عسلية يكشف : اللعب فى ساحة الخليج والزواج الكاثوليكى بمجمع السيارات وشراء شاليهات قرية مرحبا بالأموال المنهوبة من جمارك بورسعيد

قبل أن يحكى لى عسلية قرأت فيه أهوال ما يخفيه من ملامح وجهه التى كساها السواد بالرغم من ضحكته الساخرة التى طالما يقابلنى بها فى كل حلقة من حلقاته الشيقة حاولت أن أحكى لكم أهوال ما سمعت عن حواديت كل الشمال اللى فـ البلد لكنى أكتشفت أننا نحكى القشور وأن الحقيقة مفزعة وأمام إصرار عسلية على اللت والعجن تركته يحكى ويكشف لكم اللعب فى ساحة الخليج والزواج الكاثوليكى بمجمع السيارات وشراء شاليهات قرية مرحبا بالأموال المنهوبة من مجمع المنطقة الحرة بجمارك بورسعيد .. ولكن بالتفاصيل المملة .

فقال لى عسلية :

’بص يا باشا أحنا صحيح بنحكى القشور بس عشان الجهات الرقابية تجيب كل اللى فى البطون وننضف الجمرك من كل الشمال اللى فيه ’أمال هما زعلانين ليه على شيل (ناصر) وعاوزين يودوا (لاشين) فى ستين داهية عشان النهب اللى كانوا بينهبوه من مجمع المنطقة الحرة أيام ناصر مش عارفين يعملوه دلوقتى عشان عارفين إن لاشين صعيدى ومعندوش يا أما أرحمينى ..

فلاحقت عسلية وقلت له :

مش ناصر ده يا واد اللى المهربين هددوا قيادات جمارك بورسعيد على قرار إبعاده من مجمع المنطقة الحرة بعد النهب اللى نهبوه الشهور اللى فاتت من مجمع المنطقة الحرة ده غير النهب الأكبر م المنافذ المفتوحة على مصراعيها بالتهريب وبيقولك الحاوية وصلت 600 ألف جنيه ويا أخى 600 مليون مرحبا وشاليهات مرحبا وعشان كده عاوزين يرجعوا ناصر بأى طريقة يا أما يوقعوا لاشين فى المحظور ويبقى لاشين زى ناصر وناصر زى لاشين وزيتنا فى دقيقنا ..

فلاحقنى عسلية وقاللى :

يا سلام عليك يا كبيرنا صندوق أسود بحق وحقيق وتعرف القرد مخبى أبنه فين فى البلد وتفهمها وهيا طايرة وبمناسبة إننا بنحكى عن شاليهات مرحبا أحب أعرفك إن قرية مرحبا بقى فيها غالبية مهربين بضايع المنطقة الحرة وعلى راسهم الواد سلوم والعريان والمتغطى .. والمتغطى بالمعجزة عريان ومش هما دول اللى نهبوا بس مهى كانت ماشية شلاه يا مهلبى وعند (ناصر) كله بطيخ !! يعنى الحلاق بقى مستخلص وبتاع الكرشة بقى تاجر ومستورد والسماك بقى سمسار بطايق استيرادية قد الدنيا وسبحان العاطى حتى الحلاق اللى عامل فيها مستخلص جمركى بنا برج سكنى بشارع أوجينا ..

فقاطعت عسلية وقلت له :

إقفل خاشمك يا واد ده كلام ما ينفعشى يتكتب فى جرايد ولا يتقرا على مواقع ألكترونية ده كلام ما يتقالشى غير فى جهاز الكسب غير المشروع والأموال العامة ومن أين لك هذا يا مبقع ؟؟ إقفل خاشمك يا واد يا مفترى إياك تجيب سيرة الواد سلوم على لسانك ما تزعلشى مننا البشوات والبهوات يا واد يا أبو قلب عامل زى البولاك .. إقفل خاشمك يا واد ما تجيبشى سيرة العريان وفيلا العريان بقرية مرحبا والملايين اللى فوق والملايين اللى تحت وكله تهليب فى تهريب .. إقفل خاشمك يا واد ما توديناش فى داهية مهو مش حلاق واحد اللى أشتغل مستخلص جمركى أصل الحلاقين كتير قوى والزواج الكاثوليكى بقى هوة عنوان المشهد يعنى حتلاقى العريان متجوز الامام وسبانخ وسلوم متجوز أربعة حسب الشرع فى الميزان والمجمع والباب اللى بيتفتحله زى السكينة فى الحلاوة ..

فقاطعنى عسلية وقاللى :

والله أنا مكسوف منك ومش عارف أقولك إيه ؟ بقى أنا جى أحكيلك ألاقيك أنت اللى بتحكيلى وبتقولى عالبير وغطاه وبمناسبة (غطاه) والزواج الكاثوليكى حقولك على الجواز الكاثوليكى اللى حق فى مجمع السيارات بين متمنين ومستخلصين قطع الغيار أصل ساحة الإسكراب ومجمع السيارات فيه موظفين مأجرينها حق أنتفاع وفيه موظفين مأجرينها إيجار جديد وبقالهم 10 سنين فى أماكنهم لعجز فى عدد الأفراد بجمارك بورسعيد وده اللى ساعدهم أنهم يتحكموا فى الساحة وفى المجمع واللى تبعهم شغله يخلص أوام أوام أما اللى مش تبعهم يا ويله يا سواد ليله يقعد عشرة خمستاشر يوم لغاية ما يخلص حاوية واحدة ..

وأكمل عسلية :

أما بقى ساحة الخليج فأوعى وشك لكل ما هو ممنوع ومحظور من ضرب موازين للعب فى الشهادات من المستخلصين الشمال وفتش أى حاوية عشوائية حتلاقيها شمال الشمال .. أقولك إيه ولا إيه بس يا باشا .. أقولك على البلطجية اللى أجرهم الطفل المعجزة لخطف وتهديد قيادات جمارك بورسعيد .. أقولك إيه ولا إيه بس يا باشا الكيل طفح ..

فعنفت عسلية وقلت له :

لساك شايل فى قلبك السواد يا واد وبتتكلم على الزواج الكاثوليكى اللى فى مجمع السيارات .. لساك شايل فى قلبك السواد يا واد وبتتكلم على حق الإنتفاع والإيجار الجديد فى الساحة والمجمع وشغل (عبده موتة) اللى بيخلص قبل أى حد .. لساك شايل فى قلبك السواد يا واد وبتتجرأ وبتتكلم على ساحة الخليج واللى بيحصل فى ساحة الخليج .. لساك شايل فى قلبك السواد يا واد يا اللى قلبك عامل زى البولاك وبتتكلم على البلطجية اللى أجرهم الطفل المعجزة لخطف طارق خلف مدير عام المنطقة الحرة .. إقفل خاشمك يا واد وسيب شوية للحلقات الجاية …!!؟؟