ما لا يدرك كله لا يترك كله . صعب جدا إنك تفقد إنسان كان بيحبك حتي لو مكانش عزيز عليك .. أصل الحب ده نعمة كبيرة اللي يفرط فيها يبقي بيرفس النعمة والنعمة لما بتزول مبترجعش تاني فما بالك لو عشرة كانوا بيحبوك وانت خسرت حبهم ليك ؟كده خسارتك اكبر . طب لو كانوا ألف شخص ؟ يبقي كده خسارتك بتزيد .. طب لو كانوا ملايين الأشخاص كانوا بيحبوك ويطيعوك ويدعموك ويدافعوا عنك ضد أعدائك .. لما تلاقي موقفهم اتغير من ناحيتك واحنا إتفقنا انهم نعمة كبيرة لازم تسأل نفسك ايه اللي حصل ايه الغلط اللي ارتكبته خلاني افقد محبة ملايين الناس ليا خصوصا انهم كانوا سندك وضهرك ..
ده اذا كان يهمك بالفعل ان يكون ليك سند وظهير شعبي معرفش حقيقي اذا كان يهمك تعرف ولا لا .. لكن بمعرفتي البسيطة وخبرتي اللي علي قدي ودرايتي المحدوده بأمور شعب مصر اقدر اقولك اننا شعب عجيب شعب يتمناه أي حاكم شعب طيب وبسيط بتجمعه الكلمه الحلوة و النية الصافية وبيجتمع بزيادة وقت المحنة والخوف علي الوطن شعب روحه في تراب بلده كل شبر في البلد له غلاوة الضنا في قلب شعب مصر الارض عندنا عرض مش عرض وبس ده عرض وطول وارتفاع الارض عندنا شرف حتي لعديمي الشرف ..
الارض عندنا تراث ومجد وتاريخ وحضارة مش مجرد حفنة تراب الارض عندنا فخر حتي لو مكناش نعرف طريقها حتي لو عمرنا ما شوفناها حتي لو عمرنا ما سمعنا عنها حتي لو كانت حتة خردة ومهملة ده اعتقاد راسخ جوه المصريين مينفعش يتغير هتلاقي جوه مصر ملاحدة وكفرة لكن صعب تلاقي حد مبيحبش ارض مصر اللي حصل وبغض النظر عن احداث كتير حصلت وبتحصل ارهقتنا وتعبتنا وموتت فينا الأمل واحبطتنا وزرعت جوانا اليأس وسلبت مننا فرحتنا اللي كنا بنترجاها وطفت لمعة عينينا اللي كانت مليانة بالفخر والحب من 3 سنين ..
بغض النظر عن اهتزاز وارتعاش اجهزة الدولة ومؤسساتها بغض النظر عن ابتزاز الحكومة للمواطنين وقتلهم قتل عمد بالتدريج نتيجة اهمالها وقسوتها ولامبالاة رجالاتها بعناء الشعب بغض النظر عن برلمان العار .. العار تماما من اي حقيقة ومن اي حق وخضوع وخنوع نوابه للحكومة .. بغض النظر عن تعويم الجنيه وتدمير الاقتصاد المصري وارتفاع الاسعار بشكل لم يسبق له مثيل .. بغض النظر عن تدهور وفشل منظومة التعليم والصحة والتموين بشكل سريع ومفاجئ ..
بغض النظر عن اختفاء الدواء وموت مئات المرضى والحكومة مكتوفة الايدي بغض النظر عن الحوادث الارهابية اليومية والتفجيرات اللي اصبحت بتلاحق المصريين في كل مكان في ارض مصر .. بغض النظر عن قتل المسيحيين وتهجيرهم وتفجيرهم بغض النظر عن اختفاء الطبقة المتوسطة من شعب مصر وبغض النظر عن هدر اموال مصر في مشاريع لم ولن تؤتي ثمارها ومكانش وقتها اصلا .. وبغض النظر عن كم القروض والديون الخارجية والداخلية اللي غرقت مصر فيها واللي كانت قبل كده سبب احتلالها في يوم .. وبغض النظر عن حاجات كتيرة أوي بالشكل ده ……
كل ده كوم وشبر واحد من ارض مصر كوم تاني .. وبفرض ان الجزيرتين سعوديتين .. فسبب غضب وحنق ورفض الرافضين للتنازل عنهما هو الريبة اللي ملكتنا بسبب التناول الخاطيء والمبهم للموضوع حسينا كده انه سلق بيض او ضربة بالقفا حسينا اننا اتطلصقنا واتخدنا علي خوانة مع ان مفيش اي سبب يستدعي السرعة في الإجراءات خصوصاً بعد صدور حكم المحكمة الإدارية العليا واللي أجزمت بمصرية الجزيرتين وبثبوت السيادة المصرية عليهما علي مر التاريخ ..
مفيش متحدث رسمي يطلع للشعب يفهمه يطمنه ويقوله مش ممكن نفرط في حبة رمل من ارض مصر . وبرغم تواجد الريس بشكل شبه يومي عبر الشاشات وبمناسبة او بدون مناسبة الا ان سيادة الرئيس لم يتكلف جهدا في الظهور للشعب وشرح الموقف كله وبكل شفافية .. الشعب الغاضب له حق يغضب ويرفض ويعلن رفضه وغضبه وطالما الدولة معاها الحق يبقي ناخد يالقاعدة القانونية ونقول البينة علي من إدعي .. الدولة بتدعي ان الجزيرتين سعوديتين والرافضين من الشعب بيوثقوا بكل الأدلة مصرية وهوية الجزيرتين .. علي من إدعي عكس ما هو ثابت وأصيل ان يبرز أدلته ويبين للناس حقيقة الأمر الجلل قبل تفاحل الأمور وانقسام الشعب اكتر ما هو متقسم ..
اللهم قد بلغت اللهم فأشهد
