي إلا زفير أو شهيق يعني يا تشهق يا تزفر اختار إنت بقي .
مكان كئيب مريب والعاملين به حالهم يصعب عالكافر يا أخي والله .. طبعا مبسكتش أنا ولازم أحط التاتش بتاعي دخلت عليهم الغرفة المغلقة وكأني رئيس الوحدة يكسو وجهي إبتسامة وقورة وثقة عالية بالنفس لدرجة انهم افتكروني سيادة المحافظ ولإني معروفة هناك عشان تاتشاتي السابقة ” عندي فوبيا بجد من الزحمة وبيغمي عليا فورا وبرش بيرفيوم عالناس ومبستحملش اي رغي ولا أي رائحة عرق وبتبقي فضيحة فبيخلصوني علطول او بيخلصوا مني علطول ” ….. فلقيتهم بيرحبوا بيا وبيساعدوني أخلص ورقي لقيت الدنيا حر وكأننا في ساونا ولقيت كام مروحة شغالة مش جايبة هوا ولقيت السقف مايل ومعوج ومش علي بعضه ولقيت إضاءة خافتة جداااا مش ممكن حد يعرف يقرا ويكتب علي النور البسيط ده وإليكم الآتي المراوح دي إشتراها العاملين علي نفقتهم الخاصة حيث ان كل موظف دفع 140 وجمعوا الفلوس وإشتروا المراوح السقف ده وقع عليهم في يوم من الأيام وبينشع ميه ورمموه أي كلام كده .. رواتب العاملين هناك تتراوح ما بين 1800 إلي 2000 جنيه فقط ومفيش إلا يوم الجمعة إجازة رسمية وعلاجهم علي حسابهم الخاص برغم إنهم بيتخصم منهم التأمين الصحي كل شهر واحدة هناك بتشتغل بقالها 33 سنة ولسه لها كمان 3 سنوات عالمعاش هتقبض مكافأة 12 ألف جنيه فقط فـ نهاية الخدمة وهيبقي معاشها 500 جنيه بعد خدمة 36 سنة كاملة لإنها جاية من المحافظة وليست من وزارة الداخلية ..
أحد الموظفين لسه عامل عملية في الحنجرة والأحبال الصوتية وعلي حسابه برضو الناس تعبانين جداً وحالهم ميسرش حبيب أما بالنسبة ليا فأنا دفعت مبالغ عشان أجدد رخصة العربية وكلها حاجات ملهاش أي لازمة هي إتاوة بمعني الكلمة وصلت لـ 900 جنيه .. وفوجئت بشيء غريب .. لقيتهم بيطلعوا الدوسيه بتاعي من الحافظة الزرقاء وبيقولولي هاتي 25 جنيه نشتريلك حافظة زرقاء جديدة ولما سألتهم هي القديمة إتقطعت ؟ قالولي لا ده قرار جديد بشراء حافظة جديدة بـ 25 جنيه لكل مواطن عنده عربية لإنهم بيزودوا مرتبات الداخلية والشرطة هيزودوها منين اذا مكانش بالحيل دي ؟ أنا معنديش تعليق علي كل الفلوس اللي بندفعها مجبرين في كل دقيقة من حياتنا ومعرفش ليه أنا دفعت كل الفلوس دي إنهارده ما بين دمغة وضريبة وتأمين .. ضريبة إيه وتأمين إجباري ليه ؟ الشوارع متبهدلة ومكسرة وبتكسر عربياتنا ومفيش عساكر مرور تعدل المايلة ومفيش تفتيش عالعربجية بتوع التوكتوك والنقل والميكروباص اللي بيبلطجوا علينا وهما سبب كل الحوادث اللي بتاخد أرواحنا .. إتاوات وزارة الداخلية عالمواطنين اللي طلعوا من هدومهم وبيصرخوا من العوزة والفقر والهم اللي طالهم .
الله يكسر قلب اللي بيكسر قلوبنا وشوارعنا
